Isambulo 3 - iBhayibhili Elingcwele 1978

¹ Lakuso isithunywa sebandla eliseSardisi loba uthi: Nanku akutshoyo lowo olabomoya abayisikhombisa bakaNkulunkulu lezinkanyezi eziyisikhombisa, uthi: Ngiyayazi imisebenzi yakho ukuba kuthiwa uyaphila, kanti wena ufile.

² Vuka, uqinise okuseleyo osekuzakufa, ngoba kangifumananga imisebenzi yakho iphelelisiwe phambi kukaNkulunkulu wami.

³ Khumbulake lokho okwamukeleyo wakuzwa, kugcine, uphenduke. Uba ungavuki, ngizakuza kuwe njengesela, kawusoze wasazi isikhathi engizakuza ngaso kuwe.

⁴ Kodwake basekhona abantu abayingcosana eSardisi abangangcolisanga ingubo zabo; bazakuhamba lami bembethe okumhlophe, ngoba bafanele.

⁵ Onqobayo uzakwambathiswa ngokunjalo ingubo ezimhlophe; kangiyikulesula ibizo lakhe encwadini yokuphila, ngoba ngizakulivuma phambi kukaBaba laphambi kwezithunywa zakhe.

⁶ Olendlebe kezwe lokho uMoya akutshoyo emabandleni.

⁷ Lakuso isithunywa sebandla eliseFiladelfiya loba uthi: Nanku akutshoyo ongcwele loqotho, olekhiye kaDavida, ovula kungavali muntu, lovala kungavuli muntu,

⁸ uthi: Ngiyayazi imisebenzi yakho; khangela, ngimisa phambi kwakho umnyango ovuliweyo, ongelakuvalwa muntu. Ngiyazi ukuthi ulamandla amancinyane, kanti uligcinile ilizwi lami, kawuliphikanga ibizo lami.

⁹ Khangela, ngizakwenza labo abesinagoge likaSathane, abathi bangabaJuda kodwa beqamba amanga, beze baguqe ngasezinyaweni zakho; bazakwazi ukuthi lingabantu bami abathandekayo.

¹⁰ Ngoba ugcinile umlayo wami wokuba ubekezele, lami ngizakukugcina ngesikhathi sokulingwa okuzakufika emhlabeni wonke ukulinga bonke abakhileyo kuwo.

¹¹ Ngiyeza masinyane; bambisisa lokho olakho, ukuze ungawamukwa muntu umqhele wakho.

¹² Onqobayo ngizakumenza insika ethempelini likaNkulunkulu wami, kasoze aphuma kulo; ngizakuloba ibizo likaNkulunkulu wami phezu kwakhe, lebizo lomuzi kaNkulunkulu wami iJerusalema elitsha elehla livela kuNkulunkulu wami ezulwini, lebizo lami elitsha.

¹³ Olendlebe kezwe lokho uMoya akutshoyo emabandleni.

¹⁴ Lakuso isithunywa sebandla eliseLawodikeya loba uthi: Nanku akutshoyo uAmeni, ufakazi othembekileyo loqotho, umqalisi wokudaliweyo konke kukaNkulunkulu,

¹⁵ uthi: Ngiyayazi imisebenzi yakho ukuthi kawuqandi, futhi kawutshisi. Kungathi ngabe uyaqanda kumbe utshise!

¹⁶ Ngakhoke njengalokhu ubuthukuthuku, ungaqandi futhi ungatshisi, ngizakukutsaka emlonyeni wami.

¹⁷ Ngoba uthi: Nginothile, ngiphumelele, kangisweli lutho. Kanti kawazi ukuthi ungohluphekayo, ohawulayo, ongumyanga, oyisiphofu, lohambaze.

¹⁸ Ngakhoke ngiyakweluleka ukuba uthenge kimi igolide elihlanjululwe ngomlilo ukuba unothe, lengubo ezimhlophe ukuze wambathe, ufihle ihlazo lokuhambaze kwakho, uthenge lamagcobo okugcoba amehlo akho ukuba ubone.

¹⁹ Bonke engibathandayo ngiyabasola ngibatshaye; ngakhoke tshisekela ukuphenduka.

²⁰ Khangela, ngimi ngasemnyango ngiqoqoda; uba umuntu esizwa ilizwi lami, avule umnyango, ngizakungena ngidle laye, laye adle lami.

²¹ Onqobayo ngizakumnika ukuba ahlale lami esihlalweni sami sobukhosi, njengalokhu lami nganqoba, ngahlala loBaba esihlalweni sakhe sobukhosi.

²² Olendlebe kezwe lokho uMoya akutshoyo emabandleni.