Isambulo 11 - iBhayibhili Elingcwele 1978

Ofakazi ababili bakaNkulunkulu

¹ Ngasenginikwa umhlanga wokulinganisa, ofana lodondolo, kwathiwa: Sukuma, ulinganise ithempeli likaNkulunkulu, lealtare, ubale labakhonzayo khona.

² Kodwa ungalinganisi iguma elingaphandle kwethempeli, ulitshiye ngaphandle; ngoba linikiwe izizwe, zona zizakunyathela phansi umuzi ongcwele inyanga ezingamatshumi amane lambili.

³ Ngizakubanika ofakazi bami ababili amandla okutshumayela insuku eziyinkulungwane lamakhulu amabili lamatshumi ayisithupha begqoke amasaka.

⁴ Laba bayizihlahla ezimbili zamaoliva lezinti zezibane ezimbili ezimiswe phambi kweNkosi yomhlaba.

⁵ Uba kukhona ofuna ukubalimaza laba, kuphuma umlilo emilonyeni yabo, uqothule izitha zabo; uzakufa ngokunjalo ofisa ukubalimaza.

⁶ Balamandla laba okuvala izulu ukuba lingani ngezinsuku zokutshumayela kwabo; futhi balamandla phezu kwamanzi okuba bawaphendule abe ligazi lawokwehlisela umhlaba izifo zonke ngokuthanda kwabo.

⁷ Kuzakuthi sebebuqedile ubufakazi babo, isilo esiphuma emgodini ongelamkhawulo silwe labo, sibanqobe, sibabulale.

⁸ Lezidumbu zabo zizakusala zidindilizile emigwaqweni yomuzi omkhulu othiwa ngokomoya iSodoma leGibithe, lapho iNkosi yabo yabethelwa khona.

⁹ Izinsuku ezintathu lengxenye yosuku abantu abavela emihlotsheni yonke lasezizweni zonke lasendimini zonke bazajolozela izidumbu zabo, bengavumi ukuba zingcwatshwe.

¹⁰ Labakhileyo emhlabeni bazakuthokoza ngabo, bathabe, banikane izipho, ngoba lababaprofethi ababili babeluhlupho kulabo abakhileyo emhlabeni.

¹¹ Kwathi emva kwalezonsuku ezintathu ezilengxenye yosuku umoya wokuphila ovela kuNkulunkulu wangena kibo; basebesukuma besima ngenyawo zabo, abababonayo behlelwa yikwesaba okukhulu.

¹² Basebesizwa ilizwi elikhulu livela ezulwini lisithi kibo: Yenyukelani lapha. Basebesenyukela ezulwini ngeyezi, lezitha zabo zibabona.

¹³ Ngalesosikhathi kwaba khona ukuzamazama okukhulu komhlaba, kwawa ingxenye yetshumi yomuzi; kwafa abantu abayizinkulungwane eziyisikhombisa ekuzamazameni komhlaba; labaseleyo batshaywa luvalo, bamdumisa uNkulunkulu wezulu.

¹⁴ Uhlupho lwesibili selwedlulile; seluzakulandelwa ngolwesithathu masinyane.

¹⁵ Isithunywa sesikhombisa salukhalisa uphondo; kwezwakala amazwi amakhulu ezulwini esithi: Umbuso womhlaba usungoweNkosi yethu lokaKristu wayo; izakubusa kuze kube nini lanini.

¹⁶ Abadala abangamatshumi amabili lane abahlezi ezihlalweni zabo zobukhosi phambi kukaNkulunkulu bathi mbo ngobuso phansi, bakhonza uNkulunkulu,

¹⁷ besithi: Siyakubonga, Nkosi Nkulunkulu, Somandla, okhona lowayekhona, ngoba uthethe amandla akho amakhulu, waqala ukubusa.

¹⁸ Izizwe zathukuthela, kodwa lwafika ulaka lwakho. Ngakhoke sekuyisikhathi sokuthonisiswa kwabafileyo; sekuyisikhathi sokunikwa komvuzo ezincekwini abaprofethi, lasebantwini bakho abangcwele abahlonipha ibizo lakho, abakhulu labancinyane, isikhathi sokubhujiswa kwababhubhisa umhlaba.

¹⁹ Kwasekuvulwa ithempeli likaNkulunkulu elisezulwini, kwabonakala umtshokotsho wesivumelwano sakhe usethempelini; kwasekusiba khona ukuphazima kombane, lomsindo omkhulu, lokuduma, lokuzamazama komhlaba, lesiqhotho esikhulu.