AmaHubo 80 - iBhayibhili Elingcwele 1978

Umkhuleko wokusizwa kukaIsrayeli

¹ Zwana, Malusi kaIsrayeli, wena okhokhela uJosefa njengomhlambi. Wena ohlezi esihlalweni sakho sobukhosi ngaphezu kwamakherubi, bonakala ngokukhanya

² phambi kukaEfrayimi loBenjamini loManase, vusa amandla akho uze usisize.

³ Sibuyise, Nkulunkulu, usikhanyisele ubuso bakho ukuze sikhululwe.

⁴ Nkosi Nkulunkulu wamabandla, uzathukuthelela imikhuleko yabantu bakho kuze kube nini na?

⁵ Wena ubafunzile usizi lezinyembezi, wabanathisa izinyembezi ngesilinganiso esikhulu.

⁶ Wena usenza sibe yinhlekisa yabakhelene lathi, lezitha zethu zihlekisana ngathi.

⁷ Sibuyise, Nkulunkulu wamabandla, usikhanyisele ubuso bakho ukuze sikhululwe.

⁸ Walikhupha ivini eGibithe, wazixotsha izizwe, walihlanyela lona.

⁹ Walicentela indawo, waligxumeka, lagcwala umhlaba wonke.

¹⁰ Izintaba zambeswa ngomthunzi walo, lezihlahla zomkusu zingatsha zalo;

¹¹ lakhuphela ingatsha zalo olwandle, lamahlumela alo emfuleni.

¹² Uyibhidlizeleni imiduli yalo, ukuze balikhe bonke abadlula ngendlela na?

¹³ Ingulube yasehlathini iyalihlikiza, lakho konke okuhlala egangeni kuyalidla.

¹⁴ Nkulunkulu wamabandla, akubuye futhi, ukhangele usezulwini, ubone, unanzelele ivini leli

¹⁵ eliyisihlahla esahlanyelwa yisandla sakho sokunene.

¹⁶ Balitshisile ngomlilo, baligamulela phansi; kungathi bangabhubha ngokubakhangela kwakho lapho ubakhuza!

¹⁷ Kodwa isandla sakho kasivikele umuntu wesandla sakho sokunene, umuntu oziqinisele yena.

¹⁸ Khona singasayikuhlehla kuwe; sivuselele, ng’khona sizakukhuleka ebizweni lakho.

¹⁹ Sibuyise, Nkosi Nkulunkulu wamabandla, usikhanyisele ubuso bakho ukuze sikhululwe.