Tátɔ̀ 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ Gèɖèpɔ́ɔ̀ gbo-nì-nyɔ̀, ké ḿ mɔ̀ Jízɛ̀ Kɛ́ɖɛ́ìɛ̀ àpɔ́sò. Ɔ mɔ́ ɓɛ́ ḿ ké nyɔ ɓě ɓɛ́ Gèɖèpɔ́ɔ̀ ɖǎà gãa gbo kpá ɖé waà hwìɖǐǐ-taɓa-taɓaɔ̀ mú, ɔ kè ɓɛ́ ḿ ké wa jǎà-hwìè ɓɛ́ ɔ ɓáà Gèɖèpɔ́ɔ̀ ɓiè-ɓiè dyíɛɛ da zàìn

² ɓó sè-ná-sèɛ̀ fɛ̀ɛ̀ɔ̀ hwòɖǒ kɔ̃ dè jè. Gèɖèpɔ́ɔ̀ mɔ̀ nyɔ ní tɔ́mɔ́à seɛɛ mɔ̀ nyɔ ɖáìn ma à fɛ̀ɛ̀ nìà kɛ nyɛ́nɛ́ín, hwɛ̀ ké ɓóɖó-kpàà nì ma.

³ Ké ɔ tɛ̀mɛ̀ìn ma nyɔǔn ɔ jè dyí ɓó ti déínɔ̀ xwíníín, ɖé ɔ wuɖuɔ̀ mú. Gèɖèpɔ́ɔ̀ nyí ma ḿ ɔ wuɖu ɓěɔ̀, ké ḿ poɛ jè zio, sepóɛɖé Gèɖèpɔ́ɔ̀ mɔ̀à à Póìn-nyɔ̀ɔ̀ kɛɛ cɛ̃ɛ ma náa ḿ gbo.

⁴ Ḿ zà mɔ̀ mɔ̀à Tátɔ̀ kɛɛ nyíɔún. M̀ mɔ̀ ní dyú jɛ́ɛ́ cá ɖé hwìɖǐǐ-taɓa-taɓa ɓɛ́ à peɖeàìn múɛɛ mú. Gèɖèpɔ́ɔ̀ mɔ̀à Ɓǎɔ̀ kɛ kè Kɛ́ɖɛ́ì Jízɛ̀ mɔ̀à à Póìn-nyɔ̀ɔ̀ kɛɛ mɛ po m̀ mana kɔ̃, ɓɛ́ wa ké m̀ gìɖìǐ nyí.

Kũ̀à Tátɔ̀ nyu ɖé Kíɖíì-tòò-kpòɔ̀ kɔ̃ɛ

⁵ Ḿ sè ma m̀ ɖé Kíɖíì-tòò-kpòɔ̀ kɔ̃, ɓɛ́ m̀ ké ɖɛ ɓě ɓɛ́ wa mɔ́ dyí-sɛ́ɖɛ́ìn-sɛ́ɖɛ́ìn nyɛɛ dyí sɛ́ɖɛ́ìn, ɔ kè ɓɛ́ m̀ ké cɔ́cì-nyɔ̀ vɛ̀nɛ̀ ɓě gã ɖé hwɔɖɔ séín mú. Ɖɛ ḿ cɛ̃ ma m̀ gboɛɛ mɛ nì m̀ hwìɖǐi.

⁶ Cɔ́cìɛ̀ nyɔ vɛ̀nɛ̀ mɛ mɔ̀ nyɔ se kɛɛ ɖò mú nìɛ. Ɔ mɛ kpɔ̃ nyɔ́nɔ́ dyúáɖò dyi, ké ɔ dyú ɓěɔ̀ mɛ mɔ̀ nyɔ ɓě taɓa Gèɖèpɔ́ɔ̀ hwìɖǐǐ, ké wa mɛ mɔ̀ nyɔ ɓě ɓɛ́ nyɔǔn ké seɛ wa kɔ̃ún cɛ̃ɛ ɓɛ́ìn kà ɓɛ́ wa fuɖuù, ké wa se wuɖuí kɔ̃̀ɔ̀ ɓɛ́ìn nyɛ.

⁷ Sepóɛɖé kà ɓɛ́ Gèɖèpɔ́ɔ̀ kũ̀àɔ̀ sèà ɔ gboɛɛ, nyɔ-kɔ̃in-gmɔìn-nyɔ̀ se ɓéɖé ɓɛ́ ɔ ké kɛɛ ɖò mú nì. Ɔ se ɓéɖé ɔ ké vɔ̃ ɓó ɔ mìɔùn hwòɖǒ dyi dè jè. Ɔ ní mɔ̀ dyoɖo-nyɔ̀. Nɔmɔɔ ní kɔ̃̀ ɔ wuɖuí. Ɔ ní ɖá ɓɛ́ ɔ ké hwɔ̀ɖɔ̀-gbàà-vɔ̃-nyɔ̀ jǔ, ké ɔ dyɔɔ̀ ní tɛɖɛ ɓó wíɖí-kpànà po jè.

⁸ Ɔ mɛ kpɔ̃ ɖéè ɓě jè dyi, ké ɔ mɛ ɖɛ̀ɓɛ̀ ɖɛ mɔ̀ ɖɛ nɔ̀mɔ̀ dyíin nyɛɛ mú. Ɔ hwòɖǒ mɛ ma mú, ké ɔ mɛ sɛ́ɖɛ́ìn dyí, ké ɔ mɛ hwɛ̀ mú, ké ɔ mɛ kpɔ̃ ɔ mìɔùn dyí.

⁹ Ɔ mɛ kpɔ̃ wuɖu ɓě ɓɛ́ nyɔǔn ɓɛ́ìn hwòɖǒ kɔ̃ dèɛ̀, ɓɛ́ wa ɓá tɛ̀mɛ̀ìn-ɖɛ̀ ɓěɔ̀ dyíɛɛ dyi tee. Ɔ dyiɛ kǎà náa nyu ní, ɔ mu kpé ɓɛ́ìn ɓɛ́ ɔ ké nyɔ tɔ̀ɔ̀ ɓě kpéí po dyììn ɖé jǎà-ɖɛ̀ tɛ̀mɛ̀ìn-tɛ̀mɛ̀ìnɔ̀ mú, ɔ kè ɓɛ́ ɔ ké nyɔ ɓě vɔ̃ ɔ gboɛɛ ɖɛ ɓě wa bĩà xwaa wa dyí tɛ̀mɛ̀ìn.

¹⁰ Sepóɛɖé nyɔ pàɖǎ nì, ké wa se dyí kpɔ̃ɔ ɓɛ́ìn. Wa cá nyɔǔn ɖé waà wuɖu fóɖóún ɓěɔ̀ mú. Nyɔ ɓě ɓɛ́ wa nyu ɖɛ nìà kɛ jɛ́ɛ́ kɛɛ mɔ̀ Júù-nyɔ̀ ɓě.

¹¹ Wa ɓéɖé wa ké wa ɓɔ́í po, sepóɛɖé wa nì gbǒ-xwíníín-nyɔ̀ gàná ɓě fũ̀à-fṹá nyùɛ̌n, sepóɛɖé wa tɛ̀mɛ̀ìn wa ɖɛ ɓě wa se ɓéɖé ɓɛ́ wa kéɔ́ wa tɛ̀mɛ̀ìn nyɛ. Wa nyuɛ náa, sepóɛɖé wa dyɔɔ̀ tɛɖɛ ɓó wíɖí-kpànà po jè.

¹² Wa mìɔùn nììn Kíɖíì-nyɔ̀ ɓěɔ̀ ɖò mɔ̀à waà kpáá-ɖɛ̀-cɛ̃-nyɔ̀ ɓěɔ̀ ɖòɛɛ ɖá, “Kíɖíì-nyɔ̀ ɓěɔ̀ mɔ̀ se-tɔ́mɔ́-nyɔ̀ kánáá pū. Wa mɔ̀ xwáɖá-xwíɖíi-nìmìì nyìnììn dyíin. Wa mɔ̀ fóó-nyɔ̀, ké wa kàmà ɖii-ɖɛ̀ jè.”

¹³ Ɖɛ ɔ cɛ̃à kɛɛ mɔ̀ jǎà. Ɔ jèɛɛ, m̀ mɛ po wa ɓɔ́í gana-kà, ɓɛ́ wa ké hwìɖǐǐ-taɓa-taɓa ɓéɖé nɔ̀mɔ̀ dyíin,

¹⁴ ɓɛ́ wa ké se Júù-nyɔ̀ ɓěɔ̀ nɔ́ɔ́ ɓěɔ̀ kè ɖɛ ɓě ɓɛ́ nyɔ ɓě ɖǎ ma jǎàɔ̀ ɓɔ́ɛɛ cɛ̃à kɛɛ ɖùǔ gbo tò.

¹⁵ Ɖɛ séín hwɛ̀ mú ɖé nyɔ ɓě ɓɛ́ wa hwɛ̀à múɛɛ gbo, kɛɛ ɖɛ ɖò se mú hwɛ̀ ɖé nyɔ ɓě ɓɛ́ wa nyìnìàìn dyíin, ké wa seà hwìɖǐǐ-taɓa-taɓa ɓéɖéɛɛ gbo. Sepóɛɖé waà fɔ̀nɔ̀-hwòɖǒ kè waà hwòɖǒ-xwíníín-hwòɖò-dyùà ɓěɔ̀ ɖǎ dyíin nyìnììn.

¹⁶ Wa ɖá wa dyuò Gèɖèpɔ́ɔ̀ dyí, kɛɛ kà wa nyuu-kpèɖè nyu nìɛ̀ kɛɛ tɛ̀mɛ̀ìn nyɔǔn dyí kà ɓɛ́ ɔ se jǎà kɛ. Wa nyàìn Gèɖèpɔ́ɔ̀ dyi. Wa ní nyu ɔ wuɖu. Wa se ɖɛ nɔ̀mɔ̀ dyíin ɖò nyuɛ ɓɛ́ìn.