AmaHubo 144 - iBhayibhili Elingcwele 1978

Ukunqoba lokuphumelela kuvela eNkosini

¹ Kayibongwe iNkosi, idwala lami, yona efundisa izandla zami ukuhlasela, leminwe yami ukulwa,

² idwala lami lenqaba yami, umphotshongo wami ophakemeyo lomkhululi wami, isihlangu sami, lengiphephela kuyo, ebeka izizwe ngaphansi kwami.

³ Nkosi, umuntu uyini ukuba umnanze, lendodana yomuntu ukuba ucabange ngayo na?

⁴ Umuntu unjengomoya, insuku zakhe zinjengesithunzi esidlulayo.

⁵ Khothamisa amazulu akho, Nkosi, wehlele phansi. Thinta izintaba zithunqe.

⁶ Phazimisa imibane yakho uzichithe izitha zakho, uthumele imitshoko yakho izihlakaze.

⁷ Yelula isandla sakho uphezulu, ungophule ungikhulule emanzini amanengi, lasesandleni sabezizwe,

⁸ abamilomo yabo ikhuluma amanga, abasandla sabo sokunene siyisandla senkohliso.

⁹ Ngizakuhlabela kuwe ingoma entsha, Nkulunkulu; ngizakukutshayela ichacho elilentambo ezilitshumi,

¹⁰ wena onika amakhosi ukunqoba, owophula inceku yakho uDavida.

¹¹ Ngophula emhedleni olesihluku, ungikhulule esandleni sabezizwe abamilomo yabo ikhuluma amanga, abasandla sabo sokunene siyisandla senkohliso.

¹² Kungathi amadodana ethu ebutsheni bawo angaba njengezihlahla esezikhulile, lamadodakazi ethu abe njengensika zengonsi ezilungiselwe ukwakha isigodlo!

¹³ Kungathi iziphala zethu zingagcwala zibe lenhlobo zonke zokudla, lezimvu zethu zizale izinkulungwane, yebo, lezinkulungwane ezilitshumi emagangeni ethu!

¹⁴ Kungathi inkomo zethu zingaba lamankonyane amanengi, zingaphunzi ekuzaleni kwazo, kungabi khona ukukhala endleleni zethu!

¹⁵ Babusisiwe abantu abanjalo; babusisiwe abantu abaNkulunkulu wabo yiNkosi.