AbaseRoma 1 - iBhayibhili Elingcwele 1978

Isibingelelo

¹ Mina Pawuli, inceku kaKristu Jesu ebizelwe ukuba ngumphostoli, yahlukaniselwa ivangeli likaNkulunkulu,

² alithembisa ngaphambili ngabaprofethi bakhe emibhalweni engcwele.

³ Lona limayelana leNdodana yakhe eyazalwa enzalweni kaDavida ngokwenyama,

⁴ kodwa ngokukaMoya wobungcwele yabonakaliswa ngamandla ukuthi iyiNdodana kaNkulunkulu ngokuvuka kwabafileyo, uJesu Kristu iNkosi yethu.

⁵ Samukela ngaye umusa lobuphostoli ukuba kube khona ukulalela kokukholwa ezizweni zonke ngenxa yebizo lakhe,

⁶ elikuzo lani elingababiziweyo bakaJesu Kristu.

⁷ Ngithi kubo bonke abathandiweyo nguNkulunkulu abaseRoma ababizelwe ukuba ngabangcwele: Kakube kini umusa lokuthula okuvela kuNkulunkulu uBaba, laseNkosini uJesu Kristu.

Isifiso sikaPawuli ukutshumayela ivangeli eRoma

⁸ Kuqalake ngibonga uNkulunkulu wami ngoJesu Kristu ngani lonke, ngoba ukukholwa kwenu kunconywa emhlabeni wonke.

⁹ UNkulunkulu, engimkhonza emoyeni wami ngevangeli leNdodana yakhe, ungufakazi wami wokuthi kangiyekeli ukulikhumbula emikhulekweni yami

¹⁰ ngikhulekela ukuba, uba kungenzeka ngentando kaNkulunkulu, ngiphumelele ukuza kini.

¹¹ Ngoba ngilangatha ukulibona ukuze ngilabele isiphiwo esithile sokomoya ukuba liqiniswe,

¹² ngitsho ukuthi ngiduduzeke kanye lani, mina ngokukholwa kwenu lani ngokukholwa kwami.

¹³ Ngithanda, bazalwane, ukuba lazi ukuthi ngazimisela kanengi ukuza kini, ukuba ngizuze izithelo lakini njengakwezinye izizwe, kodwa ngabambeka kuze kube khathesi.

¹⁴ Ngilomlandu kumaGriki lakwabezizwe, kwabahlakaniphileyo lakuzo izithutha.

¹⁵ Ngakhoke ngilesifiso esikhulu sokutshumayela lakini baseRoma.

¹⁶ Ngoba kangilanhloni ngevangeli; lingamandla asilisayo kaNkulunkulu kulowo okholwayo, kumJuda kuqala lakumGriki.

¹⁷ Ngoba ukulunga kukaNkulunkulu kwambulwa kilo, kuqala ngokukholwa, kuphele ngokukholwa; njengokulotshiweyo ukuthi: Olungileyo uzakuphila ngokukholwa.

Intukuthelo kaNkulunkulu ngezono zabezizwe

¹⁸ Ngoba ulaka lukaNkulunkulu oluvela ezulwini luyabonakala phezu kwabo bonke ububi lokungalungi kwabantu abavimbela iqiniso ngokungalungi kwabo.

¹⁹ Ngoba lokho okwaziwayo ngaye uNkulunkulu kusobala phakathi kwabo; ngoba uNkulunkulu ukubonakalisile kibo.

²⁰ Selokhu kwadatshulwa umhlaba isimo sakhe esingabonwayo, okutsho amandla akhe angelakuphela lobuNkulunkulu bakhe, kubonakele ngokusobala, kubonakaliswa ngezenzo zakhe. Ngakhoke kabalakuzivikela;

²¹ ngoba kuthe bemazi uNkulunkulu, kabamdumisanga njengoNkulunkulu, kabambonganga; ngakho ukucabanga kwabo konke kwaba yize, ingqondo zabo ezingaqondiyo zaba mnyama.

²² Bezitshaya abahlakaniphileyo, baba yizithutha,

²³ lenkazimulo kaNkulunkulu ongabhubhiyo bayiphendula yafana lomfanekiso womuntu obhubhayo, lowezinyoni, lowezinyamazana, lowokuhuquzelayo.

²⁴ Ngalokhoke uNkulunkulu wabayekela emanyaleni ezinkanuko zenhliziyo zabo ukuba badumaze imizimba yabo,

²⁵ ngoba baphendula iqiniso ngoNkulunkulu balenza amanga, bakhuleka bekhonza okudaliweyo kuloMdali ongobongekayo kuze kube nininini; Ameni.

²⁶ Ngenxa yalokho uNkulunkulu wabayekela enkanukweni ezimbi. Abesifazana babo baphendula ukwenza kwemvelo kwaba ngokuphambene lemvelo.

²⁷ Ngokunjalo labesilisa bayekela ukwenza kwemvelo esifazaneni, batsha ngokukhanukana; abesilisa benzana okulihlazo, bamukeliswa umvuzo ofanele ukuduha kwabo.

²⁸ Kuthi njengalokhu bengakunanzanga ukumazi uNkulunkulu, uNkulunkulu wabayekela baba lenhliziyo ebolileyo ukuba benze okungafanelanga,

²⁹ begcwele konke ukungalungi, lobubi, lomhawu, lenzondo; begcwele umona, lokubulala, lenkani, lenkohliso, lolunya; bengabahlebayo

³⁰ labanyeyayo, labazonda uNkulunkulu, labangelamakhanda, labazigqajayo, labazikhukhumezayo, labaqambi bokubi, labangalaleli abazali,

³¹ labayizithutha, labangathembekanga, labangelathando, labangelasihawu;

³² bewazi umthetho kaNkulunkulu wokuthi abenza okunjalo bafanele ukufa, kodwa bayakwenza; futhi bavumelana labakwenzayo.