Isambulo 1 - iBhayibhili Elingcwele 1978

UJohane unikwa isambulelo sikaJesu Kristu

¹ Lesi yisambulelo sikaJesu Kristu amnika sona uNkulunkulu, ukuba abonise inceku zakhe izinto ezimele ukwenzeka masinyane. Wathuma isithunywa sakhe ukuyibonisa inceku yakhe uJohane,

² owafakazela ilizwi likaNkulunkulu lobufakazi bukaJesu Kristu lakukho konke akubonayo.

³ Ubusisiwe owafundayo amazwi alesisiprofethi, babusisiwe lalabo abezwayo bagcine okulotshiweyo kuso, ngoba isikhathi siseduze.

Ukubingelela kukaJohane

⁴ Mina Johane ngithi kuwo amabandla ayisikhombisa aseAsiya: Kakube kini umusa lokuthula okuvela kuye okhona lowayekhona lozakuba khona, lakubomoya abayisikhombisa abaphambi kwesihlalo sakhe sobukhosi,

⁵ lakuJesu Kristu ufakazi othembekileyo, olizibulo kwabafileyo lombusi wamakhosi omhlaba. Kuye osithandayo lowasikhulula ezonweni zethu ngegazi lakhe,

⁶ lowasenza saba ngumbuso labapristi kuNkulunkulu uYise, kakube kuye ubukhosi lamandla kuze kube nininini. Ameni.

⁷ Khangelani, uyeza lamayezi; amehlo wonke azakumbona, labo bonke abamgwazayo; lezizwe zonke zomhlaba zizakulila ngenxa yakhe. Yebo, kuzakuba njalo. Ameni.

⁸ Mina nginguAlfa loOmega, kutsho iNkosi uNkulunkulu okhona lowayekhona lozakuba khona, uSomandla.

UKristu uzibonakalisa kuJohane

⁹ Mina Johane, umzalwane wenu lohlanganyela kanye lani ekuhluphekeni lasembusweni lasekubekezeleni esilakho kuJesu, ngangisesihlengeni esithiwa yiPatmosi ngenxa yelizwi likaNkulunkulu langenxa yokufakazela uJesu.

¹⁰ Ngehlelwa nguMoya ngosuku lweNkosi, ngezwa ngemva kwami ilizwi elikhulu kungathi ngelophondo lisithi:

¹¹ Lokho okubonayo kulobe encwadini, uyithumele emabandleni ayisikhombisa, kwelaseEfesu lelaseSemerna lelasePergamo lelaseTiyathira lelaseSardisi lelaseFiladelfiya lelaseLawodikeya.

¹² Ngasengiphenduka ukuba ngimbone lowo obekhuluma lami; ngithe ngiphenduka, ngabona izinti zezibane zegolide eziyisikhombisa;

¹³ phakathi kwezinti zezibane kukhona ofana lomuntu, embethe ingubo ekhawula enyaweni, ezibophe ngeqhele legolide esifubeni sakhe;

¹⁴ ikhanda lakhe lenwele zakhe kwakumhlophe njengoboya bezimvu obunjengongqoqwane, lamehlo akhe enjengamalangabi omlilo,

¹⁵ lenyawo zakhe zifana lethusi elikhazimulayo elihlanjululwe ngokutshiswa esithandweni somlilo, lelizwi lakhe lalinjengenhlokomo yamanzi amanengi.

¹⁶ Wayephethe izinkanyezi eziyisikhombisa esandleni sakhe sokunene, lasemlonyeni wakhe kwaphuma umhedla obukhali inxa zombili, lobuso bakhe bunjengelanga elikhanya ngamandla.

¹⁷ Ngathi ukumbona ngawela ngasezinyaweni zakhe ngaba njengofileyo; kodwa wasebeka isandla sakhe sokunene phezu kwami esithi: Ungesabi; mina ngingowokuqala lowokucina,

¹⁸ lophilayo; ngangifile, khathesi sengikhona ngiphila kuze kube nininini, ngilamakhiye okufa lawendawo yabafileyo.

¹⁹ Ngakhoke loba okubonayo okukhona lokuzakwenzeka emva kwalokhu.

²⁰ Nansi imfihlakalo yezinkanyezi eziyisikhombisa ozibonileyo esandleni sami sokunene, leyezibane zegolide eziyisikhombisa; inkanyezi eziyisikhombisa ziyizithunywa zamabandla ayisikhombisa, izibane eziyisikhombisa zingamabandla ayisikhombisa.