Òbòdádyà 1 - Ɓǎsɔ́ɔ̀ Báɓòɔ̀

¹ Ɖɛ ɓɛ́ Bounɓo Ɖɛɓíɔ́ɔ̀ tɛ̀mɛ̀ìn ma Òbòdádyà dyí ɓá Íɖɔ̀ùn-ɓòɖòɔ̀ jè dyíɛɛ kɛà kɛ̀. Bounɓoɔ̀ ɖǎ kíá ɖò ɖé ɓóɖó-dù ɓěɔ̀ gbo ɖoɓo, ké à ɖǎ ɔ wuɖuɔ̀ wɔ̃́. Wuɖuɔ̀ ɖá, “Ɓěà sɔ̀ dyí, ɓɛ́ ɓěà ké Íɖɔ̀ùn-ɓòɖòɔ̀ to kɔ̃ kpa.”

Bounɓoɔ̀ mu Íɖɔ̀ùn-ɓòɖòɔ̀ gǎ kɔ̃ tòùn

² Bounɓoɔ̀ cɛ̃ɛ Íɖɔ̀ùn-ɓòɖòɔ̀ gbo, ké ɔ ɖá, “Gmɔ̀ nɔ̄, ní mu m̀ dyí ɓíèìn ɖé ɓóɖó-dù ɓěɔ̀ hwìɛ̀. Nì mu zùǔn sɔ̀ìn gàná cá.

³ M̀ mìɔùn dyí-ɓúáìn-ɓúáìnɔ̀ ɖǎ m̀ cá. Mɔ̀ mɔ̀ nyɔ cĩ́à ɖéé ɖé sɔ́ɔ́-kpò ɓěɔ̀ dú-hwìɛ̀ kɛɛ, mɔ̀ mɔ̀ nyɔ kɔ̃̀ cĩ́-naín nìà ɖéé ɖé toɖo tɔ̀mɔ̀ dya ɓěɔ̀ dya kɛɛ, mɔ̀ mɔ̀ nyɔ cɛ̃à, ɓɛ́ m̀ dyi níiń, ‘Nyɛ́ ɓɛ́ìn ḿ ɓíɖíi dyàà kɛ́ɛ?’

⁴ Kɛbì m̀ mɛ dè nì hwɔɖɔɔ̀ ɓɛ́ ɔ ké ɖéé ɖé dyií nì kà ke téɖé-dè-naín cɛ̃̀à gboɛɛ, kɛbì m̀ mɛ dè nì téɖé ɖé dɛ̀nɛ̀-dyù ɓě nìà ɖé dyiíɛɛ hwìɛ̀ kɛɛ, ní mu ɖé m̀ zàùn, ɓɛ́ ḿ ké m̀ ɓíɖíi po.

⁵ “Dyíɖíí-nyɔ̀ dyiɔ́ nyɔ kɔ̃ dyi ní, mɔɔ ké sṹún-gɔ̀-nyɔ̀ dyiɔ́ nyɔ kɔ̃ kpá ɓó máaún ní, má, wa sè ɖɛ ɖò ɓíɖíi wɛ̃́ɛ́ pūe? Ɔ jǔ ké géɖéè-kpã́-nyɔ̀ ɓě dyiɔ́ géɖéè kpã́ ní, má, wa sèɛ̀ ɖò dya wɛ̃́ɛ́ pūe? Kɛɛ mú-gbɔɔ̀-gbɔɔ̀ nìà m̀ kɔ̃ dyiɛń nyɛɛ ɓúá kpéín mìɔ.

⁶ Ɓě mɔ̀à Íìsɔ́ɔ̀ xwíníín-dyù ɓěɛɛ, wa mu ɓěɛ̀ dyi-dè-ɖɛ̀ séín ɓɛ́ ɓě vǐèɛɛ kpaùn nyɛ̀nɛ̀ɛ̀.

⁷ Nyɔ ɓě ɓɛ́ ɓě kè wa poà wuɖu ɓíín nyɛɛ mu ɓě cáùn. Nyɔ ɓě ɓɛ́ ɓě kè wa peɖeìn sɔ̃ hwùɖǔǔn wɛ̃ɛ mu xwáɖá gbǎùn ɓó ɓě bìì, kɛɛ ɓě seɛ dyéɖé gbo dèɛ̌ mu. Wa mu ɓě toún ɖuùn, ké wa mu ɓě ɓó ɓě mìɔùn nììn ɓíɖí-ɓòɖòɔ̀ kɔ̃ dyi kúmúùn.

⁸ “Íɖɔ̀ùn-nyɔ̀ ɓě, ɓó wéa ɓaɖaa, má, ní mu ɓěɛ̀ hwòɖǒ-fɔ̀nɔ̀-gàà ɓěɔ̀ mú gbɔɔ̀ùne? Wa mɔ̀ nyɔ ɓě nì ɖé Íìsɔ́ɔ̀ nììn toɖo ɓěɔ̀ dya, ɓɛ́ wa ɓéɖé ɖɛ-múin-wɔ̃́-wɔ̃́ kɛ.

⁹ Témàùn-hwɔ̀ɖɔ̀ wè, nì gàa-zà-nyɔ̀ ɓěɔ̀ mu fɛ̃̀ìn mìɔ cá, ké ní muɛ nyuùn ɓɛ́ ɓóɖó-dù ɓěɔ̀ ké ɓě mɔ̀ nyɔ séín ɓě ɓɛ́ ɓě nì ɖé Íìsɔ́ɔ̀ nììn toɖo ɓěɔ̀ dyaa ɖáɓá nyɛ̀nɛ̀ɛ̀. Mɔ̄ mɔ̀à Bounɓoɔ̀ kɛɛ, ḿ ɖǎa cɛ̃.

Ɖɛ kɔ̃̀ jè Gèɖèpɔ́ɔ̀ tòà Íɖɔ̀ùn-ɓòɖòɔ̀ gǎ kɔ̃ɛ

¹⁰ “Dɛ̃ mu ɓě kɔ̃in ɓáìn ɓó hwòɖǒ-kɔ̃in-nyìnììn-ɖɛ̀ ɓɛ́ ɓě nyuà ɓě ɖíí ɓě mɔ̀à Jékɔ̀ɛ̀ xwíníín-dyù ɓěɔ̀ kɛ bũ̌ɛɛ jè. Ɓě mu mú gbɔɔ̀ùn gàná cá.

¹¹ Ɓě nyànà ma ɓó dyi, ké ɓě dyé ma wa dyi ɓó wéa ɓaɖa, ké ɖíà ɓě nì ma waà kɔ́mɔ́-ɖɛ̀ ɓěɔ̀ kpauń. Ɓě dyéɛ dyi, ké ɓóɖó-dù kà kò ɖò ɓěɛ̀ nyɔ ɓěɔ̀ dyá ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔɔ̀ mú, ké wa nì ma gbo-ɖàɓàìn-ɖɛ̀ nyuɛń ɓó hwɔɖɔɔ̀ jè. Ɓě mɔ̀ ma wa ɖò ɖekè, sepóɛɖé ɓě se ma ɓě ɖíí ɓěɔ̀ gbo kpá.

¹² Ɓě se ɓéɖé ɓɛ́ ɓě kéɔ́ ɓě ɖíí ɓěɔ̀ dyɔ́ ɓaɖa ɖé waà fũ̀à-fṹá-tìɔ̀ mú. Ɓě se ɓéɖé ɓɛ́ ɓě kéɔ́ múàǔn kpá ɓó wé kɔ̃̀ ɓaɖa wa nì Júɖà-nyɔ̀ ɓěɔ̀ mú gbɔɔ̀ǔn wɛ̃, mɔɔ ké ɓě se ɓéɖé ɓɛ́ ɓě kéɔ́ ɓɔ́ɖɔ́ ɓó wé kɔ̃̀ ɓaɖa wa nì fũ̀à-fṹá múɛ.

¹³ Ɓě se ɓéɖé ɓɛ́ ɓě kéɔ́ má ní nyɔ ɓěɔ̀ gmɔ-wɔ̃̀ɔ̀ mú dyá ɓó ti kɔ̃̀ ɓaɖa wa nì fũ̀à-fṹá múɛ, mɔɔ ɓɛ́ ɓě ké wa zùǔn zàìn ɖé waà gǎ-dyé-tìɔ̀ mú, mɔɔ ké ɓě se ɓéɖé ɓɛ́ ɓě kéɔ́ waà kɔ́mɔ́-ɖɛ̀ ɓěɔ̀ wa xwa kpɔ̃ ɓó waà mú-gbɔɔ̀-wèɔ̀ ɓaɖa.

¹⁴ Ɓě se ɓéɖé ɓɛ́ ɓě kéɔ́ má wa fò ɓó hwìè-gmǎà ɓěɔ̀ dyí, ɓɛ́ ɓě kéɔ́ waà nyɔ ɓě nì xwáɖáún kpáuń wɛ̃ɛ kpɔ̃, ɓɛ́ ɓě kéɔ́ wa waà mú-nyɛ́-nyɔ̀ ɓěɔ̀ xwáɖáún zàìn ɖé waà fũ̀à-fṹá-tìɔ̀ mú.

Gèɖèpɔ́ɔ̀ mu ɓóɖó-dù kò-kò ɓěɔ̀ zaa wɔ̃ poùn

¹⁵ “Mɔ̄ mɔ̀à Bounɓoɔ̀ kɛɛ, níǐn wéɔ̀ ɖǎ dyi xwɛ̃́ìn ɓó ɓóɖó-dù séín bìì. Kà ɓě nyuà kɛɛ, kǎà wa muɛ ɓě mɔ̀ùn bũ̌ nyuùn ɖekè. Ɓěɛ̀ nyuu-ɖɛ̀ ɓěɔ̀ mu ɓě mìɔùn kɔ̃ dyiìn.

¹⁶ Kà ɓɛ́ ní nyɔ ɓěɔ̀ nyuà kópò mɔ̀à gǎ-dyé-dyéɔ̀ kɛɛ náa ɖé ní toɖo hwɛ̀ǐn-hwɛ̀ǐnɔ̀ dya kɛɛ, kà dyúáɖòɔ̀ kǎà ɓóɖó-dù tɔ̀ɔ̀ ɓěɔ̀ muɛ náùn kánáá pū. Wa muɛ náuń dyi gã̀ùn tee ɓɛ́ wa ké mú gbɔɔ̀ hwɛ̀, ɓɛ́ wa jè ké dyi zi.

Éézùɖùɛ̀ to-ɖu-ɖuɔ̀

¹⁷ “Kɛɛ pó-pó mu ɖé Zádyɔún-tòɖòɔ̀ dya nììn, ké ɖé mu pá hwɛ̀ǐn-hwɛ̀ǐn jǔùn. Ké Jékɔ̀ nììn xwíníín-dyù ɓěɔ̀ mu waà ɓóɖóɔ̀ wuɖuí kɔ̃̀ùn ɖe.

¹⁸ Jékɔ̀ kè Jòsé nììn xwíníín-dyù ɓěɔ̀ mu nììn kà nyɛ kpɔ̃ dyí nìà kɛ, ké Íìsɔ́ɔ̀ nììn xwíníín-dyù ɓěɔ̀ mu nììn kà gbǎùn-fúɖúá dyɛ-dyɛ nìà kɛ. Nyɛɔ̀ muɛ dyéɖé poùn, ɓɛ́ ɔ ké sĩɛ hwɛ̀, ké Íìsɔ́ɔ̀ nììn xwíníín-dyù ɓěɔ̀ ɖò se ɓó sèɛ̌ mu. Mɔ̄ Bounɓoɔ̀ ɖǎa cɛ̃.

¹⁹ “Nyɔ ɓě ɓɛ́ wa sɔ̀ìn ɖé Nɛ́gà-ɓòɖòɔ̀ kɔ̃ɛɛ mu Íìsɔ́ɔ̀ nììn toɖo ɓěɔ̀ dyí ɖúùn, ɓɛ́ wa kéɛ wuɖuí kɔ̃̀, ké nyɔ ɓě ɓɛ́ wa sɔ̀ ɖé bɔɔ-kpà hwɔà ɖé Júɖà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛ kɔ̃ɛɛ mu Féɖésìà-nyɔ̀ ɓěɔ̀ nììn ɓóɖóɔ̀ dyí ɖúùn, ɓɛ́ wa kéɛ wuɖuí kɔ̃̀. Wa mu Ífèɖèìn-ɓòɖòɔ̀ kèɛ̀ dìɓà-hwɔ̀ɖɔ̀ mɔ̀à Sɛ̀mɛ́ɖìà kɛɛ wuɖuí kɔ̃̀ùn, ké Bɛ̃́címà-nyɔ̀ ɓěɔ̀ mu Gíɖèà-ɓòɖòɔ̀ wuɖuí kɔ̃̀ùn.

²⁰ Éézùɖùɛ̀-nyɔ̀ ɓě ɓɛ́ wa mɔ̀à toɛ̀-kpɔ̃-nyɔ̀ ɓěɛɛ mu Kénà-ɓòɖòɔ̀ kèɛ̀ wáká nyinià ɖé Záwɛ̀ɖɛ̀fà-hwɔ̀ɖɔ̀ɔ̀ múɛɛ wuɖuí kɔ̃̀ùn. Ké nyɔ ɓě ɓɛ́ wa mɔ̀à toɛ̀-kpɔ̃-nyɔ̀ ɓě ɓɛ́ wa sɔ̀à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa nìà ɖé Sɛ̀fáwàɖà-hwɔ̀ɖɔ̀ɔ̀ múɛɛ mu hwɔɖɔ ɓě nìà ɖé Nɛ́gà-ɓòɖòɔ̀ kɔ̃ɛɛ wuɖuí kɔ̃̀ùn.

²¹ Nyɔ-póìn-nyɔ̀ ɓě mu ɖé Zádyɔún-tòɖòɔ̀ dya sɔ̀ùn, ɓɛ́ wa ké Íìsɔ́ɔ̀ nììn toɖo ɓěɔ̀ wuɖuí kɔ̃̀. Ké mɔ̄ Bounɓoɔ̀, ḿ mìɔùn mu kã́á-ɓòɖòɔ̀ wuɖuí kɔ̃̀ùn.”