Níòmádyà 1 - Ɓǎsɔ́ɔ̀ Báɓòɔ̀

Jùɖúsɛ̀ɖɛ̀ìn-hwɔ̀ɖɔ̀ɔ̀ jè kpɔ̃ Níòmádyà hwòɖǒ

¹ Nɔ́ɔ́ ɓá ɖɛ ɓě Níòmádyà mɔ̀ ma Hàkàɖíàà dyú-gàà kɛɛ nyu ma kɛɛ jè dyíɛɛ kɛà kɛ̀. Ti ɖòɛ̀ ɓaɖaa, mɔ̄ mɔ̀à Níòmádyà kɛɛ, ḿ nì ma ɖé Súsà mɔ̀à Pɔ́sìà-ɓòɖòɔ̀ dìɓà-hwɔ̀ɖɔ̀ɔ̀ kɛɛ mú. Ɔ mɔ̀ ma dɛ̀nɛ̀ mɔ̀à Kísèɖè kɛɛ xwíníín, ké Àtàzɛ́sì nì ma Pɔ́sìà-ɓòɖòɔ̀ nàǐn ɖé ɔ zɔ̃ kpáɖá-nyɔ ɖò nììnɔ̀ mú.

² Ɓó tia ɓaɖaa, ní ɖíí-gàà ɓěɔ̀ ɖò kɔ̃̀ nyɛ́nɛ́ mɔ̀ ma Hànánì kɛ kè gàa ɖíɛ́ ɓě sɔ̀ ma ɖé Júɖà-ɓòɖòɔ̀ kɔ̃, ké wa nyini ma ɖé ḿ gbo. Ké ḿ diè ma wa dyi ɓó Júù-nyɔ̀ ɓě ɓɛ́ wa kpàìn zɔ̃̌ɔ̀ kà gana ɖé Báɓèɖɔ́ùn-ɓòɖòɔ̀ kɔ̃, ké wa ɖǎà ɖe kɔ́ìn ɖé Júɖà-ɓòɖòɔ̀ kɔ̃ɛ ɔ kè Jùɖúsɛ̀ɖɛ̀ìn-hwɔ̀ɖɔ̀ɔ̀ jè.

³ Ké wa cɛ̃ɛ ma ḿ gbo, ké wa ɖá, “Fũ̀à-fṹá nì ma Júù-nyɔ̀ ɓě kɔ́ìn ma kà ɖe ɖé Júɖà-ɓòɖòɔ̀ kɔ̃ɛɛ nyuɛń mìɔ, ké nyɔ ɓě cĩ́ wa ɖeiɛɛ zàìn wa zùǔn. Ké Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔɔ̀ ɖǎ wáɖá, ké gmɔ-wɔ̃̀ ɓěɔ̀ hwɛ̀ sĩɛ.”

⁴ Ti ɓɛ́ ḿ wɔ̃́ ma bɔ̃̌ séín ɓěɔ̀ kɛɛ, ḿ kò ma dyi cá, ké ḿ vĩ̌ ma. Ɓó wé gbɛ̀ǐ-gbɛ̀ǐ xwíníín nyɛɛ, ḿ vĩ̌ ma, ké ḿ hwèɖè ma wɔ̃ kɔ̃. Ké ḿ ɓaà ma Gèɖèpɔ́ɔ̀ nìà ɖé dyɔún wɛ̃,

⁵ ké ḿ ɖá, “Bounɓo Gèɖèpɔ́ɔ̀, mɔ̀ nìà ɖé dyɔún wɛ̃ɛ, m̀ gã̌ ní, ké díɖí taɓa ḿ ní ɓó m̀ dyúa. M̀ kpɔ̃ dèè-wùɖù ɓɛ́ ɔ nìà ɓó m̀ kè nì nyɔ ɓěɔ̀ pṹa kɛ kè nì ɖɛ̀ɓɛ̀ǐn-ɖɛ̀ɓɛ̀ǐnɔ̀ dyi ɓó nyɔ ɓě ɓɛ́ wa ɖɛ̀ɓɛ̀ m̀ mú, ké wa kpɔ̃ nì gma ɓěɔ̀ dyiɛɛ bìì.

⁶ Ní ɓaà m̀ ní, m̀ mɛ tò mɔ̄ mɔ̀à nì gbo-nì-nyɔ̀ɔ̀ kɛɛ ɓaà-wùɖù ɓɛ́ ḿ nìà ɓaàǔn ɓó dyóɖóaún kè máaún ɓá nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ jè dyíɛɛ gbo ɖùǔ. Ḿ wɔ̃́ìn nàmàǔn ɓě ɓɛ́ ḿ kè ḿ ɓǎà gbǒ-xwíníín-nyɔ̀ ɓěɔ̀ kè Éézùɖùɛ̀-nyɔ̀ tɔ̀ɔ̀ ɓěɔ̀ ɖǎ m̀ dyéɖéín nyuɛɛ mú.

⁷ À ɖǎ m̀ ɖɛ gbà vɛ̀nɛ̀ bũ̌ nyu, ké à se nì gma ɓě ɓɛ́ m̀ nyí ma kà nì gbo-nì-nyɔ̀ mɔ̀à Mózè kɛɛ nyu.

⁸ Ɓó kàǔn wɛ̃ɛ, ɖɛ ɓě ɓɛ́ m̀ cɛ̃ ma kà Mózè gboɛɛ jè mɛ dyi m̀ hwìɖǐi. M̀ cɛ̃ɛ ma ɔ gbo ɓá Éézùɖùɛ̀-nyɔ̀ ɓěɔ̀ jè dyí, ké m̀ ɖá, ‘Ɔ jǔ ké ɓě dyi ní gma ɓěɔ̀ wáɖá ní, nìí, ní muɛ nyuùn ɓɛ́ ɓě ké ɓóɖó gboi gbɛ̀ìn.

⁹ Kɛɛ ɔ jǔ ké ɓě dyi ɖé ḿ gbo gmɔ̀ìn ɖe, ké ɓě dyi ní gma ɓěɔ̀ dyi kpɔ̃ ní, nìí, ɓě gbɛ̀ìn dyi ɖé dà vɛ̃in dyɛo, kɛɛ ní mu ɓě dyí poìn, ɓɛ́ ḿ ké ɓě ɖe dyà nɔ̄ pá ɓɛ́ ḿ ɖǎà gã, ɓɛ́ ɔ kéà ní ɓièìn-naín jǔɛɛ kɔ̃.’

¹⁰ “Ɖɛɓíɔ́, Éézùɖùɛ̀-nyɔ̀ ɓěɔ̀ mɔ̀ nì gbo-nì-nyɔ̀ ɓě. Wa mɔ̀ nì nyɔ ɓě ɓɛ́ m̀ póìn ma kà dyììn ɖé nì kpé vɛ̀nɛ̀ɔ̀ kè nì ganaɔ̀ múɛ.

¹¹ Ḿ kè nì gbo-nì-nyɔ̀ ɓě ɓɛ́ wa ɖɛ̀ɓɛ̀ ɓɛ́ wa kéà nì nyɛ́nɛ́ɔ̀ kpéín dyéɛɛ nì ɓaàǔn ɓó nì nyɔ ɓěɔ̀ bìì. Ní ɓaà m̀ ní, tò à ɓaà-wùɖùɔ̀ gbo ɖùǔ, ɓɛ́ m̀ kéɛ nyu ɓɛ́ mana ké ḿ kɔ̃ nì, ɓɛ́ kã́áɔ̀ hwòɖǒ ké ḿ múin dèìn ɓó zɛ̃̌ɛ̀.” Ɓó tia ɓaɖaa, ḿ mɔ̀ ma kã́áɔ̀ cówè.