Isambulo 9 - iBhayibhili Elingcwele 1978

¹ Isithunywa sesihlanu salukhalisa uphondo; ngabona inkanyezi ivela ezulwini, iwela emhlabeni, yanikwa ikhiye yomgodi ongelamkhawulo.

² Yavula umgodi ongelamkhawulo; kwaphuma intuthu emgodini ithunqa njengentuthu yesithando somlilo omkhulu; kwafiphazwa ilanga lomkhathi ngentuthu evela emgodini.

³ Kwaphuma isikhonyane entuthwini, seza emhlabeni, sanikwa amandla njengamandla abofezela bomhlaba.

⁴ Kwathiwa singoni utshani bomhlaba, leyodwa into eluhlaza, lesisodwa isihlahla, kuphela labobantu abangelalo uphawu lukaNkulunkulu emabunzini abo.

⁵ Kwathiwa singababulali, kodwa sibahluphe inyanga ezinhlanu; lobuhlungu baso baba njengobuhlungu bukafezela, lapho eluma umuntu.

⁶ Ngalezonsuku abantu bazakufuna ukufa, bengakufumani; bazakufisa ukufa, kodwa ukufa kuzababalekela.

⁷ Isimo sesikhonyane sasifana lamabhiza alungiselwe ukulwa; emakhanda aso kwakukhona okufana lemiqhele yegolide, lobuso baso babunjengobuso babantu;

⁸ sasilenwele ezinjengenwele zabesifazana, lamazinyo aso ayenjengamazinyo ezilwane;

⁹ sasilezivikelo zesifuba ezinjengezivikelo zensimbi, lomdumo wamaphiko aso wawunjengomdumo wezinqola zamabhiza amanengi egijimela ekulweni;

¹⁰ sasilemisila efana leyabofezela elendonsi, lasemisileni yaso kukhona amandla aso okona abantu inyanga ezinhlanu.

¹¹ Sasilenkosi yaso, isithunywa somgodi ongelamkhawulo, okuthiwa ibizo laso ngesiHeberu nguAbadoni, ngesiGriki kuthiwa nguApoliyoni.

¹² Uhlupho lokuqala selwedlulile; kodwa kuseza inhlupho ezimbili emva kwalokho.

¹³ Isithunywa sesithupha salukhalisa uphondo; ngezwa ilizwi livela ezimpondweni ezine zealtare legolide eliphambi kukaNkulunkulu,

¹⁴ lisithi kuso isithunywa sesithupha esasilophondo: Khulula izithunywa ezine ezibotshiweyo ngasemfuleni omkhulu iYufrathi.

¹⁵ Zasezikhululwa izithunywa ezine ezazilungiselwe lezizikhathi losuku lenyanga lomnyaka ukuba zibulale ingxenye yesithathu yabantu.

¹⁶ Ubunengi bezimpi zabagade amabhiza babuyinkulungwane yezinkulungwane ziphindwe kamakhulu amabili; ngezwa ukubalwa kwazo.

¹⁷ Ngawabona ngokunje amabhiza labagadi bawo embonweni wami; babefake izivikelo zesifuba ezibomvu, leziluhlaza, lezingumthubi; amabhiza ayelamakhanda anjengawezilwane, lasemilonyeni yawo kwaphuma umlilo, lentuthu, lesolufa.

¹⁸ Ngalezizifo ezintathu kwabulawa ingxenye yesithathu yabantu ngomlilo langentuthu langesolufa, okwaphuma emilonyeni yawo.

¹⁹ Ngoba amandla amabhiza asemilonyeni lasemisileni yawo; imisila yawo injengenyoka, ilamakhanda, alimaza ngayo.

²⁰ Abaseleyo babantu abangabulawanga yilezizifo kabaphendukanga emisebenzini yezandla zabo ukuba bangakhonzi omoya ababi, lezithombe zegolide, lezesiliva, lezethusi, lezelitshe, lezesihlahla, izinto ezingaboniyo lezingezwayo lezingahambiyo.

²¹ Futhi kabaphendukanga ekubulaleni kwabo, lasekuthakatheni kwabo, lasekuphingeni kwabo, lasekwebeni kwabo.