Isambulo 8 - iBhayibhili Elingcwele 1978

Ukukhaliswa kwempondo eziyisikhombisa

¹ Kuthe lapho iWundlu livula uphawu lwesikhombisa, kwaba khona ukuthula ezulwini okwesikhatshana.

² Ngasengibona izithunywa eziyisikhombisa ezimi phambi kukaNkulunkulu, zinikwa impondo eziyisikhombisa.

³ Kwasekufika esinye isithunywa, sema ngasealtare siphethe umganu wegolide wokutshisela impepha; sanikwa impepha enengi ukuba siyinikele kanye lemikhuleko yabo bonke abangcwele phezu kwealtare legolide eliphambi kwesihlalo sobukhosi.

⁴ Intuthu yempepha yathunqa esandleni sesithunywa, yahlangana lemikhuleko yabangcwele, yenyukela phambi kukaNkulunkulu.

⁵ Isithunywa sasesithatha umganu wokutshisela impepha, sawugcwalisa ngomlilo ovela ealtareni, sawuphosela emhlabeni; kwasekusiba khona ukuduma, lomsindo, lokuphazima kombane, lokuzamazama komhlaba.

⁶ Kwathi izithunywa eziyisikhombisa ezaziphethe impondo eziyisikhombisa zazilungisela ukuba zizikhalise.

⁷ Isithunywa sokuqala salukhalisa uphondo; kwasekusiba khona isiqhotho lomlilo kuhlanganiswe legazi, kwaphoselwa emhlabeni; kwathi ingxenye yesithathu yomhlaba yatsha lengxenye yesithathu yezihlahla, labo bonke utshani obuluhlaza batshiswa.

⁸ Isithunywa sesibili salukhalisa uphondo; kwaphoselwa olwandle ulutho olunjengentaba enkulu evutha umlilo.

⁹ Kwathi ingxenye yesithathu yolwandle yaphenduka yaba ligazi, kwafa ingxenye yesithathu yezidalwa eziphilayo ezisolwandle, kwafa ingxenye yesithathu yemikolo.

¹⁰ Isithunywa sesithathu salukhalisa uphondo; kwasekusiwa kuvela ezulwini inkanyezi enkulu ikhanya njengesibane, yawela phezu kwengxenye yesithathu yemifula laphezu kwemithombo yamanzi.

¹¹ Ibizo lenkanyezi lalithiwa nguMhlonyane; ingxenye yesithathu yamanzi yaba njengomhlonyane, labantu abanengi bafa bebulawa ngamanzi, ngoba ayesebaba.

¹² Isithunywa sesine salukhalisa uphondo; kwatshaywa ingxenye yesithathu yelanga, leyenyanga, leyezinkanyezi, ukuze kufiphale ingxenye yesithathu yokukhanya kwazo; kwafiphala ingxenye yesithathu yokukhanya kwemini kanye lokwasebusuku.

¹³ Ngasengikhangela, ngezwa ukhozi luphapha emkhathini lukhala ngelizwi elikhulu lusithi: Maye, maye, maye kulabo abakhileyo emhlabeni, lapho sekukhala impondo ezizakukhaliswa yizithunywa ezintathu zokucina!