UDutheronomi 26 - iBhayibhili Elingcwele 1978

Izithelo zokuqala

¹ Kuzakuthi lapho usufikile elizweni iNkosi uNkulunkulu wakho ekunika lona ukuba libe ngelakho, usuwakhile kulo,

² uthathe ingxenye yezithelo zonke zokuqala zomhlaba ozakuzivuna elizweni lakho iNkosi uNkulunkulu wakho ekunika lona, uyifake esitsheni, uye endaweni iNkosi uNkulunkulu wakho ezakuyikhetha ukuba idunyiselwe kiyo.

³ Uzakuya kumpristi ozakuba ekhona ngalesosikhathi uthi kuye: Ngiyabika eNkosini uNkulunkulu wakho lamuhla ukuthi sengifikile elizweni iNkosi eyafunga kubokhokho bethu ukusinika lona.

⁴ Umpristi uzakwamukela isitsha esandleni sakho, asibeke phambi kwealtare leNkosi uNkulunkulu wakho.

⁵ Wena uzakutsho phambi kweNkosi uNkulunkulu wakho uthi: Ubaba wayengumAramu ozulayo, wehlela eGibithe, wahlala khona labantu abalutshwana; lapho waba yisizwe esikhulu esilamandla, esilabantu abanengi.

⁶ AmaGibithe asiphatha kubi, asihlupha, asiphatha ngobugqili obunzima.

⁷ Sasesikhala eNkosini uNkulunkulu wabokhokho; yalizwa ilizwi lethu, yabona ukuhlupheka kwethu, lokutshikatshika kwethu, lokucindezelwa kwethu;

⁸ yasikhupha eGibithe ngesandla esilamandla lengalo elamandla, langezenzo ezesabekayo, langezibonakaliso lezimangaliso;

⁹ yasiletha kulindawo, yasinika lelilizwe eligcwele uchago lenyosi.

¹⁰ Khathesi ngiyaletha izithelo zokuqala zomhlaba onginike wona, Nkosi. Uzasibeka phansi isitsha phambi kweNkosi uNkulunkulu wakho, uyidumise;

¹¹ uthokoze ngakho konke okuhle iNkosi uNkulunkulu wakho ekunike khona wena labendlu yakho, uthabe kanye lomLevi lowemzini ohlala lawe.

Okwetshumi

¹² Lapho usuqedile ukunika okwetshumi kwezithelo zakho ngomnyaka wesithathu, ongumnyaka wokunika okwetshumi, usukunike umLevi lowemzini lentandane lomfelwakazi ukuba badle basuthe emizini yakho,

¹³ uzakuthi phambi kweNkosi uNkulunkulu wakho: Sengikhuphile endlini yami okwetshumi okwahlukaniselwa wena, ngakunika lowemzini lentandane lomfelwakazi njengayo yonke imilayo yakho ongitshele yona; kangiweqanga lowodwa umlayo wakho, futhi kangiyikuyikhohlwa.

¹⁴ Kangidlanga lokukodwa okwetshumi lapho bengilila, kangikuthathanga lapho bengingcolile, kangikunikelanga kofileyo; ngililalele ilizwi leNkosi uNkulunkulu wami, ngenzile njengokungilaya kwakho.

¹⁵ Khangela phansi usendaweni yakho engcwele esezulwini, ubusise abantu bakho uIsrayeli lomhlaba osinike wona, njengokufunga kwakho kubokhokho bethu, ilizwe eligcwele uchago lenyosi.

Abantu abangcwele beNkosi

¹⁶ Lamhla iNkosi uNkulunkulu wenu iyalilaya ukuba lenze lezizimiso lezahlulelo; ngakhoke zigcineni kuhle ngenhliziyo yenu yonke langomphefumulo wenu wonke.

¹⁷ Lamhla livumile ukuthi iNkosi inguNkulunkulu wenu, lokuthi lizakuhamba endleleni zayo, ligcine izimiso zayo lemilayo yayo lezahlulelo zayo, lilalele ilizwi layo.

¹⁸ Futhi iNkosi ilamukele lamhla ukuthi lina lingabantu abaligugu layo njengokulithembisa kwayo, lokuthi lifanele ukugcina yonke imilayo yayo,

¹⁹ ukuba iliphakamise phezu kwezizwe zonke ezenzileyo ngokubongwa, langodumo langokudunyiswa, libe ngabantu abangcwele eNkosini uNkulunkulu wenu njengokutsho kwayo.