1 ImiLando 10 - iBhayibhili Elingcwele 1978

Ukufa kukaSawuli lamadodana akhe

¹ AmaFilistiya alwa labakoIsrayeli; abakoIsrayeli behlulwa, abanengi bafela entabeni yaseGilibowa.

² AmaFilistiya axotshana loSawuli lamadodana akhe; abulala uJonathani loAbinadaba loMalikishuwa, amadodana kaSawuli.

³ Impi yaba nzima kuSawuli, abatshoki bemitshoko bamfica, bamlimaza kubi.

⁴ USawuli wasesithi kumphathi wezikhali zakhe: Khokha umhedla wakho, ungibulale ngawo, funa laba abangasokanga bafike, badlale ngami. Kodwa umphathi wezikhali zakhe kavumanga, ngoba wesaba kakhulu. Ngakho uSawuli wasethatha owakhe umhedla, waziwisela phezu kwawo.

⁵ Lapho umphathi wezikhali zakhe ebona ukuba uSawuli usefile, laye waziwisela phezu komhedla wakhe, wafa.

⁶ Wafake uSawuli, lamadodana akhe amathathu, labo bonke abendlu yakhe.

⁷ Kwathi lapho bonke abakoIsrayeli ababehlala esigodini bebona ukuthi abakoIsrayeli babalekile, lokuthi uSawuli lamadodana akhe sebefile, batshiya imizi yabo, babaleka; amaFilistiya afika, ahlala kiyo.

⁸ Kwathi kusasa lapho amaFilistiya efika ukuphanga ababuleweyo, bafica uSawuli lamadodana akhe befile entabeni yaseGilibowa.

⁹ Amhlubula, amquma ikhanda, alithatha kanye lezikhali zakhe, athumela ilizwi elizweni lonke lamaFilistiya ukumemezela lindaba ezithombeni zawo lebantwini.

¹⁰ Abeka izikhali zakhe ethempelini labonkulunkulu bawo, abethela ikhanda lakhe ethempelini likaDagoni.

¹¹ Kwathi lapho sebekuzwile abaseJabeshi‐Gileyadi lokho amaFilistiya akwenze kuSawuli,

¹² kwasuka wonke amaqhawe, athatha isidumbu sikaSawuli lezidumbu zamadodana akhe, aziletha eJabeshi, angcwaba amathambo abo ngaphansi kwesihlahla esikhulu eJabeshi, azila ukudla insuku eziyisikhombisa.

¹³ Wafa uSawuli ngoba wayengathembekanga eNkosini uNkulunkulu, engagcinanga umlayo wayo; futhi wabuya waya emadlozini edinga ukuqondiswa,

¹⁴ kakudinganga eNkosini. Ngalokhoke iNkosi yambulala, umbuso yawunika uDavida indodana kaJese.