Nɔ́ɔ́ 1 - Ɓǎsɔ́ɔ̀ Báɓòɔ̀

Kpáná nì fɔ̀nɔ̀-hwòɖǒ-nɔ̀ɔ̌ múɛ

¹ Nɔ́ɔ́ ɓě ɓɛ́ Sã́ɖómà mɔ̀à Dèɓéɛ̀ dyú-gàà, ɓɛ́ ɔ mɔ̀à Éézùɖùɛ̀-ɓòɖòɔ̀ kã́á kɛɛ po ma kɛɛ, wa kɛà kɛ̀.

² Wa mu m̀ gbo kpáùn, ɓɛ́ m̀ ké fɔ̀nɔ̀-hwòɖǒ cɛ̃́, ɓɛ́ m̀ ké náún-po-wùɖù ɓě kè ɖɛ-múin-ɖe-wùɖù ɓě múin wɔ̃́.

³ Wa muɛ m̀ tɛ̀mɛ̀ìn kà m̀ ké fɔ̀nɔ̀-hwòɖǒ-kà cĩ́ɛ nyu, ɓɛ́ m̀ ké dyí-sɛ́ɖɛ́ìn-ɖɛ̀ kè dyí-ɓɛ̀ɖɛ̀ìn-ɖɛ̀ ɔ kè jǎà-ɖɛ̀ nyuɛ.

⁴ Wa muɛ nyuùn ɓɛ́ nyɔ se hwòɖǒ kɔ̃in cɛ̃̀ɛ ké hwòɖǒ kɔ̃in cɛ̃̀, ɓɛ́ nyɔ gmɔ̀ ké ɖɛ-dyí-dyuò-dyuò kè ɖɛ-múin-ɖe-fɔ̀nɔ̀-hwòɖǒ ɓéɖé.

⁵ Wa mu nyɔ ɓɛ́ ɔ fɔ̀nɔ̀ hwòɖǒɛɛ ɖɛ-dyuò-dyuò kɔ̃ poùn, ké nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ, ɔ ɖɛ-dyuò-dyuò mu kɔ̃ kpáùn,

⁶ ɓɛ́ wa ké hwòɖǒ-fɔ̀nɔ̀-nɔ̀ɔ̌ ɓě kè ɖɛ-ɖɛí-poìn-nɔ̀ɔ̌ ɓě ɔ kè doìn-nɔ̀ɔ̌ ɓě múin wɔ̃́.

Gàa-dyù gmɔ̀ náún-po-wùɖù

⁷ Bounɓoɔ̀ dyi-fɛ̃̀ìn-fɛ̃̀ìn mɔ̀ hwòɖǒ-fɔ̀nɔ̀-fɔ̀nɔ̀ gbɔ-dè-dè. Kɛɛ zuɖuu-nyɔ̀ nyɛ́ fɔ̀nɔ̀-hwòɖǒ mú, ké ɔ ní kpɔ̃ náún-po-wùɖù dyi.

⁸ Ní dyú, kpɔ̃ m̀ ɓǎà ná-wùɖùɔ̀ dyi, ké mɔ̀ǔn ɖá ɓɛ́ m̀ ké ɖɛ ɓě ɓɛ́ m̀ ɖe ɖǎ m̀ tɛ̀mɛ̀ìn nyɛɛ dyi pɛ̃́ìn.

⁹ Waà tɛ̀mɛ̀ìn-ɖɛ̀ ɓěɔ̀ mu nì dúɔ̀ bɛ̃̀ìn-ɖɛ̀ jǔùn, ké wa mu ɖɔ-po-ɖɛ̀ jǔùn ɓó m̀ bìì.

¹⁰ Ní dyú, ɔ jǔ ké nàmàǔn-nyɔ̀ ɓě dyi m̀ pɛ́í po ní, mɔ̀ǔn ɖá m̀ ké wa gbo wɔ̃́ìn.

¹¹ Ti ɖòɛ̀ ɓaɖaín, wa muɛ cɛ̃ìn, ɓɛ́ wa ké níiń, “Dyi, ɓɛ́ ɓěà ké pìǐn kò, ɓɛ́ ɓěà ké nyɔ se ɖɛ gbà ɖò nyuɛɛ nyɔmɔɔ dyi wáɖáìn.

¹² Ɓěà mànàìn wa kpã kà xwɛ́-ɓìɔ̀ nyuà kɛ. Wa mɛ gã̀ ná ɓɛ́ ɓěà ké wa mana kà nyɔ ɓě ɓɛ́ wa muà ɖé xwɛ́-ɓìɔ̀ múɛɛ nìà kɛ.

¹³ À dyiɛ náa nyuín, à mu kɔ́mɔ́-ɖɛ̀ kúɖúú dyéìn, ké à mu à gbǒ ɓěɔ̀ ɖɛ ɓě ɓɛ́ à zà nyɔǔn xwaiɛɛ dyi dyíìn.

¹⁴ Dyi, ɓɛ́ m̀ ké à gbo kpá, ɓɛ́ ɓěà ké ɖɛ ɓě ɓɛ́ ɓěà zàà nyɔǔn xwaiɛɛ geìn.”

¹⁵ Ní dyú, wa dyiɛ náa cɛ̃ín, mɔ̀ǔn ɖá ɓɛ́ m̀ ké wa gbo wɔ̃́ìn, ɓɛ́ m̀ kè wa ké ɖɛ dyúáɖòɔ̀ nyu. Mɔ̀ǔn kpá waà hwìèɔ̀ xwíníín fɔɔ cá.

¹⁶ Sepóɛɖé nyɔ nì ná ɓěa ɓo fɛ̃́ìn xwa ɓó ɖɛ gbà gbo mu jè, ké wa fṹà xwai ɓó nyɔmɔɔ dyi wáɖáìn jè.

¹⁷ Nyɔ ɖò dyi naà-xwàɖà gbǎ ɓó naàɔ̀ dyéɖé waí ní, ɔ gbǎa pídyi.

¹⁸ Kɛɛ nyɔ ɓěa mɔ̀ùn se ná nì. Waà hwìè-fò-fòɔ̀ mɔ̀ ɓó wa mìɔùn nììn nyɔmɔɔ dyi wáɖáìn jè. Waà pìǐn-kò-kòɔ̀ mɔ̀ ɓó wa mìɔùn nììn fɛ̀ɛ̀ɔ̀ mú gbɔɔ̀ jè.

¹⁹ Kǎà ɔ nyu nìɛ̀ ɓá nyɔ ɓě ɓɛ́ wa zàìn nyɔ ɖɛ gana xwaa jè dyí. Dyíɖí-dyíɖí zà dyíɖíí-nyɔ̀ fɛ̀ɛ̀ xwa.

Fɔ̀nɔ̀-hwòɖǒ nì ɖáuń

²⁰ Fɔ̀nɔ̀-hwòɖǒ nì wuɖui poɛń ɖé hwɔɖɔɔ̀ píé hwòɖǒǔn kè ɖé ɖɛ-pèɖèìn-naín ɓěɔ̀.

²¹ Ɔ nì mú pánáuń dɛ̀ ɓɛ́ nyɔ kúɖúú ɓě poìn dyíɛ kè ɖé hwɔɖɔɔ̀ gmɔ-wɔ̃̀ɔ̀ gbo, ké ɔ ɖá,

²² “Tiɔ̀ nyɛ́ hwɛ̀ ɓɛ́ ɓě mɔ̀ nyɔ ɓě mɔ̀à se-hwòɖǒ-kɔ̃in-cɛ̃̀-ɖɛ̀ xwai-nyu-nyɔ̀ɛɛ ké ɓěɛ̀ se-hwòɖǒ-kɔ̃in-cɛ̃̀-kpèɖèɔ̀ ɓɔ́í poɛ́? Tiɔ̀ nyɛ́ hwɛ̀ ɓɛ́ ɓě mɔ̀ nyɔ-dyɔ́-ɓaɖa-nyɔ̀ ɓěɛɛ ké nyɔ dyɔ́ ɓaɖaa ɓɔ́ɛ́? Ké tiɔ̀ nyɛ́ hwɛ̀ ɓɛ́ ɓě mɔ̀ zuɖuu-nyɔ̀ ɓěɛɛ ké fɔ̀nɔ̀-hwòɖǒ mú nyɛ́ɛ ɓɔ́ɛ́?

²³ Ɓě tò ní nyɔ-náún-po-wùɖùɔ̀ gbo ɖùǔ, ké ní mu ní fɔ̀nɔ̀-hwòɖǒɔ̀ púèìn ɓó ɓě gbo. Ní muɛ nyuùn ɓɛ́ ɓě ké ní wuɖuɔ̀ dyí dyuò.

²⁴ Ḿ ɖá ɓě nío, kɛɛ ɓě se ní ɖá-wùɖùɔ̀ gbo wɔ̃́ìn mɔ́. Ḿ gba sɔ̃ xwáɖáí, kɛɛ nyɔ ɖòɛ̀ dyéɖé se ɖé nì.

²⁵ Kà ɓɛ́ ɓě seà ní ná-wùɖù ɓěɔ̀ ɖò dyi kpɔ̃, ké ɓě seà ní nyɔ-dyí-ɓàɖàìn-ɓàɖàìn ɓěɔ̀ ɖò gbo wɔ̃́ìn nyɛɛ,

²⁶ ti ɓɛ́ ɖɛ gbà mu ɓě kɔ̃ dyiìn nyɛɛ, ní mu ɓě kéɛ̀ìn. Ní mu ɓě dyɔ́ ɓaɖaùn, ti ɓɛ́ hwòɖǒ-dyií-gbǎìn-ɖɛ̀ mu ɓě kɔ̃ dyiìn nyɛ.

²⁷ Ɔ mɔ̀ ti ɓɛ́ hwòɖǒ-dyií-gbǎìn-ɖɛ̀ɔ̀ mu ɓě kɔ̃ dyiìn kà dìì dyià kɛ, ɓɛ́ ɖɛ gbà muà ɓě kɔ̃ dyiìn nyɛɛ ké nì kà wɔ́ɔ́-pìɔ̌ nìà kɛ. Ɔ mɔ̀ ti ɓɛ́ bũ̌in-puà-ɖɛ̀ kè fũ̀à-fṹá-ɖɛ̀ mu ɓě kɔ̃ dyiìn nyɛ.

²⁸ Ɔ ɖǎ ná nìǐn, ɓě mu ḿ ɖáùn ɓó tia ɓaɖa, kɛɛ ḿ se ɓě wɔ̃́ɔ mu. Ɓě mu ḿ dyi mɔ́ùn kóɖó-kóɖó, kɛɛ ɓě se ḿ da dyéɛ mu.

²⁹ Ɔ mu ná nììn, sepóɛɖé ɓě nyɛ́ ɖɛ-dyí-dyuò-dyuò mú, ké ɓě nɔ́ɔ̀ ɓó Bounɓoɔ̀ dyi fɛ̃̀ìn jè.

³⁰ Ɓě se ní ná-wùɖù ɓěɔ̀ ɖò dyi kpɔ̃, ké ɓě po ní nyɔ-dyí-ɓàɖàìn-wùɖù ɓěɔ̀ séín dyií dyi.

³¹ Ɔ ná nì jèɛɛ, ɖɛ ɓě ɓáà kɛɛ kɔ̃̀ ɓo ɓě mu ɖiìn, ké ɓě mìɔùn nììn hwòɖǒɛ̀-dyí-sɔ́-ɖɛ̀ɔ̀ mu ɓě kɔ̃ dyiìn.

³² Nyɔ ɓě ɓɛ́ wa se hwòɖǒ kɔ̃in cɛ̃̀ɛ, waà ḿ ɓɔ́-ɓɔ́ɔ̀ ɖáɓá wa ní. Ké zuɖuu-nyɔ̀ ɓěɔ̀ gbɔɔ̀ mú ɓó waà seé-kɔ̃̀ jè.

³³ Kɛɛ nyɔ ɓě ɓɛ́ wa mu ní wuɖuɔ̀ nyuùn wɛ̃ɛ mu ɖé gìɖìǐ mú cĩ́ìn, ké waà hwòɖǒ mu dyi dèìn. Wa se ɖɛ gbà ɖòɛ̀ fã̀à peɖeɛ́ mu.”