UDutheronomi 12 - iBhayibhili Elingcwele 1978

Ukukhonza iNkosi kumele kube sendaweni eyodwa

¹ Lezi ziyizimiso lezahlulelo elizakuzigcina elizweni iNkosi, uNkulunkulu wabokhokho benu, elinike lina ukuba libe ngelenu zonke insuku zokuhamba kwenu emhlabeni.

² Impela lizakudiliza zonke indawo lapho izizwe elizakuzinqoba zazikhonzela khona onkulunkulu bazo, ezintabeni eziphakemeyo lasemaqaqeni langaphansi kwezihlahla zonke eziluhlaza;

³ lizadiliza ama‐altare azo, libulale insika zazo zokukhonzela, litshise insika zazo ezimiselwe unkulunkulukazi uAshera ngomlilo, libulale izithombe ezibaziweyo zabonkulunkulu bazo, licime ibizo lazo kuleyondawo.

⁴ Lingazilingisi ekuyidumiseni iNkosi uNkulunkulu wenu;

⁵ kodwa lizadinga iNkosi uNkulunkulu wenu endaweni ezakuyikhetha phakathi kwazo zonke izizwe zakini, ukuba idunyiswe khona ealtareni layo. Lizakuya khona,

⁶ lilethe iminikelo yenu yokutshiswa lemihlatshelo yenu, lokwetshumi kwempahla yenu, lomnikelo wokuphana kwenu, leminikelo yokugcwalisa izithembiso zenu, leminikelo yesihle, lamazibulo ezinkomo zenu lawezimvu zenu;

⁷ lidle khona phambi kweNkosi uNkulunkulu wenu, lithokoze lina labendlu zenu ngakho konke elikwenzayo, iNkosi uNkulunkulu wenu elibusise ngakho.

⁸ Kaliyikwenza njengokwenza kwethu konke esikwenzayo lamuhla, yilowo lalowo wenza okulungileyo emehlweni akhe;

⁹ ngoba kalikafiki endaweni yokuphumula, elizweni elinika lona iNkosi uNkulunkulu wenu.

¹⁰ Kodwa lapho selichaphile iJordani, selihlezi elizweni iNkosi uNkulunkulu wenu elinika lona libe ngelenu, isiliphumuzile ezitheni zenu zonke inxa zonke, lihlale livikelekile,

¹¹ kung’khona lizakuya endaweni iNkosi uNkulunkulu wenu ezakuyikhetha ukuba idunyiselwe kiyo, liletha konke engililaya khona, iminikelo yenu yokutshiswa lemihlatshelo yenu, lokwetshumi kwempahla yenu, lomnikelo wokuphana kwenu, leminikelo yonke yokugcwalisa izithembiso zenu elizithembisa eNkosini.

¹² Lizakuthaba phambi kweNkosi uNkulunkulu wenu lina lamadodana enu lamadodakazi enu, lezinceku zenu lezincekukazi zenu, lamaLevi aphakathi kwemizi yenu ngoba engelasabelo selizwe phakathi kwenu.

¹³ Qaphelani ukuba linganikeli iminikelo yenu yokutshiswa endaweni zonke elizibonayo;

¹⁴ kodwa kuleyondawo iNkosi ezakuyikhetha kwesinye sezizwe zakini nikelani lapho iminikelo yenu yokutshiswa, lenze konke engililaya khona.

¹⁵ Kantike lingahlaba lidle inyama enengi phakathi kwayo yonke imizi yenu njengokufisa kwenu, lanjengesibusiso seNkosi uNkulunkulu wenu elinike sona; abangahlambulukanga labahlambulukileyo bangadla inyama yomziki leyempala.

¹⁶ Kodwa lingadli igazi; lichitheleni emhlabathini njengamanzi.

¹⁷ Lingadleli emizini yenu okwetshumi kwamabele enu lokwewayini lenu lokwamafutha enu, loba amazibulo ezinkomo zenu lawezimvu zenu, loba iminikelo yokugcwalisa izithembiso zenu elizithembisayo, loba iminikelo yenu yesihle, lomnikelo wokuphana kwenu;

¹⁸ kodwa lizakudlela lokho phambi kweNkosi uNkulunkulu wenu endaweni ezakuyikhetha, lina lamadodana enu lamadodakazi enu, inceku zenu lencekukazi zenu, lomLevi ophakathi kwemizi yenu, lithabe phambi kweNkosi uNkulunkulu wenu ngakho konke elikwenzayo.

¹⁹ Qaphelani ukuba lingamkhohlwa umLevi isikhathi sonke sokuhlala kwenu elizweni lakini.

²⁰ Lapho iNkosi uNkulunkulu wenu isandisa ilizwe lenu njengokulithembisa kwayo, beselikhanuka inyama, lithi: Sifisa ukudla inyama; lizakudla inyama enengi njengokufisa kwenu.

²¹ Uba indawo iNkosi uNkulunkulu wenu ezakuyikhetha ukuba ibizo layo lidunyiselwe kiyo ikhatshana lani, lingahlaba enkomeni zenu loba ezimvini zenu iNkosi elinike zona, njengokulilaya kwami, lidlele emizini yenu lize lisuthe.

²² Lingazidla sibili, njengalokhu kudliwa umziki lempala; abangahlambulukanga labahlambulukileyo bangadla.

²³ Kodwake nanzelelani ukuba lingadli igazi, ngoba igazi liyikuphila, kaliyikudla ukuphila kanye lenyama.

²⁴ Lingabokudla igazi, kodwa lichitheleni emhlabathini njengamanzi.

²⁵ Lingalidli ukuba kulilungele labantwana benu emva kwenu, lapho lisenza okulungileyo emehlweni eNkosi.

²⁶ Izinto ezingcwele elifanele ukuzinikela, leminikelo yokugcwalisa izithembiso zenu lizakuzithatha, liye endaweni ezakuyikhetha iNkosi,

²⁷ linikele iminikelo yenu yokutshiswa, inyama kanye legazi, ealtareni leNkosi uNkulunkulu wenu; igazi lemihlatshelo yenu lithululwe phezu kwealtare leNkosi uNkulunkulu wenu, kodwa inyama lingayidla.

²⁸ Qaphelani ukuba lilalele wonke amazwi la engililaya wona, ukuba kulilungele labantwana benu emva kwenu kokuphela, lapho lisenza okulungileyo lokuhle emehlweni eNkosi uNkulunkulu wenu.

Isixwayiso ngokukhonza abanye onkulunkulu

²⁹ Lapho iNkosi uNkulunkulu wenu ichitha izizwe phambi kwenu eliya kuzo ukuzinqoba, lalapho selizithumbile lahlala elizweni lazo,

³⁰ qaphelani ukuba lingakhohliswa lizilandele emva kokuchithwa kwazo ngaphambi kwenu, lokuba lingabuzi ngonkulunkulu bazo lithi: Izizwe lezi zazikhonza kanjani onkulunkulu bazo na? Lathi sizakwenza njalo.

³¹ Kaliyikwenza njalo eNkosini uNkulunkulu wenu; ngoba zonke izinto ezinengekayo eNkosini ezizondwa yiyo zizenzele onkulunkulu bazo; futhi zitshisela onkulunkulu bazo amadodana lamadodakazi azo ngomlilo.

³² Gcinani kuhle konke engililaya khona, lingengezeleli lutho kukho, futhi lingaphunguli lutho kukho.