Isambulo 14 - iBhayibhili Elingcwele 1978

IWundlu kanye labahlengiweyo

¹ Ngasengikhangela, ngabona iWundlu limi entabeni yaseZiyone, kumi kanye lalo abayizinkulungwane ezilikhulu lamatshumi amane lane, abalotshwe ibizo lalo lelikaYise emabunzini abo.

² Ngasengisizwa ilizwi livela ezulwini, linjengelizwi lamanzi amanengi lanjengomdumo omkhulu; lelizwi engalizwayo lalinjengelabatshaya amachacho abo.

³ Bahlabela ingoma entsha phambi kwesihlalo sobukhosi laphambi kwezidalwa ezine eziphilayo laphambi kwabadala. Kakho olamandla okuyifunda leyongoma, kuphela abayizinkulungwane ezilikhulu lamatshumi amane lane abahlengiweyo emhlabeni.

⁴ Labo yibo abangangcoliswanga yisifazana, ngoba bazigcina behlambululukile; yibo abalandela iWundlu loba lisiya ngaphi. Labo bahlengwa ebantwini, baba yizithelo zokuqala kuNkulunkulu lakulo iWundlu.

⁵ Lasemilonyeni yabo kakufunyaniswanga amanga, ngoba kabalasici.

Izithunywa ezintathu ezimemezela ukuthonisisa

⁶ Ngasengibona esinye isithunywa siphapha emkhathini, silevangeli elingapheliyo ukulitshumayela kwabakhileyo emhlabeni, kuzo zonke izizwe, lemihlobo, lezindimi labantu.

⁷ Sathi ngelizwi elikhulu: Mesabeni uNkulunkulu, limdumise, ngoba isikhathi sokuthonisisa kwakhe sesifikile; limkhonze yena owenza izulu lomhlaba lolwandle lemithombo yamanzi.

⁸ Salandelwa ngesinye isithunywa sesibili sisithi: Liwile, liwile iBabiloni elikhulu, elinathise izizwe zonke iwayini lolaka lokuphinga kwabo!

⁹ Salandela esinye isithunywa sesithathu, simemeza ngelizwi elikhulu sisithi: Uba kukhona okhonza isilo lomfanekiso waso, obekwe uphawu ebunzini lakhe kumbe esandleni sakhe,

¹⁰ laye uzakunatha iwayini lolaka lukaNkulunkulu elilungisiweyo enkezweni yolaka lwakhe, lingaxutshaniswanga; uzakuhlutshwa ngomlilo langesolufa phambi kwezithunywa ezingcwele laphambi kweWundlu.

¹¹ Lentuthu yomlilo wokuhlutshwa kwabo ithunqa kuze kube nininini; kabalakuphumula emini lebusuku laba abakhonza isilo lomfanekiso waso, lalowo obekwe uphawu lwebizo laso.

¹² Nanti ithuba lokubekezela kwabangcwele, labo abagcina imilayo kaNkulunkulu lokukholwa kuJesu.

¹³ Ngasengisizwa ilizwi elivela ezulwini lisithi: Loba uthi: Babusisiwe abafileyo befela eNkosini kusukela kulesisikhathi. Impela babusisiwe, kutsho uMoya; bazaphumula ekutshikatshikeni kwabo; ngoba imisebenzi yabo iyabalandela.

Izithunywa ezimbili zokuvuna

¹⁴ Ngasengikhangela, ngabona iyezi elimhlophe, kuhlezi phezu kwalo ofana omuntu elomqhele wegolide ekhanda lakhe, ephethe isikela ebukhali esandleni sakhe.

¹⁵ Esinye isithunywa saphuma ethempelini, simemeza ngelizwi elikhulu kuye ohlezi eyezini sisithi: Sebenzisa isikela yakho, uvune, ngoba isikhathi sokuvuna sesifikile, sekuvuthiwe okuvunwayo komhlaba.

¹⁶ Ohlezi phezu kweyezi wayiphosa isikela yakhe emhlabeni, wavunwa umhlaba.

¹⁷ Esinye isithunywa saphuma ethempelini elisezulwini, laso siphethe isikela ebukhali.

¹⁸ Lesinye isithunywa futhi saphuma sivela ealtareni, silamandla phezu komlilo, samemeza ngelizwi elikhulu kuso esilesikela ebukhali sisithi: Sebenzisa isikela yakho ebukhali, ubuthelele iziswenya zevini lomhlaba, ngoba izithelo zalo sezivuthiwe.

¹⁹ Isithunywa sayiphosa isikela yaso emhlabeni, salivuna ivini lomhlaba, saliphosela esikhamelweni sewayini esikhulu solaka lukaNkulunkulu.

²⁰ Isikhamelo sanyathelwa ngaphandle komuzi; kwaphuma igazi esikhamelweni, lakhula laze lafika ematomini amabhiza, lahamba amakhilomitha angamakhulu amathathu.