Izililo 5 - iBhayibhili Elingcwele 1978

Umkhuleko wokucela isihawu

¹ Khumbula, Nkosi, okusehleleyo, khangela ubone ihlazo lethu.

² Ilizwe lethu selinikwe abezizwe, lemizi yethu yanikwa abemzini.

³ Sesiyizintandane, kasilabo obaba, labomama sebenjengabafel wakazi.

⁴ Sihlawulela amanzi esiwanathayo, lenkuni siyazithenga.

⁵ Sifakwe ijogwe entanyeni sisetshenziswa kakhulu, sidiniwe, kasivunyelwa ukuphumula.

⁶ Sicela iGibithe, sicele iAsiriya, ukuzuza ukudla.

⁷ Obaba bafa, kabasekho, thina sithwele izono zabo.

⁸ Izigqili ziyasibusa, kakho ongasikhulula kuzo.

⁹ Sizuza ukudla kwethu ngokudela ukusila kwethu, ngenxa yengozi zasenkangala.

¹⁰ Isigogo sethu sitshisa njengomlilo, ngokutshisa kwendlala.

¹¹ Badlova abesifazana eZiyone, lezintombi emizini yakoJuda.

¹² Izikhulu ziphanyekwa ngezandla zazo, labadala kabahlonitshwa.

¹³ Amajaha asetshenziswa ngamandla ukuchola, labafana basindwa yiminyaba yenkuni.

¹⁴ Abadala sebatshiya inkundla, lensizwa zayekela ukuhlabela.

¹⁵ Ukuthokoza kwenhliziyo zethu kuphelile, lokugida kwethu kuphenduke ukukhala.

¹⁶ Umqhele uwile emakhanda ethu. Maye thina, ngoba sonile!

¹⁷ Ngenxa yalokhu inhliziyo zethu zidabukile, langalezizinto amehlo ethu afiphele,

¹⁸ ngoba intaba yaseZiyone isisele ize, ihanjwa ngamakhanka.

¹⁹ Kodwa wena, Nkosi, ubusa kuze kube nininini, lesihlalo sakho sobukhosi simi njalo ezizukulwaneni zonke.

²⁰ Usikhohlweleni kokuphela na? Usitshiyeleni isikhathi eside kangaka na?

²¹ Sibuyise kuwe, Nkosi, sizabuya. Yenza insuku zethu zibe zintsha njengasendulo.

²² Ngoba uba usilahlile kokuphela, kukhulu kakhulu ukusithukuthelela kwakho.