UDutheronomi 31 - iBhayibhili Elingcwele 1978

UJoshuwa uzathatha isikhundla sikaMose

¹ UMose waqhubeka wakhuluma lamazwi kubo bonke abakoIsrayeli,

² wathi kubo: Ngileminyaka elikhulu lamatshumi amabili lamhlanje; kangiselamandla okuhamba. INkosi yathi kimi: Kawuyikuliwela iJordani leli.

³ INkosi uNkulunkulu wenu uqobo izakuchapha phambi kwenu, ichithe lezizizwe phambi kwenu ukuba lizinqobe; uJoshuwa uzakulihola ekuchapheni kwenu njengokutsho kweNkosi.

⁴ INkosi izakwenza kuzo lokho eyakwenza kuSihoni loOgi, amakhosi amaAmori, laselizweni lawo, izakuzichitha.

⁵ INkosi izakuzinikela kini, lenze kuzo njengokulilaya kwami konke.

⁶ Qinani, lime isibindi, lingazesabi, lingatshaywa luvalo ngenxa yazo; ngoba yona iNkosi uNkulunkulu wenu ihamba lani; kayiyikulilahla, kayiyikulitshiya.

⁷ UMose wasebiza uJoshuwa, wathi kuye phambi kwabo bonke abakoIsrayeli: Qina, ume isibindi; ngoba nguwe ozahamba lalababantu ukuya elizweni iNkosi eyafunga ukubanika lona okhokho babo; uzabangenisa kulo ukuba balithumbe.

⁸ INkosi uqobo ihamba phambi kwenu; izakuba lani, ingalilahli, ingalitshiyi; lingesabi, lingakhathazeki.

Umlayo uzabalwa ekupheleni kweminyaka eyisikhombisa njalo

⁹ UMose wasewuloba lumlayo, wawunika abapristi, amadodana kaLevi, ababethwala umtshokotsho wesivumelwano seNkosi, kanye labo bonke abalisa bakoIsrayeli.

¹⁰ UMose wabalaya wathi: Ekupheleni kwayo yonke iminyaka eyisikhombisa, ngesikhathi esimisiweyo somnyaka wokuyekela imilandu, emkhosini wamadumba,

¹¹ lapho bonke abakoIsrayeli sebebuthene ukubonakala phambi kweNkosi uNkulunkulu wenu endaweni ezakuyikhetha, liwubale lumlayo phambi kwabo bonke abakoIsrayeli ukuba bawuzwe.

¹² Buthanisani abantu, abesilisa labesifazana labantwana, labemzini abahlala emizini yenu, ukuba bawuzwe, bafunde ukuyesaba iNkosi uNkulunkulu wenu, bagcine kuhle wonke amazwi alumlayo.

¹³ Labantwana babo abangawaziyo labo bazakuwuzwa, bafunde ukuyesaba iNkosi uNkulunkulu wenu, ngaso sonke isikhathi sokuhlala kwenu elizweni elichapha iJordani ukulithumba.

Imilayezo yokucina yeNkosi kuMose

¹⁴ INkosi yathi kuMose: Usuku lokufa kwakho selusondele; mbize uJoshuwa, lime lobabili ethenteni lokuhlangana ukuba ngimlayeze. UMose loJoshuwa bahambake, bema ethenteni lokuhlangana.

¹⁵ INkosi yabonakala ethenteni ngensika yeyezi; insika yeyezi yema ngasemnyango wethente.

¹⁶ INkosi yathi kuMose: Usuzakubhubha njengokhokho bakho; lababantu lapho sebefikile elizweni abaya kulo, bahlala labezizwe, bazakhonza onkulunkulu bazo, bangitshiye, basaphule isivumelwano sami engisenze labo.

¹⁷ Intukuthelo yami izakubavuthela ngalolosuku, ngibatshiye, ngibafihlele ubuso bami, bazachitheka behlelwe ngokubi okunengi lezinhlupheko ezinengi, baze bathi ngalolosuku: Angithi okubi lokhu kusehlele ngoba uNkulunkulu wethu kakho phakathi kwethu na?

¹⁸ Impela ngizafihla ubuso bami ngalolosuku ngenxa yobubi bonke ababenzileyo, lokhu bephendukele kwabanye onkulunkulu.

¹⁹ Ngakhoke lobani lingoma, liyifundise abantu bakoIsrayeli; bayitsho ukuba ibe yibufakazi ngabantu bakoIsrayeli.

²⁰ Ngoba lapho sengibangenisile elizweni eligcwele uchago lenyosi engafunga ukubanika lona okhokho babo, sebedlile basutha, bazimuka, bazakuphendukela kwabanye onkulunkulu, babakhonze, bangidelele mina, baphule isivumelwano sami.

²¹ Nxa sebehlelwe ngokubi okunengi lenhlupheko ezinengi, lingoma izakuba yibufakazi phambi kwabo; ngoba kayiyikukhohlakala emilonyeni yenzalo yabo. Ngiyawazi amacebo asebewenza khathesi, ngingakabangenisi elizweni engathembisa ukubanika lona.

²² UMose waseloba lingoma ngalona lolosuku, wabafundisa yona abantu bakoIsrayeli.

²³ INkosi yasilaya uJoshuwa indodana kaNuni yathi: Qina, ume isibindi, ngoba uzakubangenisa abantu bakoIsrayeli elizweni engathembisa ukubanika lona; ngizakuba lawe.

²⁴ UMose eseqedile ukuloba amazwi alumlayo ogwalweni, kusukela ekuqaleni kwaze kwaba sekucineni,

²⁵ walaya amaLevi ayethwala umtshokotsho wesivumelwano seNkosi wathi:

²⁶ Thathani lolugwalo lomlayo, lilubeke ngaseceleni komtshokotsho wesivumelwano seNkosi uNkulunkulu wenu, ukuba luhlale khona, lube yibufakazi ngabantu.

²⁷ Ngoba ngiyazi ukuthi lingabaxhwalayo, lenhliziyo zenu zilukhuni; lanxa ngisekhona beliyihlamuka iNkosi; pho, lizahlamuka kangakanani lapho sengifile na?

²⁸ Buthanisani kimi bonke abalisa bezizwe zenu lezinduna zenu ukuba ngikhulume amazwi la kibo, ngibize izulu lomhlaba ukufakaza ngabo.

²⁹ Ngoba ngiyazi ukuthi emva kokufa kwami lizakona, liphambuke endleleni engililaye yona; lizakwehlelwa ngokubi ngensuku ezizayo, ngoba lizakwenza okubi emehlweni eNkosi, liyithukuthelise ngomsebenzi wezandla zenu.

Ingoma kaMose

³⁰ UMose wasekhuluma wonke amazwi alingoma phambi komhlangano wonke kaIsrayeli, wathi: