UDutheronomi 20 - iBhayibhili Elingcwele 1978

Imithetho yempi

¹ Lapho liphuma impi ukuyahlasela izitha zenu, beselibona amabhiza lezinqola, labantu abanengi kulani, lingabesabi; ngoba iNkosi uNkulunkulu wenu eyalikhupha eGibithe ilani.

² Nxa selizakuhlasela, umpristi keze akhulume labantu, athi kubo:

³ Zwana, Israyeli! Selisondela empini lamhla ukuhlasela izitha zenu; inhliziyo yenu kayingapheli amandla; lingesabi, lingathuthumeli, lingatshaywa luvalo ngabo;

⁴ ngoba iNkosi uNkulunkulu wenu ihamba lani ukuba ililwele ezitheni zenu, ilikhulule.

⁵ Izinduna zizakhuluma labantu zithi: Ngubani owakhe indlu entsha ongazanga ayibuyise na? Kabuyele endlini yakhe, funa afele empini, omunye umuntu ayibusise.

⁶ Ngubani ohlanyele isivini, ongazanga adle izithelo zaso na? Kabuyele endlini yakhe, funa afele empini, omunye umuntu adle izithelo zaso.

⁷ Ngubani olobole umfazi, kaze amthatha na? Kabuyele endlini yakhe, funa afele empini, omunye umuntu amthathe.

⁸ Izinduna zizakhuluma futhi labantu, zithi: Ngubani owesabayo ophelelwe ngamandla na? Kabuyele endlini yakhe, funa inhliziyo zabangane bakhe ziphelelwe ngamandla njengenhliziyo yakhe.

⁹ Kuzakuthi lapho izinduna seziqedile ukukhuluma labantu, kukhethwe izinduna zempi ezizakubahola abantu.

¹⁰ Ekusondeleni kwenu emzini ukuwuhlasela, khulumani amazwi okuthula kuwo.

¹¹ Uba uliphendula ngamazwi okuthula, ulivulela amasongo awo, bonke abantu abafunyanwa kuwo bazakuba yizibhalwa, balisebenzele.

¹² Kodwa uba usala ukuzwa amazwi enu okuthula, ulihlasela, lizawuvimbezela.

¹³ Nxa iNkosi uNkulunkulu wenu iwunikela ezandleni zenu, lizabulala bonke abesilisa bakhona ngomkhonto;

¹⁴ kodwa abesifazana labantwana, izinkomo, lezinto zonke ezisemzini, lizakukuthatha kube yimpango yenu; lizithokozise ngempango yezitha zenu iNkosi uNkulunkulu wenu elinike yona.

¹⁵ Lizakwenza njalo kuyo yonke imizi ekhatshana kakhulu lani, engesiyo imizi yezizwe eziseduze.

¹⁶ Kodwa emizini yalababantu iNkosi uNkulunkulu wenu elinika yona ukuba ngeyenu, kaliyikutshiya lutho oluphilayo;

¹⁷ kodwa lizaqeda du amaHethi lamaAmori lamaKanani lamaPerizi lamaHivi lamaJebusi, njengokulilaya kwayo iNkosi,

¹⁸ ukuba bangalifundisi ukwenza imikhuba yabo enengekayo, abayenza ekukhonzeni kwabo onkulunkulu babo, lone eNkosini uNkulunkulu wenu.

¹⁹ Lapho livimbezela umuzi isikhathi eside, lisilwa lawo ukuba liwunqobe, lingagamuli izihlahla zawo ngehloka; lingadla okwazo, kodwa lingazigamuli. Izihlahla ezisegangeni zingabantu yini ukuba lizivimbezele na?

²⁰ Izihlahla elizaziyo ukuthi kazidliwa, yilezo kuphela elingazigamula ukuba lakhe ngazo inqaba zokuvimbezela umuzi olwa lani, uze uwe.