UDanyeli 2 - iBhayibhili Elingcwele 1978

Iphupho likaNebukadineza

¹ Ngomnyaka wesibili wokubusa kwakhe uNebukadineza waphupha amaphupho, lomoya wakhe wakhathazeka waze waswela ubuthongo.

² Inkosi yasilaya ukuba kubizwe izanuse lezangoma labavumisayo lamaKaladiya ukuba bayichasisele amaphupho ayo. Bangenake, bema phambi kwayo.

³ Yathi kibo: Ngiphuphile, lomoya wami ukhathazekile ukuba ulazi iphupho.

⁴ AmaKaladiya athi enkosini ngesiAramu: Bayethe nkosi! Ake uzitshele inceku zakho iphupho, thina sizakutshela incazelo yalo.

⁵ Inkosi yathi kumaKaladiya: Engikutshoyo nanku; uba lingangitsheli iphupho lencazelo yalo, lizaqunywaqunywa iziqa, kudilizwe lemizi yenu.

⁶ Kodwa uba lingitshela iphupho lencazelo yalo, ngizalinika izipho lomvuzo lodumo olukhulu. Ngakhoke ngitshelani iphupho lencazelo yalo.

⁷ Baphendula okwesibili bathi: Inkosi ake itshele inceku zayo iphupho, lathi sizayitshela incazelo yalo.

⁸ Inkosi yaphendula yathi: Ngiyazi sibili ukuthi lizama ukuchitha isikhathi, ngoba liyabona ukuba ilizwi lami liqinisile,

⁹ ukuthi uba lingangitsheli iphupho, isigwebo senu sinye nje. Livumelene ukukhuluma amanga lamazwi amabi phambi kwami kuze kudlule izikhathi. Ngakhoke ngitshelani iphupho, lami ngizakwazi ukuthi sibili lingangitshela incazelo yalo.

¹⁰ AmaKaladiya ayiphendula inkosi athi: Kakukho muntu emhlabeni ongayitshela inkosi lokho ekufunayo; ngoba kayikho inkosi enkulu lombusi olamandla owake wabuza into enje esanuseni lesangomeni lakumaKaladiya.

¹¹ Into inkosi eyibuzayo ilukhuni, kakho loyedwa ongayitshela inkosi ngaphandle kwabonkulunkulu abangahlali labantu.

¹² Ngenxa yalokho inkosi yazonda, yathukuthela kakhulu, yalaya ukuba bonke abahlakaniphileyo baseBabiloni babulawe.

¹³ Kwasekuphuma isimemezelo sokuthi bonke abahlakaniphileyo kababulawe; basebedinga uDaniyeli labangane bakhe ukuba labo babulawe.

¹⁴ UDaniyeli wasehamba ngokunanzelela langokuqonda, waya kuAriyoki induna yabalindi benkosi owayephumile ukubulala abahlakaniphileyo baseBabiloni.

¹⁵ Wathi kuAriyoki induna yenkosi: Kungani sinzima kangaka isimemezelo senkosi na? UAriyoki wasemtshelake uDaniyeli indaba.

¹⁶ UDaniyeli wasengena, wayicela inkosi ukuba imnike isikhathi ukuba ayitshele incazelo yephupho.

¹⁷ UDaniyeli wasesiya endlini yakhe, wabatshela indaba oHananiya loMishayeli loAzariya abangane bakhe;

¹⁸ wabatshela ukuba bacele isihawu sikaNkulunkulu ophezulu ngalimfihlakalo, ukuze uDaniyeli kanye labangane bakhe bangabhujiswa kanye labo bonke abahlakaniphileyo baseBabiloni.

¹⁹ Imfihlakalo yambulelwa uDaniyeli embonweni ebusuku. UDaniyeli wasembonga uNkulunkulu ophezulu.

²⁰ UDaniyeli wathi: Kalibongwe ibizo likaNkulunkulu kuze kube nininini, ngoba ukuhlakanipha konke lamandla wonke kungokwakhe.

²¹ Uyaphendula izikhathi lezibanga, uyakhupha amakhosi, abeke amakhosi, anike abahlakaniphileyo ukuhlakanipha, lokwazi kulabo abalokuqedisisa.

²² Uyambula okuzikileyo lokufihlakeleyo, uyakwazi okusemnyameni, lokukhanya kuhlala laye.

²³ Ngiyakubonga ngikudumise, wena Nkulunkulu wabokhokho, ngoba unginikile ukuhlakanipha lamandla, usungazisile lokho esikucelileyo kuwe, ngoba usitshengisile indaba yenkosi.

²⁴ UDaniyeli wasesiya kuAriyoki owayemiswe yinkosi ukuba abulale abahlakaniphileyo baseBabiloni, wathi kuye: Ungababulali abahlakaniphileyo baseBabiloni; ngisa phambi kwenkosi, mina ngizayitshela inkosi incazelo.

²⁵ UAriyoki wasemusa uDaniyeli enkosini ngokuphangisa, wathi kuyo: Ngifumene kwabathunjiweyo bakoJuda ongayitshela inkosi incazelo.

²⁶ Inkosi yasisithi kuDaniyeli, obizo lakhe lalinguBeliteshazari: Wena ungangitshela yini iphupho engiliphuphileyo kanye lencazelo yalo na?

²⁷ UDaniyeli wayiphendula inkosi wathi: Imfihlakalo inkosi eyibuzayo, abahlakaniphileyo lezangoma lezanuse labafunda inkanyezi bangeyichasisele inkosi;

²⁸ kodwa ukhona uNkulunkulu ophezulu owambula izimfihlakalo, uyitshengisile inkosi uNebukadineza okuzakwenzeka ensukwini zokucina. Iphupho lakho lemibono eyafika engqondweni yakho ulele embhedeni yile;

²⁹ kuwe nkosi, usalele embhedeni kwafika imicabango yalokho okuzakwenzeka emva kwalokhu, lalowo owambula izimfihlakalo ukwazisile wena lokho okuzakwenzeka.

³⁰ Minake, kungesikho ukuthi ngihlakaniphile ukwedlula bonke abaphilayo ngiyambulelwe limfihlakalo, kodwa ukuze incazelo itshengiswe wena nkosi, ukuba wazi imicabango yengqondo yakho.

³¹ Wena nkosi, wabona isithombe esikhulu. Isithombe lesi sasisikhulu, sikhazimula, sema phambi kwakho, lesimo saso sasisesabeka.

³² Ikhanda laso lalenziwe ngegolide elihle, isifuba saso lengalo zaso kwenziwe ngesiliva, isisu saso lamathangazi aso kwenziwe ngethusi,

³³ imilenze yaso yenziwe ngensimbi, inyawo zaso zenziwe ngengxenye yensimbi lengxenye yebumba.

³⁴ Wasubona ilitshe liqephuka entabeni, kodwa lingaqetshulwa muntu, latshaya inyawo zesithombe ezenziwe ngensimbi lebumba, lazichoboza.

³⁵ Kwathi insimbi lebumba lethusi lesiliva legolide, konke kwaba yizicucu, kwafanana lomule lwesiza ehlobo. Kwaphetshulwa ngumoya, kwanyamalala, kakwaze kwasala lutho lwakho. Kodwa ilitshe elatshaya isithombe laba yintaba enkulu, lagcwalisa umhlaba wonke.

³⁶ Yilo lelo iphupho; sesizakuyitshela inkosi incazelo yalo.

³⁷ Wenake, nkosi, uyinkosi yamakhosi enikwe umbuso nguNkulunkulu ophezulu lamandla lodumo lobukhosi,

³⁸ okunikelwe esandleni sakho endaweni zonke abantu lenyamazana zeganga lenyoni zaphezulu, wenziwa waba ngumbusi wazo zonke; wena ulikhanda elenziwe ngegolide.

³⁹ Emva kwakho kuzavela omunye umbuso omncinyane kulowakho, kuvele lomunye owesithathu owethusi ozabusa umhlaba wonke.

⁴⁰ Kuzakuba khona umbuso wesine oqinileyo njengensimbi; ngoba njengoba insimbi ichoboza ibulale zonke izinto lawo uzachoboza, ubulale yonke imibuso yakuqala!

⁴¹ Njengoba wabona inyawo lamazwane enziwe ngengxenye yebumba lombumbi lengxenye yensimbi, uzakuba ngumbuso odabukileyo phakathi. Kodwa ingxenye yawo izakwenziwa njengensimbi njengoba wabona insimbi ihlanganiswe lebumba elibuthakathaka.

⁴² Njengoba amazwane enyawo ayenziwe ngengxenye yensimbi lengxenye yebumba, ngakhoke lowombuso uzakuba lamandla nganxanye, ube buthakathaka nganxanye.

⁴³ Njengoba wabona insimbi ihlanganiswe lebumba elibuthakathaka, bazaxubana ngokuthathana; kodwa kabayikunamathelana njengoba insimbi ingahlangani lebumba.

⁴⁴ Ensukwini zalawomakhosi uNkulunkulu ophezulu uzamisa umbuso ongayikuchithwa, lobukhosi bawo kabuyikuthathwa ngabanye abantu. Uzachoboza yonke limibuso, uyiqede, ume njalo kuze kube nininini,

⁴⁵ njengoba wabona ilitshe liqephuka entabeni, lingaqetshulwa muntu, laphohloza insimbi lethusi lebumba lesiliva legolide. UNkulunkulu omkhulu uyazisile inkosi okuzakwenzeka emva kwalokho. Iphupho liqinisile, lencazelo yalo iliqiniso.

⁴⁶ Inkosi uNebukadineza yasisithi mbo ngobuso phansi, yakhuleka kuDaniyeli, yalaya ukuba kunikelwe kuye umnikelo lempepha.

⁴⁷ Inkosi yathi kuDaniyeli: Isibili uNkulunkulu wakho unguNkulunkulu wabonkulunkulu, leNkosi yamakhosi, lomambuli wezimfihlakalo, ngoba uyambule limfihlakalo.

⁴⁸ Inkosi yasimnika uDaniyeli udumo olukhulu leziphiwo ezinengi ezinkulu, yambeka umbusi welizwe lonke laseBabiloni lenduna enkulu yabo bonke abahlakaniphileyo baseBabiloni.

⁴⁹ UDaniyeli wasecela enkosini ukubeka oShadraki loMeshaki loAbedinego babe ngabaphathi belizwe laseBabiloni; kodwa yena uDaniyeli wahlala esigodlweni senkosi.