Izililo 2 - iBhayibhili Elingcwele 1978

Usizi lweJerusalema luvela eNkosini

¹ Yeka umnyama iNkosi ekuthukutheleni kwayo ewehlisele phezu kweZiyone. Iphosele ubuhle bukaIsrayeli emhlabeni busuka ezulwini; kayikhumbulanga ithempeli layo ngosuku lokuthukuthela kwayo.

² INkosi ichithile yonke imizi kaJakobe ingayihawukeli. Ekuthukutheleni kwayo idilizile izinqaba zakoJuda. Yaphosela phansi yangcolisa umbuso lamakhosi awo.

³ Yaqeda ngokuvutha kolaka lwayo wonke amandla akoIsrayeli. Yasusa isandla sayo sokusiza phambi kwezitha. Yatshisa kuJakobe njengomlilo welangabi oqothula konke.

⁴ Isinemba ngemitshoko yayo njengesitha, yathiya isandla sayo esilamandla; njengesitha ibulele bonke abathandeka emehlweni ethu; lasethenteni laseZiyone yehlisela ulaka lwayo njengomlilo.

⁵ INkosi isinjengesitha ichithile uIsrayeli; ichithile zonke izigodlo zakhe, yadilizela phansi inqaba zakhe. Yandisa ukulila lokukhala koJuda.

⁶ Iphundlile ithempeli layo njengokuphundlwa kwevini, yadiliza indlu yokukhonzela. INkosi yenza ukuba kukhohlakale eZiyone imikhosi emisiweyo leSabatha. Yadelela ngokuvutha kolaka kwayo umbusi lompristi.

⁷ INkosi ilidelele ialtare layo, yalahla indlu yayo engcwele; yanikela esandleni sesitha imiduli yezigodlo zalo. Kwaba khona umsindo wokunqoba endlini yayo engcwele njengosukwini lomkhosi omisiweyo.

⁸ INkosi ikhethile ukudiliza umduli weZiyone, iwulinganisile ngentambo yokulinganisa, kayiyekelanga ukudiliza; yenza ukuba kukhale umthangala lomduli, iphele amandla kanyekanye.

⁹ Amasango alo atshonile phansi, idilizile yephula imigoqo yalo. Inkosi yalo lezikhulu zalo sebesezizweni, kakuselamthetho; labaprofethi balo kabasamukeli umbono eNkosini.

¹⁰ Abadala baseZiyone bahlezi phansi bethule, bathele uthuli emakhanda abo, bagqoke izambatho zokulila. Intombi zaseJerusalema zikhothamisele phansi amakhanda azo.

¹¹ Amehlo ami asediniwe yikukhala, imibilini yami idungekile. Inhliziyo yami idabukile ngosizi ngenxa yokuchitheka kwabantu bami, ngoba ingane labamunyayo bafela endleleni zomuzi.

¹² Bathi kubonina: Kungaphi ukudla lewayini na? lapho besifa njengabantu abalinyaziweyo endleleni zomuzi, lapho befela ezifubeni zabonina.

¹³ Ngingathini ngawe na? Ngingakufanisa ngani, wena Jerusalema na? Ngingakufanisa ngani ukuba ngikududuze, wena Ziyone na? Ngoba ukuchitheka kwakho kukhulu njengolwandle. Ngubani ongakwelapha na?

¹⁴ Abaprofethi bakho babonile imibono engamanga leyinkohliso ngawe. Kabakuvezanga ukona kwakho ukuze babuyise inhlanhla yakho, kodwa babonile imibono yamanga leduhisayo ngawe.

¹⁵ Bonke abadlulayo bakutshayela izandla, bayakuncifela bakunikinele amakhanda abo, Jerusalema. Bathi: Yiwo lo umuzi owawubizwa ngokuthi yibuhle obupheleleyo lentokozo yomhlaba wonke na?

¹⁶ Zonke izitha zakho ziyakuklolodela, ziyancifa, zigedle amazinyo azo zithi: Siwuchithile; lolu yilo usuku ebesilulindele; sesilufumene, silubonile.

¹⁷ INkosi yenzile lokho ebikumisile, igcwalisile ilizwi layo. Njengokumisa kwayo endulo isidilizile ingelasihawu. Yenzile ukuba isitha sithokoze ngawe, yaphakamisa amandla ezitha zakho.

¹⁸ Khala kakhulu eNkosini, wena Ziyone! Inyembezi zakho zigeleze njengemifula emini lasebusuku. Ungaphumuli, lenyembezi zakho zingaqamuki.

¹⁹ Vuka, ukhale ebusuku, ekuqaleni kwemilindo, uvule inhliziyo yakho yonke phambi kweNkosi, uphakamisele izandla zakho kuyo, ngenxa yokuphila kwabantwana bakho, ababulawa yindlala ekuhlanganeni kwendlela zonke.

²⁰ Ake ukhangele, Nkosi, ubone. Ngubani owake wamphatha ngokunje na? Abesifazana bazakudla inzalo yabo yini, abantwana babo ababazeleyo na? Umpristi lomprofethi bazabulawa endlini engcwele yeNkosi na?

²¹ Obhuqwini lwezindlela kulele abatsha labadala; intombi zami lensizwa zami zibulewe; osukwini lokuthukuthela kwakho uzibulele wena, wazibulala ungelasihawu.

²² Wangibizela izitha zami, zavela inxa zonke, njengabantu abeza emkhosini, kakho loyedwa owaphunyukayo, kakho owasilayo osukwini lokuthukuthela kweNkosi. Bonke engabazala ngabondla babhujiswa yizitha zami.