Isambulo 15 - iBhayibhili Elingcwele 1978

Imiganu eyisikhombisa lezifo eziyisikhombisa

¹ Ngasengibona esinye isibonakaliso ezulwini esikhulu lesimangalisayo, izithunywa eziyisikhombisa zilezifo eziyisikhombisa zokucina, ngoba lwapheleliswa ngazo ulaka lukaNkulunkulu.

² Ngabona okungathi lulwandle lwengilazi luxubene lomlilo, lalabo abasebesinqobile isilo lomfanekiso waso lesibalo sebizo laso bemi eceleni kolwandle lwengilazi, bephethe amachacho kaNkulunkulu.

³ Bahlabela ingoma kaMose inceku kaNkulunkulu lengoma yeWundlu besithi: Mikhulu, iyamangalisa imisebenzi yakho, Nkosi Nkulunkulu, Somandla; zilungile, ziqotho izindlela zakho, Nkosi yazo zonke izikhathi.

⁴ Ngubani ongayikukwesaba, Nkosi, adumise ibizo lakho na? Ngoba nguwe wedwa ongcwele; izizwe zonke zizakuza zikudumise, ngoba izenzo zakho zokulunga zibonakalisiwe.

⁵ Emva kwalokho ngabona, sekuvulwa ithempeli lethente lobufakazi,

⁶ kwaphuma ethempelini izithunywa eziyisikhombisa zilezifo eziyisikhombisa, zambethe okumhlophe kakhulu, lezifuba zazo zibotshwe ngamaqhele egolide.

⁷ Esinye sezidalwa ezine eziphilayo sanika izithunywa eziyisikhombisa imiganu yegolide eyisikhombisa, igcwele ulaka lukaNkulunkulu ophilayo kuze kube nininini.

⁸ Ithempeli lagcwala intuthu evela ebukhosini bukaNkulunkulu lasemandleni akhe; kakukho owayengangena ethempelini zingakapheli izifo eziyisikhombisa zezithunywa eziyisikhombisa.