UDutheronomi 10 - iBhayibhili Elingcwele 1978

Amatshe esibili awemithetho elitshumi

¹ Ngalesosikhathi iNkosi yathi kimi: Baza amatshe anjengawokuqala, wenze lomtshokotsho wezigodo, ubusukhwela uze kimi entabeni.

² Ngizakuloba ematsheni amazwi ayelotshwe ematsheni akuqala owabuleleyo, uwabeke emtshokotshweni.

³ Ngasengisenza umtshokotsho ngesihlahla somvagazi, ngabaza amatshe amabili anjengawokuqala, ngakhwela entabeni ngiphethe lawomatshe womabili.

⁴ INkosi yaloba ematsheni njengokuloba kwayo kwakuqala, yabhala imithetho elitshumi eyayikhuluma kini entabeni iphakathi komlilo ngosuku lokuhlangana; yanginika wona.

⁵ Ngasengiphenduka ngisehla entabeni, ngawafaka amatshe emtshokotshweni engangiwenzile; akhona lapho njengokungilaya kwayo iNkosi.

⁶ — AbakoIsrayeli basuka emithonjeni yaseBenejakani, bahamba bayafika eMosera; uAroni wafela lapho, wangcwatshwa khona; indodana yakhe uEleyazare waba ngumpristi esikhundleni sakhe.

⁷ Basuka lapho, baya eGudigoda; basuka eGudigoda, baya eJotibatha, ilizwe lezifula zamanzi.

⁸ Ngalesosikhathi iNkosi yazahlukanisela isizwe sakoLevi ukuba sithwale umtshokotsho wesivumelwano seNkosi, lokuba sime phambi kweNkosi, siyikhonze, sibusise ngebizo layo, kuze kube lamuhla.

⁹ Ngalokhu amaLevi kawalasabelo selizwe kanye labafowabo; iNkosi iyisabelo sawo, njengokutsho kweNkosi uNkulunkulu wenu kuwo. —

¹⁰ Ngahlala entabeni njengakuqala insuku ezingamatshumi amane lobusuku obungamatshumi amane; iNkosi yangilalela langalesosikhathi, kayithandanga ukulibhubhisa.

¹¹ INkosi yathi kimi: Suka, uhambe phambi kwabantu, bangene balithumbe ilizwe engafunga ukubanika lona okhokho babo.

Lokho iNkosi ekucela kuIsrayeli

¹² Khathesike, Israyeli, iNkosi uNkulunkulu wakho ifunani kuwe ngaphandle kokuba uyesabe iNkosi uNkulunkulu wakho, uhambe ngendlela zayo zonke, uyithande, uyikhonze ngenhliziyo yakho yonke langomphefumulo wakho wonke,

¹³ ugcine imilayo yayo lezimiso zayo engikulaya zona lamuhla, ukuba kukulungele na?

¹⁴ Iphezulu, lezulu eliphezulu kakhulu ngeleNkosi uNkulunkulu wakho, lomhlaba lakho konke okukuwo.

¹⁵ Kodwa iNkosi yabambelela kubokhokho benu, yabathanda, yakhetha inzalo yabo emva kwabo, ngitsho lina phakathi kwabo bonke abantu, njengalamhla.

¹⁶ Ukusoka kwenu kakube ngokwenhliziyo, lingabe lisaba lenhliziyo ezilukhuni.

¹⁷ Ngoba iNkosi uNkulunkulu wenu inguNkulunkulu wabonkulunkulu, leNkosi yamakhosi, uNkulunkulu omkhulu, olamandla, owesabekayo, ongakhethi muntu, ongamukeli umvuzo wokuthengwa.

¹⁸ Iyenzela ukwahlulela izintandane labafelwakazi, iyathanda abezizweni abahlala phakathi kwenu ibanike ukudla lezambatho.

¹⁹ Ngakhoke bathandeni abezizweni, ngoba lalingabezizweni eGibithe.

²⁰ Lizakuyesaba iNkosi uNkulunkulu wenu, liyikhonze, libambelele kuyo, lifunge ngebizo layo.

²¹ Yiyo eliyidumisayo, inguNkulunkulu wenu olenzele lezizinto ezinkulu lezesabekayo elizibonileyo.

²² Okhokho benu baya eGibithe bengabantu abangamatshumi ayisikhombisa; khathesi iNkosi uNkulunkulu wenu ilenzile laba ngangezinkanyezi zaphezulu.