UDutheronomi 2 - iBhayibhili Elingcwele 1978

Inkulumo kaMose isaqhubeka

¹ Sasesiphenduka, saqonda enkangala ngendlela eya oLwandle oluBomvu, njengokutsho kweNkosi kimi; sazula entabeni yaseSeyiri insuku ezinengi.

² INkosi yasikhuluma kimi isithi:

³ Sekuyisikhathi eside lizula entabeni lezi; phendukani, liye ngasenyakatho.

⁴ Balaye abantu uthi: Selizakudabula ilizwe lezihlobo zenu, abantwana bakaEsawu abakhileyo eSeyiri. Bazakulesaba, ngakho linanzelele,

⁵ ukuba lingalwi labo; kangisoze ngilinike ilizwe labo, atshi bo! ngitsho lendawo elingana lonyawo nje, ngoba ngimnikile uEsawu intaba zaseSeyiri zibe ngezakhe.

⁶ Lizakuthenga ukudla kubo ukuba lidle, lithenge kubo lamanzi ukuba linathe.

⁷ Ngoba iNkosi uNkulunkulu wenu ilibusisile emsebenzini wonke wezandla zenu; ililondolozile ekuhambeni kwenu kulinkangala enkulu. INkosi uNkulunkulu wenu ibe lani liminyaka engamatshumi amane, kaliswelanga lutho.

⁸ Ngakhoke saqhubeka, sadlula izihlobo zethu, abantwana bakaEsawu abakhileyo eSeyiri, satshiya indlela yaseAraba esuka eElathi leEziyoni‐Geberi. Saphenduka, sahamba ngendlela eya enkangala yaseMowabi.

⁹ INkosi yasisithi kimi: Ungabakhathazi abaseMowabi, ungalwi labo; ngoba kangisoze ngikunike ilizwe labo libe ngelakho, ngoba ngibanikile abantwana bakaLoti iAri ibe yindawo yabo.

¹⁰ — Kwakuhlala khona endulo amaEmi, abantu abanengi, abakhulu, labade njengamaAnaki;

¹¹ njengamaAnaki laba kwakuthiwa ngamaRefa, kodwa abaseMowabi bababiza ngokuthi ngamaEmi.

¹² LamaHori ayehlala eSeyiri endulo, kodwa abantwana bakaEsawu bawaxotsha, bawachitha phambi kwabo, bakha endaweni yawo, njengokwenza kukaIsrayeli elizweni lakubo elaliyilifa abalinikwa yiNkosi. —

¹³ Sukanike, liwele umfula iZeredi. Ngakhoke sawela umfula iZeredi.

¹⁴ Kwasekudlule iminyaka engamatshumi amathathu lesificaminwembili kusukela ekusukeni kwethu eKadeshi‐Barneya kuze kube sekuweleni kwethu umfula iZeredi, kwaze kwaphela sonke isizukulwana samadoda empi ezihonqweni, njengokufunga kweNkosi kuwo.

¹⁵ Ngoba impela isandla seNkosi sasimelene lawo, sawachitha ezihonqweni, aze aphela.

¹⁶ Kwathi esefile amadoda empi wonke phakathi kwabantu,

¹⁷ iNkosi yathi kimi:

¹⁸ Lamhlanje uzakweqa umkhawulo waseMowabi eAri,

¹⁹ lapho usufikile elizweni labantwana bakaAmoni, ungabakhathazi, ungalwi labo, ngoba kangisoze ngikunike ilizwe labo ukuba libe ngelakho, ngoba ngibanikile lona abantwana bakaLoti.

²⁰ — Lalelo kuthiwa yilizwe lamaRefa, ngoba wona ayehlala khona endulo, kodwa abaseAmoni bawabiza ngokuthi ngamaZamuzumu;

²¹ ayengabantu abanengi, abakhulu, labade njengamaAnaki; kodwa iNkosi yawachitha phambi kwabo, labantwana bakaAmoni bawaxotsha, bakha endaweni yawo,

²² njengalokho eyakwenzela abantwana bakaEsawu abakhileyo eSeyiri, yawachitha amaHori phambi kwabo, bawaxotsha, bakha endaweni yawo kuze kube lamuhla.

²³ LamaAvi lawo, ayehlala emizaneni eyayiseduze leGaza, anqotshwa ngamaKafitori avela eKafitori, akha endaweni yawo. —

²⁴ Sukanike, lihambe lichaphe umfula iArinoni. Khangelani, nginikele ezandleni zenu uSihoni umAmori, inkosi yaseHeshiboni, kanye lelizwe lakhe; qalani ukulinqoba ilizwe, lilwe laye.

²⁵ Kusukela lamhla ngizakwenza abantu bonke abangaphansi komthunzi welanga batshaywe luvalo, balesabe, lokuthi lapho besizwa ngani bathuthumele, baqhaqhazele ngenxa yenu.

²⁶ Ngasengithuma izigijimi kuSihoni inkosi yaseHeshiboni, zisuka enkangala yaseKedemothi, zilamazwi okuthula, ngathi:

²⁷ Akungivumele ukuba ngidabule phakathi kwelizwe lakho; ngizahamba ngomgwaqo, ngingaphambukeli ngakwesokunene loba ngakwesokhohlo.

²⁸ Uzakungithengisela ukudla ukuba ngidle, ungithengisele lamanzi ukuba nginathe; ungivumele ukuba ngidlule nje kuphela,

²⁹ njengalokhu benza njalo abantwana bakaEsawu abakhileyo eSeyiri labaseMowabi abakhileyo eAri, ngizachapha iJordani, ngingene elizweni esinike lona iNkosi uNkulunkulu wethu.

³⁰ Kodwa uSihoni inkosi yaseHeshiboni kayisivumelanga ukuba sidlule; ngoba iNkosi uNkulunkulu wenu yenza umoya wakhe waba lukhuni, lenhliziyo yakhe yaba lenkani, ukuze imnikele ezandleni zenu njengalamhlanje.

³¹ INkosi yathi kimi: Khangela, lamhla sengiqalile ukunikela uSihoni lelizwe lakhe kuwe; qala ukuhlasela, ukuba ilizwe lakhe libe ngelakho.

³² Kwasekuphuma uSihoni labantu bakhe bonke ukusihlasela eJahazi.

³³ INkosi uNkulunkulu wethu yamnikela kithi: samnqoba yena lamadodana akhe labantu bakhe.

³⁴ Ngalesosikhathi sathumba yonke imizi yakhe, sayichitha yonke, sabulala abesilisa labesifazana labantwana; kasitshiyanga muntu;

³⁵ sathumba inkomo kuphela, zaba yimpango yethu; saphanga lemizi esayinqobayo.

³⁶ Kusukela eAroweri eliseduze lesihotsha saseArinoni, lasemzini osesihotsheni, kuze kube seGileyadi kwakungekho muzi owasahlula ngenxa yokuphakama kwawo. INkosi uNkulunkulu wethu yayinikela yonke ezandleni zethu.

³⁷ Kodwa kasisondelanga elizweni labantwana bakaAmoni, lasezinkunjini zomfula iJaboki, lasemizini yasezintabeni, lalapho iNkosi uNkulunkulu wethu eyasinqabela khona.