2 ImiLando 2 - iBhayibhili Elingcwele 1978

Isivumelwano sikaSolomoni loHuramu

¹ USolomoni wazimisela ukwakhela ibizo leNkosi ithempeli, lokuzakhela isigodlo.

² Wakhetha amadoda azinkulungwane ezingamatshumi ayisikhombisa ukuthwala imithwalo, layizinkulungwane ezingamatshumi aficaminwembili ukumba amatshe ezintabeni, layizinkulungwane ezintathu lamakhulu ayisithupha ukuba ngabaphathi.

³ USolomoni wathumela ilizwi kuHuramu inkosi yaseTire esithi: Njengokwenza kwakho kuDavida ubaba umthumela amaphane okuzakhela indlu yokuhlala, yenza njalo lakimi.

⁴ Sengizimisele ukwakhela ibizo leNkosi uNkulunkulu wami indlu, ngiyahlukanisele iNkosi ukuba ngitshisele khona impepha elephunga elihle, lokunikela insuku zonke izinkwa ezahlukaniselwe uNkulunkulu, leminikelo yokutshiswa ekuseni lantambama, langamaSabatha, langezikhathi zokuthwasa kwenyanga, langezikhathi zemikhosi emisiweyo yeNkosi uNkulunkulu wethu, njengokumiselwe uIsrayeli kuze kube nininini.

⁵ Indlu engizayakha izakuba nkulu, ngoba uNkulunkulu wethu mkhulu kulabonkulunkulu bonke.

⁶ Kodwa ngubani olamandla okumakhela indlu lokhu iphezulu, yebo, lezulu eliphezulu kakhulu, lingelakumanela na? Minake ngingubani ukuba ngimakhele indlu ngaphandle kwendawo nje yokutshisela impepha phambi kwakhe na?

⁷ Ngakhoke akungithumele umuntu okwaziyo ukusebenza ngegolide langesiliva langethusi langensimbi langamalembu ayibubende labomvu laluhlaza, lokwaziyo ukubalaza, ozasebenza labanti bami abakwaziyo ukusebenza koJuda leJerusalema abamiswa ngubaba uDavida.

⁸ Ungithumele imikusu lamaphane lemikampa evela eLebanoni, ngoba ngiyazi ukuthi inceku zakho ziyakwazi ukugamula izihlahla zaseLebanoni; inceku zami zizasebenza lezakho,

⁹ ukuba zingilungisele izigodo ezinengi, ngoba indlu engizayakha izaba nkulu ngokumangalisayo.

¹⁰ Ngizanika inceku zakho ezizagamula izihlahla ukudla, amasaka amabele azinkulungwane ezingamatshumi amathathu lambili, lamasaka ebhali azinkulungwane ezingamatshumi amathathu lambili, lamatanka ewayini angamakhulu amabili lamatshumi amathathu, lamatanka amafutha angamakhulu amabili lamatshumi amathathu.

¹¹ UHuramu inkosi yaseTire waphendula ngencwadi ayithumela kuSolomoni wathi: Ngoba iNkosi uNkulunkulu ibathanda abantu bayo, ikwenzile waba yinkosi yabo.

¹² Wabuya wathi: Kayibongwe iNkosi uNkulunkulu kaIsrayeli eyenza izulu lomhlaba, enike inkosi uDavida indodana ehlakaniphileyo elengqondo lokuqedisisa ezayakhela iNkosi ithempeli, izakhele isigodlo.

¹³ Sengithumela kuwe umuntu okwaziyo ukusebenza olokuqedisisa, othiwa nguHuramu,

¹⁴ ozalwa yindodakazi yakoDani, uyise wayengowaseTire; uyakwazi ukusebenza ngegolide langesiliva langethusi langensimbi langamatshe langezigodo langamalembu ayibubende laluhlaza labomvu, langamalembu amahle, uyakwazi ukubalaza lokwenza imizebenzi yonke yobungcitshi angayinikwa, angasebenza lezingcitshi zakho lezingcitshi zenkosi yami uyihlo uDavida.

¹⁵ Inkosi yami kayithumele amabele lebhali lamafutha lewayini ezincekwini zayo ekuthembisileyo;

¹⁶ thina sizakukugamulela zonke izihlahla ozifunayo eLebanoni, sizenze iminyaba sizilethe kuwe ngolwandle eJopha ukuze uzise eJerusalema.

¹⁷ USolomoni wabala bonke abezizweni ababeselizweni lakoIsrayeli ngemva kokubalwa kwabo nguyise uDavida; baba zinkulungwane ezilikhulu lamatshumi amahlanu lantathu lamakhulu ayisithupha.

¹⁸ Wakhetha amadoda azinkulungwane ezingamatshumi ayisikhombisa ukuthwala imithwalo, layizinkulungwane ezingamatshumi aficaminwembili ukumba amatshe ezintabeni, layizinkulungwane ezintathu lamakhulu ayisithupha ukuwaphatha lokuwasebenzisa.