UDutheronomi 5 - iBhayibhili Elingcwele 1978

Imithetho elitshumi

¹ UMose wasebiza wonke uIsrayeli, wathi kuye: Zwana, Israyeli, izimiso lezahlulelo engizikhuluma endlebeni zakho lamuhla, ukuba uzifunde, unanzelele ukuzigcina.

² INkosi uNkulunkulu wethu yenza isivumelwano lathi eHorebe.

³ INkosi kayisenzanga lesisivumelwano labokhokho, kodwa lathi thina sonke esikhona, esikhona lapha lamuhla.

⁴ INkosi yakhuluma lani ikhangelene lani entabeni, isemlilweni;

⁵ mina ngema phakathi kweNkosi lani ngalesosikhathi, ukuba ngilazise ilizwi leNkosi; ngoba lesaba ngenxa yomlilo, kalikhwelanga entabeni. Yona yathi:

⁶ NgiyiNkosi uNkulunkulu wakho, eyakukhupha eGibithe, endaweni yobugqili.

⁷ Ungabi labanye onkulunkulu ngaphandle kwami.

⁸ Ungazenzeli izithombe ezibaziweyo lomfanekiso walokho okusezulwini lalokho okusemhlabeni lalokho okusemanzini angaphansi komhlaba.

⁹ Ungazikhothameli, ungazikhonzi; ngoba mina iNkosi uNkulunkulu wakho nginguNkulunkulu olomona, ngehlisela ububi baboyise ebantwaneni besizukulwana sesithathu lesesine sabangizondayo,

¹⁰ ngibe lothando olungapheliyo ezizukulwaneni eziyinkulungwane zabangithandayo abagcina imilayo yami.

¹¹ Ungalisebenzisi ngeze ibizo leNkosi uNkulunkulu wakho; ngoba olisebenzisa ngeze ibizo layo uzakuba lecala eNkosini.

¹² Gcina usuku lweSabatha, ulwenze lube ngcwele, njengokukulaya kwayo iNkosi uNkulunkulu wakho.

¹³ Uzasebenza insuku eziyisithupha, uwenze wonke umsebenzi wakho;

¹⁴ kodwa usuku lwesikhombisa luliSabatha leNkosi uNkulunkulu wakho; ungasebenzi ngalo wena lendodana yakho lendodakazi yakho lenceku yakho lencekukazi yakho lenkabi yakho lobabhemi wakho lezinkomo zakho, lowemzini osemzini wakho, ukuba inceku lencekukazi zakho ziphumule njengawe.

¹⁵ Ukhumbule ukuthi wawuyinceku elizweni laseGibithe, lokuthi iNkosi uNkulunkulu wakho yakukhupha khona ngesandla esilamandla langengalo elamandla. Ngakhoke iNkosi uNkulunkulu wakho yakulaya ukuba ugcine usuku lweSabatha.

¹⁶ Hlonipha uyihlo lonyoko, njengokukulaya kweNkosi uNkulunkulu wakho, ukuba uphile isikhathi eside, lokuba kukulungele elizweni iNkosi uNkulunkulu wakho ekunika lona.

¹⁷ Ungabulali.

¹⁸ Ungafebi.

¹⁹ Ungebi.

²⁰ Ungafakazi amanga ngomakhelwane wakho.

²¹ Ungahawukeli umfazi kamakhelwane; ungafisi indlu kamakhelwane lensimu yakhe lenceku yakhe lencekukazi yakhe lenkabi yakhe lobabhemi wakhe lokunye okwakhe.

Ukwesaba kwabantu

²² Amazwi la iNkosi yawakhuluma ngelizwi elikhulu emhlanganweni wenu entabeni iphakathi komlilo leyezi lomnyama omkhulu; kayengezelelanga lutho kuwo. Yawaloba ematsheni amabili, yanginika wona.

²³ Kwathi lilizwa ilizwi elivela phakathi komnyama, lentaba ivutha umlilo, lasondela kimi lina lonke zinhloko zezizwe lani lonke balisa,

²⁴ lathi: Khangelani, iNkosi uNkulunkulu wethu isitshengisile inkazimulo yayo lobukhulu bayo, salizwa lelizwi layo livela phakathi komlilo; lamhla sibonile ukuthi umuntu angakhuluma loNkulunkulu aphile.

²⁵ Ngakhoke sizafelani na? Ngoba lumlilo omkhulu uzasiqothula. Uba siphinda silizwa ilizwi leNkosi futhi, sizakufa.

²⁶ Ngoba ngubani ebantwini bonke owezwa ilizwi likaNkulunkulu ophilayo likhuluma livela emlilweni, njengalokhu silizwile thina, waphila na?

²⁷ Sondela wena, uzwe konke iNkosi uNkulunkulu wethu ezakukutsho, usitshele konke ekutshiloyo kuwe, ukuba sikuzwe, sizakukwenza.

²⁸ INkosi isiwezwile amazwi enu eliwakhulume kimi, yathi: Ngizwile amazwi alababantu abawakhulume kuwe; lokho abakukhulumileyo kuhle.

²⁹ Kungathi bangaba lenhliziyo enjalo insuku zonke, ukuba bangesabe, bagcine yonke imilayo yami, ukuze kubalungele bona labantwana babo kuze kube nininini!

³⁰ Hamba uyekuthi kibo: Buyelani emathenteni enu.

³¹ Kodwa wena, mana lapha phansi kwami, ngizakutshela yonke imithetho lezimiso lezahlulelo ozakubafundisa zona, ukuze bazenze elizweni engibanika lona libe ngelabo.

³² Ngakhoke qaphelani ukuba lenze njengokulilaya kwayo iNkosi uNkulunkulu wenu; lingaphambukeli ngakwesokunene langakwesokhohlo.

³³ Lizakuhamba endleleni yonke iNkosi uNkulunkulu wenu elilaye yona, ukuba liphile, kulilungele, lihlale isikhathi eside elizweni elizakuba ngelenu.