Isambulo 13 - iBhayibhili Elingcwele 1978

Izilo ezimbili

¹ Ngasengibona isilo sikhuphuka olwandle, silempondo ezilitshumi lamakhanda ayisikhombisa lemiqhele elitshumi empondweni zaso, kukhona lebizo eliyinhlamba emakhanda aso.

² Isilo engasibonayo sasinjengengwe, inyawo zaso zazinjengezebhere, lomlomo waso unjengowesilwane. Umgobho wasinika amandla awo lesihlalo sawo sobukhosi lokubusa okukhulu.

³ Elinye lamakhanda aso kwakungathi lilenxeba elibangela ukufa, kodwa inxeba laso laphola; umhlaba wonke wasilandela isilo umangele.

⁴ Abantu bawukhonza umgobho, ngoba wanika isilo amandla awo; basikhonza lesilo besithi: Ngubani ofana lesilo? ngubani ongalwa laso na?

⁵ Isilo sanikwa umlomo wokukhuluma amazwi okuzincoma lenhlamba, sanikwa amandla okwenza lokhu inyanga ezingamatshumi amane lambili.

⁶ Savula umlomo waso ukuhlambaza uNkulunkulu, lokuhlambaza ibizo lakhe lendawo ahlala kiyo kanye labahlala laye.

⁷ Sanikwa futhi ukuba silwe labangcwele, sibahlule; sanikwa lamandla phezu kwemihlobo yonke, labantu, lezindimi, lezizwe.

⁸ Bonke abakhileyo emhlabeni bazakusikhonza, ngaphandle kwalabo amabizo abo alotshwa encwadini yokuphila yeWundlu elahlatshwayo, selokhu kwasukela ekudatshulweni komhlaba.

⁹ Olendlebe kezwe.

¹⁰ Uba ekhona okumele athunjwe, uzakuthunjwa; lobulalayo ngomkhonto uzakubulawa ngomkhonto. Nanti ithuba lokubekezela lokusebenzisa ukukholwa kwabangcwele.

¹¹ Ngasengibona esinye isilo siphuma emhlabeni, silempondo ezimbili ezinjengezewundlu, sakhuluma njengomgobho.

¹² Amandla wonke esilo sokuqala siyawasebenzisa phambi kwaso, senza ukuba umhlaba labakhileyo kuwo bakhonze isilo sokuqala esilenxeba lokufa elapholayo.

¹³ Senza izibonakaliso ezinkulu, saze senza lomlilo ophuma ezulwini, wehlele emhlabeni phambi kwabantu.

¹⁴ Sabaduhisa abakhileyo emhlabeni ngezibonakaliso esazinikwayo ukuba sizenze phambi kwesilo, sisithi kwabakhileyo emhlabeni kabasenzele umfanekiso isilo, ebesilenxeba lomkhonto kodwa sasila.

¹⁵ Sanikwa futhi ukuba siwuphe umfanekiso wesilo umoya, ukuze ukhulume, senze ukuba bonke abangawukhonziyo babulawe.

¹⁶ Senza futhi ukuba bonke, abancinyane labakhulu, abanothileyo labayanga, abakhululekileyo lezigqili, batshiswe uphawu esandleni sokunene loba emabunzini,

¹⁷ ukuba kungabi khona othengayo loba othengisayo, uba engelalo uphawu olulibizo lesilo loba isibalo sebizo laso.

¹⁸ Nanku ukuhlakanipha. Olengqondo kabale isibalo sesilo, ngoba siyisibalo somuntu; isibalo sakhe singamakhulu ayisithupha lamatshumi ayisithupha lesithupha.