Isambulo 10 - iBhayibhili Elingcwele 1978

Isithunywa esilencwadi encinyane evulekileyo

¹ Ngasengibona esinye isithunywa esilamandla sisehla sivela ezulwini; sambethe iyezi, lomchilowamakhosikazi usekhanda laso; ubuso baso babunjengelanga, lemilenze yaso injengensika zomlilo.

² Sasiphethe esandleni saso incwadi encinyane evulekileyo. Samisa unyawo lwaso lokunene phezu kolwandle, lonyawo lwaso lwekhohlo phezu komhlabathi.

³ Samemeza ngelizwi elikhulu elinjengelesilwane esibhongayo; kwathi lapho simemeza, kwezwakala imidumo eyisikhombisa.

⁴ Kwathi imidumo eyisikhombisa isizwakele, ngasengizakuloba; kodwa ngezwa ilizwi livela ezulwini lisithi: Kwenze imfihlo okukhulunywe yimidumo eyisikhombisa, ungakulobi.

⁵ Isithunywa engasibona simi phezu kolwandle laphezu komhlabathi saphakamisela isandla saso sokunene ezulwini,

⁶ safunga yena ophilayo kuze kube nininini, owadala izulu lakho konke okukulo, lomhlaba lakho konke okukuwo, lolwandle lakho konke okukulo, sathi: Kakusayikuphuzwa;

⁷ kodwa lapho sesifikile isikhathi sokuba isithunywa sesikhombisa sikhalise uphondo lwaso, kuzabe sekugcwalisekile imfihlakalo yecebo likaNkulunkulu ayithembisa ezincekwini zakhe abaprofethi.

⁸ Ilizwi engalizwa livela ezulwini lakhuluma lami futhi lathi: Hamba uyethatha incwadi evulekileyo esesandleni sesithunywa esimi phezu kolwandle laphezu komhlabathi.

⁹ Ngaya kuso isithunywa, ngathi kuso kasinginike incwadi encinyane. Sathi kimi: Ithathe, uyidle uyiqede; izakubaba esiswini sakho, kodwa emlonyeni wakho izakuba mnandi njengenyosi.

¹⁰ Ngasengiyithatha incwadi encinyane esandleni sesithunywa, ngayidla; yayimnandi njengenyosi emlonyeni wami; kodwa lapho sengiyidlile, yababa esiswini sami.

¹¹ Kwasekuthiwa kimi: Kumele ukuba uphinde utshumayele ngabantu abanengi, langezizwe, langezindimi, langamakhosi.