UHezekhiyeli 4 - iBhayibhili Elingcwele 1978

Umfanekiso wokuvinjezelwa kweJerusalema

¹ INkosi yathi: Wena, ndoda, thatha isitina, usibeke phambi kwakho, udwebe kiso umfanekiso womuzi, umuzi waseJerusalema;

² udwebe indawo zokuwuvimbezela, lomduli wokuwuvimbezela, ledundulu; udwebe lezihonqo futhi, lezigodo zokudiliza inxa zonke.

³ Uthathe umganu wensimbi, uwumise phakathi kwakho lomuzi, ube ngumduli wensimbi; wena ukhangele ngakuwo umuzi, umuzi ube ngovinjezelweyo, wena ube ngumvimbezeli. Lokhu kuzakuba yisibonakaliso kwabakoIsrayeli.

⁴ Ubusulala ngomhlubulo wakho wangasekhohlo, ngizabeka phezu kwakho isono sikaIsrayeli; uzathwala isono sabo insuku zonke zokulala kwakho ngalowomhlubulo.

⁵ Usuku olulodwa luzamela umnyaka wokona kwabo, ngimisile ukuba ukuthwale insuku ezilikhulu lamatshumi aficamunwemunye. Ngokunjaloke uzathwala ukona kwakoIsrayeli.

⁶ Lapho usuziphelelisile lezonsuku, uzalala phansi ngokwesibili, kodwa ngomhlubulo wangakwesokunene, uthwale ukona kwakoJuda insuku ezingamatshumi amane; usuku olulodwa ngilumisele umnyaka.

⁷ Uzakhangela ngasekuvinjezelweni kweJerusalema, ingalo yakho yambuliwe, utshumayele ngawo umuzi.

⁸ Khangela, ngizakukubopha ngamagoda ukuze ungaphendukeli emhlubulweni omunye lomunye kuze kuphelele insuku zokuvinjezelwa kwakho.

⁹ Uthathe amabele lebhali lendumba lendlubu lonyawuthi lophoko, ukuhlanganise esitsheni sinye, wenze ngakho ukudla. Insuku olala ngazo ngomhlubulo wakho ezingamakhulu amathathu lezificamunwemunye uzakudla khona.

¹⁰ Uzalinganisa ukudla kwakho, udle amashekeli angamatshumi amabili ngelanga, ukudle ngesikhathi ngesikhathi.

¹¹ Amanzi akho okunatha lawo uwalinganise, unathe ingxenye yesithupha yehini, uwanathe ngesikhathi ngesikhathi.

¹² Ukudla kwakho uzakukudla kwenziwe njengezinkwa zebhali, ukupheke ngamalongwe abantu, ukuphekele lapho abantu bangakubona khona.

¹³ INkosi yathi: Ngokunjaloke abakoIsrayeli bazakudla ukudla okungcolileyo ezizweni engizakubaxotshela kizo.

¹⁴ Ngasengisithi: O Nkosi Nkulunkulu! Kangizanga ngingcoliswe. Kusukela ebutsheni bami kuze kube lamuhla kangizanga ngidle ingcuba lokubulewe zinyamazana, lenyama engcolileyo kayizanga ingene emlonyeni wami.

¹⁵ Yasisithi kimi: Khangela, ngikunika amalongwe enkomo endaweni yamalongwe abantu ukuba upheke ngawo ukudla kwakho.

¹⁶ Yathi futhi kimi: Ndoda, ngizanciphisa ukudla kwabo kwensuku zonke eJerusalema; abantu bazalinganisa ukudla abakudlayo benqineka, balinganise lamanzi abawanathayo benqineka.

¹⁷ Ukudla kwabo lamanzi abo kuzancipha, baze baphelelwe ngamandla lapho bebonana, baphele nya ngenxa yezono zabo.