Izililo 3 - iBhayibhili Elingcwele 1978

UNkulunkulu uzakusiza ngenxa yesihawu sakhe

¹ Ngingumuntu obone ukuhlupheka ngentonga yolaka lweNkosi.

² Ingiqhubile yangingenisa emnyameni ongelakukhanya.

³ Impela ingiphendulele isandla sayo, iphinde futhifuthi usuku lonke.

⁴ Igugisile inyama yami lesigogo sami, yephula amathambo ami.

⁵ Ingihanqile yangembesa ngosizi langokuhlupheka.

⁶ Yangenza ngahlala emnyameni njengabakade bafa.

⁷ Ingibiyele ukuze ngingaphumi, yangibopha ngamaketane anzima.

⁸ Lanxa ngikhala ngicela ukusizwa, iyawala umkhuleko wami.

⁹ Iyivalile indlela yami ngamatshe abaziweyo. yaphambukisa izindlela zami.

¹⁰ Kimi injengebhere elicathemeyo, lanjengesilwane esicatshileyo.

¹¹ Ingiphambukisile endleleni yami, yangidabudabula, yangitshiya ngize.

¹² Igobisile idandili layo, yangibeka ngaba yinto yokunenjwa ngomtshoko wayo.

¹³ Ihlabile inhliziyo yami ngemitshoko yesamba sayo.

¹⁴ Sengiyinhlekisa kibo bonke abantu, into yokuhaywa zingoma zabo insuku zonke.

¹⁵ Ingehlisele ubuhlungu, yanginathisa umhlonyane.

¹⁶ Yaphule amazinyo ami ngokhethe, yangidlisa umlotha.

¹⁷ Umphefumulo wami uphelelwe yikuthula, sengikhohliwe ukuthi ukuthokoza kuyini.

¹⁸ Ngakho ngithi: Amandla ami aphelile, lethemba lami elivela eNkosini.

¹⁹ Nxa ngikhumbula ukuhlupheka kwami lobuhlungu bami, kubaba njengomhlonyane lenyongo.

²⁰ Umoya wami uhlala ukukukhumbula, kukhathazeke phakathi kwami.

²¹ Kodwa ngikhumbula lokhu ngibe lethemba,

²² ukuthi uthando olungapheliyo lweNkosi luhlala njalo, lesihawu sayo kasilakucina.

²³ Kutsha insuku zonke ekuseni, lokuthembeka kwayo kukhulu.

²⁴ Umoya wami uthi: INkosi iyisabelo sami, ngakho ngizathemba kiyo.

²⁵ INkosi ilungile kwabayithembayo, kulabo abayidingayo.

²⁶ Kuhle ukuyithemba, lokulindela ngokuthula ukukhulula kwayo.

²⁷ Kuhle emuntwini ukuba athwale ijogwe ebutsheni bakhe.

²⁸ Kahlale yedwa athule lapho esefakiwe lona,

²⁹ athi mbo ngobuso othulini; mhlawumbe kungaba khona ithemba.

³⁰ Kanikele isihlathi sakhe kwabamtshayayo asuthe inhlamba.

³¹ Ngoba iNkosi kayiyikumlahla umuntu kokuphela.

³² Lanxa isehlisa ubuhlungu, izakuba lesihawu ngobukhulu bothando lwayo olungapheliyo.

³³ Ngoba kayihluphi, idabukise abantu ngoba ikuthanda.

³⁴ Ukucindezela phansi zonke izibotshwa ezisemhlabeni,

³⁵ lokwamuka umuntu ilungelo lakhe phambi koPhezukonke,

³⁶ lokona umuntu endabeni yakhe, iNkosi kayikukuvuma lokho.

³⁷ Ngubani ongalawula, kwenzeke, nxa iNkosi ikwalile na?

³⁸ Kakuphumi okuhle lokubi emlonyeni woPhezukonke na?

³⁹ Usolelani umuntu ophilayo, umuntu otshayelwa izono zakhe na?

⁴⁰ Asilinge sihlole indlela zethu, sibuyele eNkosini.

⁴¹ Asiphakamisele inhliziyo zethu lezandla zethu kuNkulunkulu ezulwini.

⁴² Sithi: Siphambukile, sakuhlamuka, wena kawuthethelelanga.

⁴³ Wena uthukuthele, waxotshana lathi, wasibulala ungelasihawu.

⁴⁴ Wacatsha emayezini, ukuze imikhuleko yethu ingakufinyeleli.

⁴⁵ Usenze saba yimfucuza lezibi phakathi kwabantu.

⁴⁶ Zonke izitha zethu ziyasiklolodela.

⁴⁷ Phambi kwethu kukhona umjibila lomgodi, ukuchitheka lokufa.

⁴⁸ Amehlo ami agobhoza inyembezi ngenxa yokubhujiswa kwabantu bami.

⁴⁹ Inyembezi zami zizagobhoza zingapheli, ngingaduduzeki,

⁵⁰ ize ikhangele iNkosi ibone isezulwini;

⁵¹ amehlo ami asebuhlungu ngokukhalela izintombi zomuzi wakithi.

⁵² Abayizitha zami ngeze bangizingele njengenyoni;

⁵³ bangiphosela emgodini ngisizwa, bangigxoba ngamatshe;

⁵⁴ ngatshona emanzini ngathi: Ngafa.

⁵⁵ Ngakhuleka ebizweni lakho, Nkosi, ngiphakathi komgodi;

⁵⁶ wezwa umkhuleko wami wokuthi: Ungangivaleli indlebe zakho nxa ngicela ukusizwa.

⁵⁷ Wasondela kimi lapho ngikhuleka kuwe, wathi: Ungesabi.

⁵⁸ Nkosi, uyimele indaba yami, wahlenga ukuphila kwami.

⁵⁹ Nkosi, ukubonile ukoniwa kwami; akuthethe indaba yami.

⁶⁰ Ubonile ukuphindisela kwabo, lawo wonke amacebo abo ngami.

⁶¹ Uzwile ukungiklolodela kwabo, Nkosi, lawo wonke amacebo abo ngami.

⁶² Ukukhuluma lemicabango yezitha zami imelana lami usuku lonke.

⁶³ Ake ubone ukuthi lapho behlala loba besukuma bayangiklolodela kakhulu.

⁶⁴ Uzabaphindisela, Nkosi, ngokufanele izenzo zabo.

⁶⁵ Uzabanika inhliziyo ezilukhuni, lesiqalekiso sakho sibe phezu kwabo.

⁶⁶ Uxotshane labo ekuthukutheleni kwakho, ubabhubhise, bangabe besaba khona ngaphansi kwezulu lakho, Nkosi.