Isambulo 16 - iBhayibhili Elingcwele 1978

¹ Ngasengisizwa ilizwi elikhulu livela ethempelini lisithi kuzo izithunywa eziyisikhombisa: Hambani, lithululele emhlabeni okusemiganwini eyisikhombisa okululaka lukaNkulunkulu.

² Isithunywa sokuqala sahambake, sathululela okusemganwini waso emhlabeni; kwasekuvela ebantwini abalophawu lwesilo labakhonza umfanekiso waso izilonda ezimbi ezibuhlungu.

³ Lesithunywa sesibili sathululela olwandle okusemganwini waso; lwaselusiba njengegazi lomuntu ofileyo, lakho konke okuphilayo okusolwandle kwafa.

⁴ Isithunywa sesithathu sathululela okusemganwini waso emifuleni lasemithonjeni yamanzi; kwaphenduka kwaba ligazi.

⁵ Ngezwa isithunywa samanzi sisithi: Wena oNgcwele okhona lowayekhona, ulungile ngokuthonisisa kwakho;

⁶ ngoba abantu bachitha igazi labangcwele lelabaprofethi, wabanika ukuba balinathe igazi; lokhu kubafanele.

⁷ Ngasengisizwa ialtare lisithi: Yebo, Nkosi Nkulunkulu, Somandla, kuqotho kulungile ukuthonisisa kwakho.

⁸ Isithunywa sesine sathululela elangeni okusemganwini waso; lavunyelwa ukutshisa abantu ngomlilo.

⁹ Abantu batshiswa yikutshisa okukhulu; kodwa balithuka ibizo likaNkulunkulu obelamandla phezu kwalezizifo, kabaphendukanga ukuba bamdumise.

¹⁰ Isithunywa sesihlanu sathululela okusemganwini waso phezu kwesihlalo sesilo; lombuso waso waba semnyameni. Abantu baxhanxatha inlimi zabo ngenxa yobuhlungu,

¹¹ kodwa bamthuka uNkulunkulu wezulu ngenxa yobuhlungu bezilonda zabo, kabaphendukanga emisebenzini yabo.

¹² Isithunywa sesithupha sathululela okusemganwini waso emfuleni omkhulu iYufrathi; kwatsha amanzi awo, ukuba indlela ilungiselwe amakhosi avela ngasempumalanga.

¹³ Ngabona kuphuma emlonyeni womgobho, lasemlonyeni wesilo, lasemlonyeni womprofethi wamanga, imimoya engcolileyo emithathu efana lamaxoxo.

¹⁴ Yona ingomoya ababi abenza izibonakaliso, abaphuma ukuya emakhosini omhlaba wonke ukuwahlanganisela ekulweni ngosuku olukhulu lukaNkulunkulu, uSomandla. —

¹⁵ Khangela, ngiyeza njengesela. Ubusisiwe olindayo, alondoloze ingubo zakhe ukuba angahambize, kuze kubonwe ihlazo lakhe. —

¹⁶ Bawahlanganisela amakhosi endaweni ethiwa ngesiHeberu iArmagedoni.

¹⁷ Isithunywa sesikhombisa sathululela emoyeni okusemganwini waso; kwezwakala ilizwi elikhulu livela ethempelini esihlalweni sobukhosi lisithi: Sekwenzekile!

¹⁸ Kwasekusiba khona ukuphazima kwemibane, lomsindo omkhulu, lokuduma, lokuzamazama komhlaba okukhulu okungazanga kube khona selokhu kwaba khona abantu emhlabeni, ukuzamazama okukhulu kakhulu.

¹⁹ Umuzi omkhulu waba yiziqamu ezintathu, lemizi yabezizwe yawa; uNkulunkulu wakhumbula leBabiloni elikhulu ukuba alenze linathe inkezo egcwaliswe ngewayini lolaka lwakhe.

²⁰ Izihlenge zonke zabaleka, lentaba zanyamalala.

²¹ Isiqhotho esikhulu sawela phezu kwabantu sivela ezulwini, amatshe aso enzima kakhulu; abantu bamthuka uNkulunkulu ngenxa yesifo sesiqhotho, ngoba uhlupho lwaso lwalulukhulu.