UDutheronomi 9 - iBhayibhili Elingcwele 1978

INkosi izakuchitha izizwe zaseKanani

¹ Zwana, Israyeli; uzakuchapha iJordani lamuhla, ungene uthumbe ilizwe lezizwe ezinkulu lezilamandla kulawe, lemizi emikhulu ebiyelwe ngemithangala efika phezulu.

² Zona zingabantu abakhulu labade, amadodana amaAnaki owaziyo, uzwile kuthiwa: Ngubani ongema phambi kwamadodana kaAnaki?

³ Ngakhoke yazi lamuhla ukuthi yiNkosi uNkulunkulu wakho echapha ngaphambi kwakho enjengomlilo oqothulayo; yona izakubachitha, ibanqobe phambi kwakho; uzakubaxotsha, ubabhubhise masinyane, njengokukuthembisa kwayo.

⁴ Lapho iNkosi uNkulunkulu wakho isibaxotshile phambi kwakho, ungabokutsho enhliziyweni yakho ukuthi: Kungenxa yokulunga kwami okwenze iNkosi ingingenise elizweni leli ukulithumba. Kodwa kungenxa yobubi balezizizwe iNkosi ezixotsha phambi kwakho.

⁵ Kakusikho ngenxa yokulunga kwakho lobuqotho benhliziyo yakho ukuthi ungene elizweni lazo ukulithumba; kodwa kungenxa yobubi balezizizwe iNkosi uNkulunkulu wakho ezixotsha phambi kwakho, futhi lokuba iqinise ilizwi eyalifunga kubokhokho bakho oAbrahama loIsaka loJakobe.

⁶ Yazike ukuthi iNkosi uNkulunkulu wakho kayikuniki lelilizwe elihle ukuba libe ngelakho ngenxa yokulunga kwakho; ngoba uyisizwe esilenhliziyo elukhuni.

AbakoIsrayeli bayivukela iNkosi enkangala

⁷ Khumbulani, lingakhohlwa, ukuthi lathukuthelisa iNkosi uNkulunkulu wenu enkangala; layivukela kusukela osukwini elaphuma ngalo eGibithe laze lafika kulindawo.

⁸ LaseHorebe layithukuthelisa, yaze yafisa ukulichitha ngenxa yokuthukuthela kwayo okukhulu.

⁹ Sengikhwele entabeni ukwamukela amatshe esivumelwano iNkosi eyasenza lani, ngahlala entabeni insuku ezingamatshumi amane lobusuku obungamatshumi amane, ngingadli kudla, nginganathi manzi.

¹⁰ INkosi yanginika amatshe amabili alotshiwe ngomunwe kaNkulunkulu, okwakulotshwe kuwo wonke amazwi iNkosi eyayiwakhulume kini entabeni, iphakathi komlilo ngosuku lokuhlangana.

¹¹ Kwathi seziphelile insuku ezingamatshumi amane lobusuku obungamatshumi amane, iNkosi yangipha lawomatshe amabili, amatshe esivumelwano.

¹² Yasisithi kimi: Phangisa wehle lapha, ngoba abantu bakho owabakhupha eGibithe bonile, baphambukile masinya endleleni engabalaya yona, bazenzela isithombe esibunjiweyo.

¹³ INkosi yaphinda yathi kimi: Ngibonile ukuthi lababantu bangabantu abanhliziyo zilukhuni.

¹⁴ Ngiyekela ukuba ngibabhubhise, ngiqede ibizo labo emhlabeni; ngizakukwenza wena ube yisizwe esikhulu lesilamandla kulabo.

¹⁵ Ngasengiphenduka ngisehla entabeni, intaba yayivutha umlilo; ngangiphethe amatshe amabili esivumelwano.

¹⁶ Ngabona ukuthi lonile eNkosini uNkulunkulu wenu, lokuthi lizenzele ithole elibunjiweyo, liphambukile masinyane endleleni iNkosi eyayililayele.

¹⁷ Ngakhoke ngathatha amatshe amabili, ngawaphosela phansi, ngawabulala phambi kwamehlo enu.

¹⁸ Ngaziwisela phansi phambi kweNkosi njengakuqala, insuku ezingamatshumi amane lobusuku obungamatshumi amane, ngingadli kudla, nginathi manzi ngenxa yaso sonke isono senu elisenzileyo, lenza okubi emehlweni eNkosi, layithukuthelisa.

¹⁹ Ngoba ngangisesaba ukuthukuthela lolaka lwayo okwakuvutha ngenxa yenu yaze yafuna ukulibhubhisa; kodwa yangilalela langalesosikhathi.

²⁰ INkosi yamthukuthelela kakhulu uAroni yaze yathanda ukumbhubhisa; ngamkhulekela loAroni ngalesosikhathi.

²¹ Ngasengilithatha ithole, leyonto embi elaliyenzile, ngalitshisa ngomlilo, ngalichoboza, ngalichola laze laba yimpuphu; ngayiphosela leyompuphu esifuleni esasisehla entabeni.

²² Layithukuthelisa futhi iNkosi eTabera, laseMasa, laseKiribothi‐Hathava.

²³ Kwathi lalapho iNkosi elithuma lisuka eKadeshi‐Barneya isithi: Hambani, lithumbe ilizwe engilinike lona; lahlamuka emlayweni weNkosi uNkulunkulu wenu, kaliyikholwanga, kalilalelanga lelizwi layo.

²⁴ Liyivukele iNkosi kusukela osukwini engaliqabuka ngalo.

²⁵ Ngaziwisela phansi phambi kweNkosi kulezonsuku ezingamatshumi amane lobusuku obungamatshumi amane, ngoba iNkosi yathi izakulichitha.

²⁶ Ngakhuleka eNkosini ngathi: Nkosi Nkulunkulu, ungabachithi abantu bakho abayisizwe sakho obakhulule ngobukhulu bakho, wabakhupha eGibithe ngesandla esilamandla.

²⁷ Khumbula inceku zakho oAbrahama loIsaka loJakobe, ungakhangeli inkani yalababantu lobubi babo lesono sabo,

²⁸ funa abantu balelolizwe owasikhupha kilo bathi: Kungenxa yokuba iNkosi yehluleka ukubangenisa elizweni eyabathembisa lona, langenxa yokuba ibazonda, yabakhupha ukuba ibabulalele enkangala.

²⁹ Ngoba bangabantu bakho abayisizwe sakho, owabakhupha ngamandla akho amakhulu langengalo yakho elamandla.