Abahluleli 4 - iBhayibhili Elingcwele 1978

UDebora loBaraki banqoba uSisera

¹ AbakoIsrayeli babuya benza okubi phambi kweNkosi esefile uEhudi.

² INkosi yabanikela esandleni sikaJabini inkosi yaseKanani owayebusa eHazori. Induna yempi yakhe yayinguSisera, owayehlala eHaroshethi elabezizwe.

³ AbakoIsrayeli bakhala eNkosini ukuba ibasize, ngoba uSisera wayelezinqola zokulwa zensimbi ezingamakhulu aficamunwemunye, wabacindezela kakhulu abakoIsrayeli iminyaka engamatshumi amabili.

⁴ UDebora umprofethikazi umkaLapidothi wayengumahluleli koIsrayeli ngalesosikhathi.

⁵ Wayehlala ngaphansi kwesihlahla selala sikaDebora phakathi kweRama leBetheli ezintabeni zakoEfrayimi. AbakoIsrayeli babesiza kuye ukwahlulelwa.

⁶ Wathumela ilizwi ukubiza uBaraki indodana kaAbinowama eKedeshi koNafitali, wathi kuye: INkosi, uNkulunkulu wakoIsrayeli, iyakulaya ithi: Hamba uyebuthanisa abantu entabeni yaseTabori, uthathe izinkulungwane ezilitshumi esizweni sakoNafitali lesakoZebuluni;

⁷ ngizamenza uSisera induna yempi kaJabini ukuba akuhlangabeze emfuleni iKishoni lezinqola zakhe zokulwa lamabutho akhe, ngimnikele esandleni sakho.

⁸ UBaraki wathi kuye: Uba uhamba lami, ngizahamba; kodwa uba ungahambi lami, kangiyikuhamba.

⁹ Yena wathi: Impela ngizahamba lawe, kodwa ukwenza kwakho kakuyikukulethela udumo, ngoba iNkosi izanikela uSisera esandleni sowesifazana. Wasesuka uDebora, wahamba loBaraki eKedeshi.

¹⁰ UBaraki wabiza abakoZebuluni labakoNafitali ukuba beze eKedeshi; abantu abazinkulungwane ezilitshumi bamlandela, loDebora wahamba laye.

¹¹ UHeberi umKeni wayehlukana lamaKeni, abantwana bakaHobabi uyisezala kaMose, wamisa ithente lakhe ngasesihlahleni esikhulu eZananimi eliseduze leKedeshi.

¹² USisera esebikelwe ukuthi uBaraki indodana kaAbinowama useye entabeni yaseTabori,

¹³ wabiza zonke inqola zakhe zokulwa ezingamakhulu aficamunwemunye ezensimbi, labo bonke abantu ababelaye, kusukela eHaroshethi labezizwe kuze kufike emfuleni iKishoni.

¹⁴ UDebora wathi kuBaraki: Vuka! ngoba yilo lolusuku iNkosi enikele ngalo kuwe uSisera. Yebo, isihambile phambi kwakho. Ngakho uBaraki wasesehla entabeni iTabori elandelwa ngabantu abazinkulungwane eziIitshumi.

¹⁵ Ekuhlaseleni kukaBaraki labantu bakhe iNkosi yamchitha uSisera lazo zonke inqola zakhe zokulwa layo yonke impi yakhe. USisera wehla enqoleni yakhe yokulwa, wabaleka ngenyawo.

¹⁶ UBaraki waxotshana lazo inqola zokulwa kanye lempi, waze wafika eHaroshethi labezizwe, yonke impi kaSisera yabulawa, kakusalanga muntu.

¹⁷ Kodwa uSisera wabaleka ngenyawo, wafika ethenteni likaJayeli umkaHeberi umKeni, ngoba kwakukhona ukuzwana phakathi kukaJabini waseHazori lendlu kaHeberi umKeni.

¹⁸ UJayeli waphuma ukuhlangabeza uSisera, wathi kuye: Phambuka, nkosi yami, phambukela kimi, ungesabi. Ngakho wasephambukela kuye, wamembesa ngengubo.

¹⁹ Yena wathi kuye: Akunginathise amanzi ngoba ngomile. Wasesibukula igula lochago, wamnathisa lona, wabuya wamembesa.

²⁰ Yena wathi kuye: Mana emnyango wethente, uba kufika umuntu ekubuza esithi: Kukhona olapha na? uthi: Atshi.

²¹ Kodwa uJayeli umkaHeberi wathatha isikhonkwane sethente, waphatha isando esandleni, wamnyenyela, wabethela isikhonkwane esikhaleni sobuso saze sathutshela phansi, eselele ubuthongo ngenxa yokudinwa. Wafa ngokunjalo.

²² UBaraki weza edinga uSisera, uJayeli wamhlangabeza wathi kuye: Woza, ngizakukutshengisa umuntu omdingayo. Wasengena ethenteni lakhe, wambona uSisera elele esefile, isikhonkwane sethente sigxumekile esikhaleni sobuso bakhe.

²³ Ngalolosuku uNkulunkulu wabanika abakoIsrayeli ukunqoba uJanini inkosi yaseKanani.

²⁴ AbakoIsrayeli baqhubeka ukumhlasela uJabini inkosi yaseKanani baze bamqeda nya.