AmaHubo 135 - iBhayibhili Elingcwele 1978

Ukudumisa iNkosi ngezimangaliso zayo

¹ Dumisani iNkosi! dumisani ibizo leNkosi, dumisani lina zinceku zeNkosi,

² lina elima endlini yeNkosi, emagumeni endlu kaNkulunkulu wethu.

³ Dumisani iNkosi, ngoba ilungile; hlabelelani ibizo layo, ngoba ilomusa.

⁴ Ngoba iNkosi izikhethele uJakobe, loIsrayeli ukuba abe ngowayo.

⁵ Ngiyazi ukuthi iNkosi yinkulu, lokuthi iNkosi yethu iphezu kwabo bonke onkulunkulu.

⁶ Konke iNkosi ekuthandayo iyakwenza, ezulwini lasemhlabeni, olwandle lasezinzikini zonke.

⁷ Yiyo ekhupha amayezi emikhawulweni yomhlaba, eyenza imibane ihambe ndawonye lezulu, ekhupha imimoya eziphaleni zayo.

⁸ Yiyo eyabulala amazibulo aseGibithe, awabantu kanye lawenyamazana;

⁹ eyathuma izibonakaliso lezimangaliso phakathi kwakho, Gibithe, phezu kukaFaro lezinceku zakhe zonke.

¹⁰ Yatshaya izizwe ezinengi, yabulala amakhosi alamandla,

¹¹ uSihoni inkosi yamaAmori, loOgi inkosi yaseBashani, lawo wonke amakhosi aseKanani,

¹² yanikela ilizwe labo laba ngelabantu bayo, ngelikaIsrayeli, isizwe sayo.

¹³ Ibizo lakho, Nkosi, limi kuze kube nininini, lodumo lwakho, Nkosi, lumi kuzo zonke izizukulwana.

¹⁴ Ngoba iNkosi izakwahlulela abantu bayo, ibe lesihawu ezincekwini zayo.

¹⁵ Izithombe zezizwe ngezesiliva legolide, umsebenzi wezandla zabantu.

¹⁶ Zilemilomo, kodwa kazikhulumi; zilamehlo, kodwa kaziboni;

¹⁷ zilendlebe, kodwa kazizwa; lomoya kawukho emilonyeni yazo.

¹⁸ Abazenzayo bafana lazo, kanye labo bonke abathemba kuzo.

¹⁹ Wena ndlu kaIsrayeli, bonga iNkosi; wena ndlu kaAroni, bonga iNkosi;

²⁰ lawe ndlu kaLevi, bonga iNkosi. Lina eliyesabayo iNkosi, ibongeni iNkosi.

²¹ Kayibongwe iNkosi eZiyone, yona ehlala eJerusalema. Dumisani iNkosi!