Isambulo 19 - iBhayibhili Elingcwele 1978

Ezulwini kukhona ukujabula ngomthimba weWundlu

¹ Emva kwalokho ngezwa kungathi yilizwi elikhulu lexuku elikhulu ezulwini lisithi: Haleluya! Ukunqoba, lobukhosi, lamandla kungokukaNkulunkulu wethu,

² ngoba ukuthonisisa kwakhe kuqotho, kulungile; usilahlile isiphingi esikhulu esonakalise umhlaba ngokuphinga kwaso, uphindisele kuso igazi lezinceku zakhe.

³ Bamemeza ngokwesibili bathi: Haleluya! Intuthu yokutsha kwawo yathunqa kwaze kwaba nini lanini.

⁴ Abadala abangamatshumi amabili lane lezidalwa ezine eziphilayo zaziwisela phansi, zamdumisa uNkulunkulu ohlezi esihlalweni sobukhosi zisithi: Ameni! Haleluya!

⁵ Kwasekuzwakala ilizwi livela esihlalweni sobukhosi lisithi: Mdumiseni uNkulunkulu wethu lina lonke zinceku zakhe, elimesabayo, abakhulu labancinyane.

⁶ Ngasengisizwa kungathi yilizwi lexuku elikhulu, linjengomdumo wamanzi amanengi lokuduma okulamandla lisithi: Haleluya! Ngoba iNkosi uNkulunkulu wethu, uSomandla, uyabusa.

⁷ Asithokoze, sithabe, simdumise, ngoba umthimba weWundlu usufikile, lomlobokazi usezilungisele;

⁸ wavunyelwa ukwambatha ilembu elihle elihlambulukileyo elikhazimulayo. — Ngoba ilembu elihle liyizenzo zokulunga zabangcwele.

⁹ Sasesisithi isithunywa kimi: Bhala lokhu ukuthi: Babusisiwe labo abamenyelwe edilini lomthimba weWundlu. Sathi kimi: La ngamazwi aqotho kaNkulunkulu.

¹⁰ Ngasengiziwisela phansi ngasenyaweni zaso ukusikhonza. Kodwa sathi kimi: Musa ukwenza lokhu; lami ngiyinceku kanye lawe labazalwane bakho abafakazela uJesu. Dumisa uNkulunkulu. Labo abafakazela uJesu baloMoya njengabaprofethi.

UKristu ulwa lesilo asinqobe

¹¹ Ngasengibona izulu livulekile; ngabona ibhiza elimhlophe, oligadileyo ubizwa ngokuthi ngoThembekileyo loQotho; ngoba uthonisisa, alwe ngokulunga.

¹² Amehlo akhe afana lamalangabi omlilo, lasekhanda lakhe kukhona imiqhele eminengi; ulebizo elilotshiweyo elingaziwa muntu, kodwa nguye kuphela.

¹³ Wambatha ingubo efafazwe ngegazi; ibizo lakhe lithiwa nguLizwi likaNkulunkulu.

¹⁴ Lezimpi zasezulwini zamlandela zigade amabhiza amhlophe, zambethe amalembu amahle ahlambulukileyo amhlophe.

¹⁵ Emlonyeni wakhe kwaphuma umhedla obukhali azakutshaya izizwe ngawo; yena uzakuzibusa ngentonga yensimbi; uzakunyathela isikhamelo sewayini lentukuthelo yolaka lukaNkulunkulu uSomandla.

¹⁶ Engutsheni yakhe lasethangazini lakhe kulotshwe ibizo elithi: INkosi yamakhosi loMbusi wababusi.

¹⁷ Ngasengibona isithunywa simi elangeni, samemeza ngelizwi elikhulu ezinyonini zonke eziphaphayo emkhathini, sathi: Wozani, libuthane edilini elikhulu likaNkulunkulu

¹⁸ ukuba lidle inyama yamakhosi, lenyama yezinduna, lenyama yezikhulu, lenyama yamabhiza leyabagadi bawo, lenyama yabantu bonke abakhululekileyo labayizigqili, abancinyane labakhulu.

¹⁹ Ngabona isilo, lamakhosi omhlaba lezimpi zawo zibuthanele ukulwa laye ogade ibhiza kanye lezimpi zakhe.

²⁰ Isilo sasesibanjwa kanye lomprofethi wamanga owenza izibonakaliso phambi kwaso, aduhisa ngazo labo ababelophawu lwesilo lalabo abakhonza umfanekiso waso; isilo lomprofethi wamanga kwaphoselwa echibini lomlilo elivutha isolufa.

²¹ Labaseleyo babulawa ngomhedla walowo ogade ibhiza, umhedla ophuma emlonyeni wakhe; inyoni zonke zazitika ngenyama yabo.