AmaHubo 90 - iBhayibhili Elingcwele 1978

UGWALO LWESINE UNkulunkulu ongapheliyo lokuphela komuntu

¹ Nkosi, wena uyisiphephelo sethu ezizukulwaneni zonke.

² Zingakaveli intaba, ungakawenzi umhlaba lelizwe, kusukela endulo kuze kube nini lanini wena unguNkulunkulu.

³ Uyambuyisela umuntu othulini, uthi: Buyelani, bantwana babantu.

⁴ Ngoba iminyaka eyinkulungwane emehlweni akho injengezolo selidlulile, lanjengomzuzu ebusuku.

⁵ Wena uyabakhukhula abantu; banjengephupho, banjengotshani obuhluma ekuseni;

⁶ ekuseni buyahluma, bukhahlele, ntambama buyasikwa, bubune.

⁷ Ngoba siyaqedwa yikuthukuthela kwakho, sibhujiswe lulaka lwakho.

⁸ Ubekile iziphambeko zethu phambi kwakho, lezono zethu ezifihlakeleyo ekukhanyeni kobuso bakho.

⁹ Ngoba insuku zethu zonke ziyaqedwa lulaka lwakho, leminyaka yethu iphele masinyane njengesilokozane.

¹⁰ Iminyaka yokuphila kwethu ingamatshumi ayisikhombisa, kuthi loba siqinile ibe ngamatshumi aficaminwembili; kanti ibanga layo lingumzamo losizi, ngoba iphangisa ukuphela, lathi sedlule masinyane.

¹¹ Ngubani owaziyo amandla okuthukuthela kwakho na? owaziyo ukwesabeka kolaka lwakho na?

¹² Ngakho sifundise ukubala insuku zethu, ukuba sizuze inhliziyo elokuhlakanipha.

¹³ Buya, Nkosi! Koze kube nini uthukuthela na? Hawukela inceku zakho.

¹⁴ Sigcwalise ngothando lwakho olungapheliyo ekuseni, ukuze sithabe sijabule insuku zethu zonke.

¹⁵ Sithokozise kube ngangensuku owasihlupha ngazo, langeminyaka esabona okubi kuyo.

¹⁶ Izenzo zakho kazibonakale ezincekwini zakho, lobukhosi bakho ebantwaneni bazo.

¹⁷ Umusa wakho, Nkosi, Nkulunkulu wethu, kawube phezu kwethu, uphelelise umsebenzi wonke wezandla zethu.