AmaHubo 83 - iBhayibhili Elingcwele 1978

Umkhuleko wokuba zichithwe izitha zikaIsrayeli

¹ Nkulunkulu, ungathuli; ungazithuleli uthi zwi, Nkulunkulu.

² Ngoba, khangela, izitha zakho ziyaxokozela, labo abakuzondayo baphakamisile amakhanda abo.

³ Benzela abantu bakho ubuqili obubi, bacebisana ukuba balwe labavikelweyo bakho,

⁴ besithi: Wozani, sibaqothule, bangabe besaba yisizwe, lebizo likaIsrayeli lingabe lisakhunjulwa.

⁵ Benza amacebo nganhliziyonye, besenza isivumelwano ngawe —

⁶ abantu bakoEdoma labakoIshmayeli, labakaMowabi, lamaHagari,

⁷ lamaGebali, lamaAmoni, lamaAmaleki, leFilistiya kanye labakhileyo eTire;

⁸ leAsiriya lalo selihlanganise labo; laba bayingalo elamandla yenzalo kaLoti.

⁹ Yenza kubo njengokwenza kwakho kuMidiyani, lakuSisera, lakuJabini ngasemfuleni iKishoni,

¹⁰ ababhubhela eEndori, baphenduka baba ngumquba womhlabathi.

¹¹ Yenza izikhulu zabo zibe njengoOrebi loZeba, lawo wonke amakhosana abo abe njengoZeba loZalimuna,

¹² ababesithi: Kasizithathele amadlelo kaNkulunkulu.

¹³ Nkulunkulu wami, benze babe njengezibi eziphephukayo, njengomule ophetshulwa ngumoya,

¹⁴ njengomlilo otshisa ihlathi, njengelangabi elithungela intaba.

¹⁵ Ngokunjalo baxotshe ngesivunguvungu sakho, ubethuse ngesiphepho sakho.

¹⁶ Thela ubuso babo ngehlazo, ukuze balivume ibizo lakho, Nkosi.

¹⁷ Kabahlakazeke, baphele kuze kube nininini, badunyazwe babhubhe.

¹⁸ Kabazi ukuthi nguwe wedwa oyiNkosi, ongoPhezukonke emhlabeni wonke.