Isambulo 2 - iBhayibhili Elingcwele 1978

Izincwadi ezalotshelwa kumabandla ayisikhombisa

¹ Kuso isithunywa sebandla eliseEfesu loba ukuthi: Nanku akutshoyo lowo ophethe inkanyezi eziyisikhombisa esandleni sakhe sokunene, ohamba phakathi kwezinti zezibane zegolide eziyisikhombisa;

² uthi: Ngiyayazi imisebenzi yakho, lemizamo yakho, lokubekezela kwakho, lokuthi kawulakubamela ababi, lokuthi ubahlolile labo abazitsho ukuthi bangabaphostoli, bona bengeyisibo, wabafumana beqamba amanga.

³ Ulokubekezela; waqinisela ngenxa yebizo lami, kawudinwanga.

⁴ Kodwa ngilalokhu ngawe ukuthi udelile uthando lwakho lwakuqala.

⁵ Ngakhoke khumbula lapho uwe khona, uphenduke, wenze imisebenzi owayenza kuqala. Uba kungenjalo, ngizakuza kuwe, ngilususe uluthi lwesibane sakho endaweni yalo, uba ungaphenduki.

⁶ Kanti ulalokhu ukuthi uyayizonda imisebenzi yamaNikolayitha engiyizondayo lami.

⁷ Lowo olendlebe kezwe lokho akutshoyo uMoya emabandleni. Onqobayo ngizakumnika ukuba adle okwesihlahla sokuphila esiseParadise kaNkulunkulu.

⁸ Lakuso isithunywa sebandla eliseSemerna loba uthi: Nanku akutshoyo owokuqala lowokucina, owake wafa, kodwa osephila, uthi:

⁹ Ngiyakwazi ukuhlupheka kwakho lobuyanga bakho — kanti wena unothile — lenhlamba yalabo abathi bangabaJuda, bona bengesibo, kodwa beyisinagoge likaSathane.

¹⁰ Ungesabi inhlupheko ezizakukwehlela. Khangela, uSathane uzakufaka abanye benu entolongweni ukuba lilingwe; futhi lizakuhlupheka insuku ezilitshumi. Thembeka kuze kube sekufeni, ngizakukunika umqhele wokuphila.

¹¹ Olendlebe kezwe lokho akutshoyo uMoya emabandleni. Onqobayo kasoze alinyazwa yikufa kwesibili.

¹² Lakuso isithunywa sebandla elisePergamo loba uthi: Nanku akutshoyo lowo olomhedla obukhali inxa zombili,

¹³ uthi: Ngiyazi lapho wakhe khona, lapho kukhona isihlalo sobukhosi sikaSathane; kanti ubambelele ebizweni lami, kawuphikanga ukukholwa kwakho lasensukwini zikaAntipasi, ufakazi wami othembekileyo, owabulawelwa phakathi kwenu lapho uSathane ahlala khona.

¹⁴ Kodwa kukhona okuyingcosana engilakho ngawe; ulabo lapho ababambelela ekufundiseni kukaBalami, owafundisa uBalaki ukubeka isikhubekiso phambi kwabakoIsrayeli sokuba badle okuhlatshelwe izithombe lokuba baphinge.

¹⁵ Futhi lawe ulabo abanye ababambelela ekufundiseni kwamaNikolayitha.

¹⁶ Ngakhoke phenduka; uba kungenjalo, ngizakuza kuwe masinyane, ngilwe labo ngomhedla ophuma emlonyeni wami.

¹⁷ Olendlebe kezwe lokho akutshoyo uMoya emabandleni. Onqobayo ngizakumnika enye imana kwefihliweyo, ngimnike lelitshe elimhlophe okulotshwe kulo ibizo elitsha elingaziwa muntu, kuphela lowo olamukelayo.

¹⁸ Lakuso isithunywa sebandla eliseTiyathira loba uthi: Nanku ekutshoyo iNdodana kaNkulunkulu elamehlo anjengamalangabi omlilo, lezinyawo zayo ezifana lethusi elikhazimulayo,

¹⁹ ithi: Ngiyayazi imisebenzi yakho, lothando, lokukholwa, lokubekezela kwakho, lokuthi imisebenzi yakho yokucina minengi kuleyokuqala.

²⁰ Kodwa ngilalokhu ngawe ukuthi umvumele owesifazana uJezebeli, ozibiza ngokuthi ungumprofethikazi, ukufundisa aduhise inceku zami ukuba ziphinge, lokuba zidle ukudla okuhlatshelwe izithombe.

²¹ Ngamnika ithuba lokuba aphenduke, kodwa kavumi ukuphenduka ekuphingeni kwakhe.

²² Ngakhoke ngizakumlethela umkhuhlane, labaphinga laye ngibangenise ekuhluphekeni okukhulu, uba bengaphenduki emisebenzini yakhe;

²³ ngizakubulala abantwana bakhe. Wonke amabandla azakwazi ukuthi nginguye ohlola ingqondo lenhliziyo, futhi ngizakumnika ilowo lalowo wenu ngokwemisebenzi yakhe.

²⁴ Khathesi sengikhuluma lani eliseleyo eTiyathira, elingabambelelanga kulokhukufundisa, elingakwaziyo okuzikileyo kukaSathane; kangilethwesi omunye umthwalo;

²⁵ kubambisiseni lokho elilakho ngize ngifike.

²⁶ Onqobayo logcina imisebenzi yami kuze kube sekupheleni ngizakumnika amandla phezu kwezizwe,

²⁷ njengalokhu lami ngamukelisiwe amandla avela kuBaba; uzakuzibusa ngentonga yensimbi, aziphahlaze njengezimbiza zebumba;

²⁸ futhi ngizakumnika indonsakusa.

²⁹ Olendlebe kezwe lokho akutshoyo uMoya emabandleni.