UHezekhiyeli 41 - iBhayibhili Elingcwele 1978

¹ Wasengingenisa ethempelini, walinganisa insika, ububanzi bazo babuzingalo eziyisithupha inxa zonke.

² Ububanzi bomnyango babuzingalo ezilitshumi, lobubanzi bemiduli eseceleni kwesango babuzingalo ezinhlanu ngapha langapha. Waselinganisa ubude bethempeli, baba zingalo ezingamatshumi amane, lobubanzi balo baba zingalo ezingamatshumi amabili.

³ Wasengena endlini engaphakathi, walinganisa insika zomnyango, zaba zingalo ezimbili, lobubanzi bomnyango baba zingalo eziyisithupha; lemiduli eseceleni kwesango yaba zingalo eziyisikhombisa.

⁴ Walinganisa ubude bendlu esekucineni, baba zingalo ezingamatshumi amabili, lobubanzi bayo baba zingalo ezingamatshumi amabili. Wasesithi kimi: Lokhu kuyindawo engcwele kakhulu.

⁵ Waselinganisa umduli wethempeli, ubuqatha bawo baba zingalo eziyisithupha. Ububanzi bezindlu eziseceleni baba zingalo ezine, inxa zonke zethempeli.

⁶ Izindlu eziseceleni zazelekene zintathu, enye phezu kwenye, zingamatshumi amathathu mzila munye. Kwakulezisekelo emdulini wethempeli ezisekele izindlu eziseceleni ukuze zingaqiniswa ngumduli wethempeli.

⁷ Izindlu eziseceleni zaqhela zaba banzi ekuphakameni kwazo kusukela kwenye indlu kusiya kwenye, zivumelana lokuqhela kwezisekelo kusukela kwenye indlu kusiya kwenye, inxa zonke zethempeli. Ngasethempelini kwakukhona ilele, ukuba umuntu asuke endlini engaphansi, adabule kwephakathi, ukuya kwephezulu.

⁸ Ngabona futhi ukuba ithempeli lalilendawo edundubeleyo inxa zonke. Izisekelo zezindlu eziseceleni zazilingana lomhlanga owodwa olobude obuzingalo eziyisithupha.

⁹ Ubuqatha bomduli wangaphandle wezindlu eziseceleni babuzingalo ezinhlanu; lengxenye yendawo edundubeleyo eyayisele yayizingalo ezinhlanu.

¹⁰ Indawo edundubeleyo engaphandle kwezindlu eziseceleni ezizingelezele ithempeli ububanzi bayo babuzingalo ezingamatshumi amabili.

¹¹ Izivalo zezindlu eziseceleni zavulelwa endaweni edundubeleyo eseleyo, esinye isivalo sivulelwa enyakatho lesinye sivulelwa eningizimu; ububanzi bendawo eseleyo babuzingalo ezinhlanu inxa zonke.

¹² Indlu eyayikhangele iguma lethempeli ngasentshonalanga, ububanzi bayo babuzingalo ezingamatshumi ayisikhombisa, lobuqatha bomduli wayo babuzingalo ezinhlanu inxa zonke, lobude bawo babuzingalo ezingamatshumi aficamunwemunye.

¹³ Waselinganisa ithempeli, ubude balo baba zingalo ezilikhulu. Igceke lendlu lilemiduli yalo kwaba zingalo ezilikhulu ubude;

¹⁴ lobubanzi bethempeli ngasempumalanga kanye leguma baba zingalo ezilikhulu.

¹⁵ Waselinganisa indlu ekhangele iguma engasentshonalanga kanye lemiduli yayo inxa zonke, yaba zingalo ezilikhulu ubude. Ithempeli, lendlu engaphakathi, lendlu esekungeneni ngaphandle,

¹⁶ zazilemiduli yamapulanka; izindlu lezi ezintathu zazilamawindi alemigubazi. Kusukela phansi kuze kufike emawindini langaphezu komnyango,

¹⁷ endlini engaphakathi lasezindlini ezisekungeneni lakuyo yonke imiduli ngaphandle langaphakathi,

¹⁸ kwakukhona izithombe ezibaziweyo, ezamakherubi lezihlahla zelala, isihlahla selala simi phakathi kwamakherubi amabili. Ikherubi lilinye lalilobuso obubili,

¹⁹ obunye buyibuso bomuntu bukhangelene lesihlahla selala, lobunye buyibuso besilwane bukhangelene lesihlahla selala. Zazinjalo izithombe ezibaziweyo kilo lonke ithempeli.

²⁰ Amakherubi lezihlahla zelala kwakubaziwe kusukela phansi kwaze kwafika ngaphezu komnyango, lasemdulini wethempeli.

²¹ Imigubazi yomnyango wethempeli yayilingana inxa zonke; laphambi kwendawo engcwele kwakukhona into,

²² efana lealtare eyakhiwe ngezigodo, ukuphakama kwayo kuzingalo ezintathu, ubude bayo buzingalo ezimbili, lobubanzi bayo buzingalo ezimbili; izingonsi zayo lesidindi sayo kanye lemiduli yayo kwenziwe ngezigodo. Wathi kimi: Lokhu kuyitafula ephambi kweNkosi.

²³ Ithempeli lendawo engcwele kokubili kwakulezivalo ezihlanganayo.

²⁴ Izivalo zazilempiko ezimbili, ileso laleso isivalo silempiko ezimbili ezivulekayo.

²⁵ Ezivalweni zethempeli kwakubazwe amakherubi lezihlahla zelala, njengalokho okwakusemidulini. Kwakukhona uphahla lwezigodo ngaphambi kwendlu engasekungeneni.

²⁶ Kwakukhona amawindi alemigubazi lezihlahla zelala ngapha langapha kwamawindi, emidulini esemaceleni endlu esekungeneni.