AmaHubo 113 - iBhayibhili Elingcwele 1978

Ukubonga iNkosi ngokuphakamisa abahluphekayo

¹ Dumisani iNkosi! Dumisani, lina zinceku zeNkosi, dumisani ibizo leNkosi.

² Kalibongwe ibizo leNkosi kusukela kulesisikhathi kuze kube nininini.

³ Kusukela ekuphumeni kwelanga kuze kube sekutshoneni kwalo ibizo leNkosi kalidunyiswe.

⁴ INkosi iphakeme phezu kwezizwe zonke, lobukhosi bayo phezu kwamazulu.

⁵ Ngubani onjengeNkosi uNkulunkulu wethu ehlezi phezulu,

⁶ kodwa ekhangela phansi ezulwini lasemhlabeni na?

⁷ Iyamvusa ohluphekayo othulini, imphakamise umyanga esilotheni,

⁸ ukuze ibahlalise lezikhulu, izikhulu zabantu bayo.

⁹ Inyumba iyayinika umuzi, iyenze ibe ngunina wabantwana othokozayo. Dumisani iNkosi!