Abahluleli 2 - iBhayibhili Elingcwele 1978

Isithunywa seNkosi eBokimi

¹ Isithunywa seNkosi sasuka eGiligali saya eBokimi, sathi: Ngalikhupha eGibithe, ngaliletha elizweni engafunga ukulinika okhokho benu. Ngathi kangisoze ngisaphule isivumelwano sami lani;

² lani kaliyikwenza isivumelwano labakhileyo balelilizwe, lizadiliza ama‐altare abo. Kodwa kaliwulalelanga umlayo wami. Kuyini lokhu elikwenzileyo na?

³ Khathesike ngithi kangiyikubaxotsha phambi kwenu, kodwa bazakuba yizitha zenu, labonkulunkulu babo babe ngumjibila kini.

⁴ Kwathi isithunywa seNkosi sesikhulume lawomazwi kubo bonke abakoIsrayeli, badazuluka bakhala.

⁵ Leyondawo bayibiza ngokuthi liBokimi, bayihlabela iNkosi lapho.

Ukufa kukaJoshuwa

⁶ UJoshuwa esebadabulele abantu, abakoIsrayeli basuka ukuyakwakha elizweni, kwaba yilowo lalowo waya endaweni yakhe.

⁷ Abantu bayikhonza iNkosi kuzo zonke insuku zikaJoshuwa, lezabadala abasalayo ababewubonile umsebenzi omkhulu iNkosi eyawenzela uIsrayeli.

⁸ UJoshuwa indodana kaNuni, inceku yeNkosi, wafa eleminyaka elikhulu letshumi.

⁹ Bamngcwabela endaweni yakhe eTiminathi‐Heresi ezintabeni zakoEfrayimi, ngasenyakatho kwentaba iGashi.

¹⁰ Laso sonke lesosizukulwana safa, sambelwa kwabakibo; kwavela esinye emva kwaso esasingayazi iNkosi lomsebenzi eyayiwenzele uIsrayeli.

Okubi kukaIsrayeli

¹¹ AbakoIsrayeli benza okubi phambi kweNkosi, bakhonza oBali,

¹² batshiya iNkosi, uNkulunkulu wabokhokho babo, eyabakhupha elizweni laseGibithe, balandela abanye onkulunkulu, onkulunkulu bezizwe ababehlala phakathi kwazo, bakhothama kibo, bayithukuthelisa iNkosi.

¹³ Batshiya iNkosi, bakhonza oBali laboAshera.

¹⁴ Ngakho ulaka lweNkosi lwavutha kuIsrayeli, yabanikela kubaphangi ababaphangayo; yabanikela emandleni ezitha zabo ezazibahanqa, behluleka ukumelana lazo.

¹⁵ Loba besiya ngaphi, isandla seNkosi sabenzela okubi njengokutsho kwayo lanjengokufunga kwayo kibo, bahlupheka kakhulu.

Ukumiswa kwabahluleli

¹⁶ INkosi yasibamisela abahluleli ababophula emandleni alabo ababaphangayo.

¹⁷ Kanti kababalalelanga abahluleli babo, baphinga ngokukhonza abanye onkulunkulu, bakhothama kibo, baphambuka masinyane endleleni okhokho babo ababehamba kuyo, ababelalele imilayo yeNkosi. Bona kabayilalelanga iNkosi.

¹⁸ Lapho iNkosi ibamisela umahluleli yayisiba laye, ibophule ezandleni zezitha zabo zonke insuku zomahluleli; ngoba iNkosi yayisiba lesihawu ngokububula kwabo ngenxa yalabo ababahluphayo lababacindezelayo.

¹⁹ Kodwa kuthi lapho umahluleli esefile, babuyele emuva benze okubi ukwedlula okhokho babo, balandele abanye onkulunkulu, babakhonze bakhothame kibo; kabayekelanga lokukodwa kwezenzo zabo lokwendlela zabo zenkani.

²⁰ Ngalokhoke ulaka lweNkosi lwavutha kuIsrayeli, yathi: Ngoba lababantu basaphule isivumelwano sami engasilaya okhokho babo, kabalilalelanga ilizwi lami,

²¹ kangisayikuxotsha phambi kwabo lezozizwe uJoshuwa azitshiya ekufeni kwakhe,

²² ukuba ngihlole ngazo uIsrayeli ukuba bazananzelela yini ukuhamba endleleni yeNkosi njengabokhokho babo.

²³ Ngakho iNkosi yaziyekela lezozizwe, kayaze yazixotsha masinyane, kayizinikelelanga emandleni kaJoshuwa.