Fàɖímɔ̀ 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ kpɔɖɔ-ɖeín-nì-nyɔ̀ ɓó Kɛ́ɖɛ́ì Jízɛ̀ jè. Ḿ kè à ɖíí Tímétè zà mɔ̀ mɔ̀à à mǔè kũ̀à-nyu-nyɔ̀ Fàɖímɔ̀, ɓɛ́ à ɖɛ̀ɓɛ̀à múɛ

² kè cɔ́cì-nyɔ̀ ɓě poàìn dyí ɖé m̀ ɓíɖí-taún wɛ̃ kè à ɖíí-màà Áfìà ɔ kè Ákípà mɔ̀à à mǔè sójà kɛɛ nyíɔún.

³ Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké m̀ gìɖìǐ nyí.

Fàɖímɔ̀ɛ̀ hwìɖǐǐ-taɓa-taɓa kè ɖɛ̀ɓɛ̀ǐn-ɖɛ̀ɓɛ̀ǐn

⁴ Ti séín ɓàɖà ɓɛ́ ḿ ɓaà kɛɛ, ḿ wùɖù nì jè Gèɖèpɔ́ɔ̀ gbo, ké ḿ po ɔ zùo.

⁵ Sepóɛɖé ḿ wɔ̃́ɔ kà ɓɛ́ m̀ ɖɛ̀ɓɛ̀ Gèɖèpɔ́ɔ̀-nyɔ̀ séín ɓěɔ̀ mú, ké m̀ taɓa Bounɓo Jízɛ̀ hwìɖǐǐɛ.

⁶ Ḿ ɓaà ɓɛ́ gbo-kpɔ̃ìn-kpɔ̃ìn ɓɛ́ ɓěà ɓéɖéà dyììn ɖé Gèɖèpɔ́ɔ̀ hwìɖǐǐ-taɓa-taɓa múɛɛ kéɛ nyu ɓɛ́ ɓěà ké nɔ̀mɔ̀ dyíin séín ɓě ɓɛ́ ɓěà ɓéɖéà ɖé Kɛ́ɖɛ́ì múɛɛ dyí dyuò.

⁷ Ḿ ɖíí, nì ɖɛ̀ɓɛ̀ǐn-ɖɛ̀ɓɛ̀ǐnɔ̀ ɖǎa nyu ké ḿ ɖǎ múàǔn kpá mìɔ, ké ní hwòɖǒɔ̀ ɖǎ dyi dè cá. Sepóɛɖé m̀ ɖǎa nyu ké Gèɖèpɔ́ɔ̀-nyɔ̀ séín ɓěɔ̀ hwòɖǒ-dyùà ɓěɔ̀ ɖǎ kpéí kpá.

Pɔ́ɔ̀ ɓaà Ònɛ́símɔ̀ jè

⁸ Ɔ jèɛɛ, kà ɓɛ́ à nìà ɖé Kɛ́ɖɛ́ì múɛɛ, ḿ ɓɛ́ìn gàa-kà wùɖùɛ̀ cá, ɓɛ́ ḿ ké ɖɛ m̀ ɓéɖé ɓɛ́ m̀ kéɔ́ nyuɛɛ m̀ gbo cɛ̃.

⁹ Kɛɛ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ à ɓéɖéà kɛɛ nyuɛ ké ḿ nìà m̀ ɓaàǔn wɛ̃̀. Ḿ mɔ̀ Pɔ́ɔ̀, ké ḿ mɔ̀ Kɛ́ɖɛ́ì Jízɛ̀ bɛ̃̌ǐn-nyɔ̀, ké ḿ mɔ̀ kpɔɖɔ-ɖeín-nì-nyɔ̀ kàǔn ɓó ɔ jè dyɛo, kɛɛ ḿ nì m̀ ɓaàǔn.

¹⁰ Ḿ nì m̀ ɓaàǔn ɓó Ònɛ́símɔ̀ jè. Ɔ mɔ̀ ní dyú ɖé Kɛ́ɖɛ́ì mú. Ḿ kpá ma nɔ̄ kpɔɖɔɔ̀ ɖeín, hwɛ̀ ké ḿ mɔ̀à ɔ ɓǎ kɛ̀.

¹¹ Kĩ́ín nyɛɛ, ɔ se ma nyɔ ɓɛ́ ɔ ké ma m̀ gbo kpá kɛ. Kɛɛ kàǔn wɛ̃ɛ, ɔ ɓɛ́àǐn ḿ kè mɔ̀ gbo kpáa.

¹² Ḿ nìǎ ɔ ɖé m̀ gbo ɖe ɖoɓoɛń, ké ní hwòɖǒɔ̀ mu ɖé ɔ gbo nììn.

¹³ Ḿ muɔ́ɔ mú ɖɛ̀ɓɛ̀ìn ɓɛ́ ɔ kéɔ́ nɔ̄ ḿ gbo nì, kà ɓɛ́ ḿ nìà kpɔɖɔ ɖeín ɓó bɔ̃̌ nɔ̀mɔ̀ dyíinɔ̀ jèɛ, ɓɛ́ ɔ ké ḿ gbo kpá ɓó m̀ bɛ̃̌ǐn.

¹⁴ Kɛɛ wɛ̃́ɛ́ kɛɛ, ḿ se mɔ́ ɓɛ́ ḿ ké m̀ kɔ̃ nɛ́, ɓɛ́ m̀ ké nɔ̀mɔ̀ dyíin nyu. Kɛɛ ḿ muɔ́ɔ mú ɖɛ̀ɓɛ̀ìn ɓɛ́ m̀ kéɛ nyu ɖé hwòɖǒɛ̀-wɔ̃́-wɔ̃́ mú. Ɔ jèɛɛ, ḿ se ɖɛ ɖò nyuɛ́ mu, ɔ sèìn m̀ wɔ̃́ dyɛ hwɛ̀.

¹⁵ Ti ɖòɛ̀ ɓaɖaín, Ònɛ́símɔ̀ sɔ̀ ma ɖé m̀ gbo ɓó ti wè xwíníín, ɓɛ́ ɔ kéá ɖé m̀ gbo nì kánáá pū.

¹⁶ Sepóɛɖé kàǔn wɛ̃ɛ, ɔ se gǐì pū. Ɔ jè kpa ɖɛ ké ɔ zi gǐì dyí. Ɔ mɔ̀ à ɖɛ̀ɓɛ̀-ɖìǐ ɖé Kɛ́ɖɛ́ì mú. Ɔ jè kpa ɖɛ mìɔ ɖé ḿ gbo. Ké ɔ jè mu ɖɛ kpaùn mìɔ ɖé m̀ gbo ɖé nyɔǔn-dyùɛ̀ wáká kɔ̃, ɔ kè kà ɓɛ́ ɔ mɔ̀à m̀ ɖíí-gàà ɖé Bounɓoɔ̀ múɛ.

¹⁷ Ɔ jèɛɛ, ɔ jǔ ké m̀ dyiɛ hwìɖǐi poìn kà ɓɛ́ ḿ mɔ̀ m̀ ɓǎto kɛɛ ní, nìí, m̀ mɛ kpɔ̃ ɔ jè dyi kà m̀ muɔ́ mɔ́ún jè dyi kpɔ̃ɔ nyuùn wɛ̃.

¹⁸ Ɔ dyi ma m̀ ɖɛ gbà ɖò bũ̌ nyu, mɔɔ nì kpa ɖò dyi ɔ mú nìǐn, nìí, m̀ mɛ kpɔ̃ ḿ dyi ɓóɛ jè.

¹⁹ Mɔ̄ Pɔ́ɔ̀, ḿ mìɔùn nì nyɔà céèɛ̌n, ní muɛ pɛ́ɛ̀ìn. (Ḿ se ɓéɖé ɓɛ́ ḿ kéɛ m̀ hwìɖǐi dyà kà ɓɛ́ ɔ seɔ́ ní jè ní, m̀ seɔ́ fɛ̀ɛ̀ ɓéɖéɛ muɛ.)

²⁰ Ɔ jèɛɛ, ḿ ɖíí, m̀ mɛ kpá ḿ gbo ɓó Bounɓoɔ̀ jè. Kà ɓɛ́ à nìà Kɛ́ɖɛ́ì múɛɛ, m̀ mɛ po ní hwòɖǒɔ̀ kpéí.

²¹ Kà ɓɛ́ ḿ nìà ɖɛà céèɛ̌n nyɛɛ, ḿ dyuò kà nì mu ɖɛ ḿ nìà zɔ̀ǔn wɛ̃ɛ nyuùn wɛ̃. Ké ḿ dyuò kà nì mu ɔ pàɖǎ nyuùn wɛ̃.

²² Ké ɓó kɔ̃in ɖeɛɛ, m̀ mɛ dyéìn ní pɛ̃́-naín ti, sepóɛɖé ḿ dèɛ̀ hwòɖǒ kɔ̃ kà ɓɛ́ Gèɖèpɔ́ɔ̀ mu ɖɛ ɓě zɔ̀à kɛɛ ɓě nyíìn, ɓɛ́ ɔ kéɛ nyu ɓɛ́ ḿ ké ɖé ɓě gbo ɖe dyiɛ.

Cuò-wùɖù

²³ Ìpáfàɖà ɓɛ́ ḿ kèɔ̀ kè nìà kpɔɖɔ ɖeín ɓó Kɛ́ɖɛ́ì Jízɛ̀ jèɛɛ zà m̀ nyíɔún.

²⁴ Ké Máà kè Àwèɖèsákà kè Dímà ɔ kè Ɖúù mɔ̀à ní mǔè kũ̀à-nyu-nyɔ̀ ɓěɛɛ zà m̀ nyíɔún ɖekè.

²⁵ Bounɓo Jízɛ̀ Kɛ́ɖɛ́ì mana mɛ nì ɓě kɔ̃.