1 ImiLando 13 - iBhayibhili Elingcwele 1978

UDavida ufisa ukuletha umtshokotsho wesivumelwano eJerusalema

¹ UDavida wakhulumisana labaphathi bonke bezinkulungwane labamakhulu.

² Wathi kubo bonke abakoIsrayeli: Uba kulungile kini, uba kuyintando yeNkosi uNkulunkulu wethu, asithumeleni ilizwi kubafowethu abaseleyo elizweni lonke lakoIsrayeli lakubapristi lamaLevi emizini elamadlelo ukuba bezehlangana lathi.

³ Besesilanda futhi umtshokotsho wesivumelwano sikaNkulunkulu wethu, ngoba kasiwunanzanga ensukwini zikaSawuli.

⁴ Lonke ibandla lavuma ukwenza njalo, ngoba lokhu kwakukuhle emehlweni abo bonke abantu.

Umtshokotsho weNkosi ulethwa eJerusalema

⁵ UDavida wasebuthanisa bonke abakoIsrayeli kusukela eShihori laseGibithe kuze kube sekungeneni kweHamathi ukuba balande umtshokotsho kaNkulunkulu eKiriyathi‐Jeyarimi.

⁶ UDavida labo bonke abakoIsrayeli baya eBala, eKiriyathi‐Jeyarimi elakoJuda, ukuba bayethatha lapho umtshokotsho kaNkulunkulu obizwa ngebizo leNkosi esihlalo sayo sobukhosi siphezu kwamakherubi.

⁷ Bawuthwala umtshokotsho kaNkulunkulu ngenqola entsha, bewususa endlini kaAbinadaba, uUza loAhiyo babetshayela leyonqola.

⁸ UDavida labo bonke abakoIsrayeli babesina phambi kukaNkulunkulu ngamandla wonke, behlabela, betshaya imihubhe, lamachacho, lezingungu, lezigubhu, lezimpondo.

⁹ Lapho befika esizeni sikaKidoni, uUza welula isandla sakhe ukubamba umtshokotsho wesivumelwano, ngoba inkabi zazikhubeka.

¹⁰ INkosi uNkulunkulu yamthukuthelela uUza, yahle yamtshaya khona lapho, ngoba welulela isandla sakhe emtshokotshweni; wafela khona lapho phambi kukaNkulunkulu.

¹¹ UDavida wakhathazeka ngoba iNkosi imtshayile uUza; leyondawo yasithiwa yiPerezi‐Uza kuze kube lamhla.

¹² UDavida wamesaba uNkulunkulu ngalolosuku, wathi: Pho, umtshokotsho kaNkulunkulu ngingawulondoloza njani na?

¹³ Ngakhoke uDavida kasawulethanga umtshokotsho emzini kaDavida, wasewuphambulela endlini kaObedi‐Edoma waseGithi.

¹⁴ Umtshokotsho kaNkulunkulu wahlala endlini kaObedi‐Edoma inyanga ezintathu. INkosi yambusisa uObedi‐Edoma lakho konke okwakhe.