Mákà 1 - Ɓǎsɔ́ɔ̀ Báɓòɔ̀

¹ Ti ɓɛ́ Jótàùn kè Áhàzì ɔ kè Hɛ́sèkádyà wa ɖò-ɖò mɔ̀ ma Júɖà-ɓòɖòɔ̀ kã́á kɛɛ, Bounɓoɔ̀ wùɖù ma Mákà ɓɛ́ ɔ sɔ̀ ma ɖé Mɔ̀wéɖésà-hwɔ̀ɖɔ̀ɔ̀ múɛɛ gbo. Bounɓoɔ̀ tɛ̀mɛ̀ìn ɔ ɖɛ ɓě ɓá Sɛ̀mɛ́ɖìà-hwɔ̀ɖɔ̀ɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ jè dyíɛɛ dyí.

Vĩ̌-wùɖù ɓá Sɛ̀mɛ́ɖìà-hwɔ̀ɖɔ̀ɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ jè dyíɛ

² Ɓóɖó-dù séín ɓě, ɓě tò ɖùǔ. Nyɔ séín nì toɖo-kpàà kɔ̃ɛɛ, ɓě tò ɖùǔ. Bounɓo Ɖɛɓíɔ́ mɛ nì ɖé ɔ gbǒ hwɛ̀ǐn-hwɛ̀ǐn nìà ɖé dyɔún wɛ̃ɛ mú, ɓɛ́ ɔ ké ɓě zaaɔ̀ dúún wáɖá.

³ Gmɔ̀ nɔ̄, Bounɓoɔ̀ nì ɖé ɔ páɔ̀ mú sɔ̀ǔn. Ɔ mu ɓíɖíi dyiìn, ɓɛ́ ɔ ké toɖo ɓě nì ɓóɖó-kpàà kɔ̃ɛɛ kɔ̃in nà.

⁴ Ké toɖo ɓěɔ̀ mu ɖeìn ɖé ɔ ɓo xwíɖíi, kà cáná ma-ma ɖeà ɓó nyɛ wĩín nyɛ. Toɖo ɓěɔ̀ mu ɖé bɔɔ-kpà ɓěɔ̀ kɔ̃ púèìn, kà ní púè kà ɖé toɖo-ɓì ɖò múɛ.

⁵ Ɖɛ séín ɓěa mu ná kpáùn ɓó Jékɔ̀ɛ̀ xwíníín-dyù ɓěɔ̀ gma-ɖuà-ɖuàɔ̀ jè. Ɔ mu ná kpáùn ɓó Éézùɖùɛ̀ɛ̀ gbǒ-xwíníínɔ̀ nàmàǔn ɓěɔ̀ jè. Nyɛ́ mɔ̀ nyɔ nyuɛ ɓɛ́ Jékɔ̀ɛ̀ xwíníín-dyù ɓěɔ̀ dyià gma ɖuà kɛ́? Má, ɔ mɔ̀ Sɛ̀mɛ́ɖìà-hwɔ̀ɖɔ̀ɔ̀e? Ké nyɛ́ mɔ̀ nyɔ nyuɛ ɓɛ́ Júɖà nììn xwíníín-dyù ɓěɔ̀ dyià kũùn-kpò ɓièìn-naín ɓěɔ̀ po ɖé toɖo ɓěɔ̀ dya kɛ́? Má, ɔ mɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀e?

⁶ Ɔ ná nì jèɛɛ, Bounɓoɔ̀ mu Sɛ̀mɛ́ɖìà-hwɔ̀ɖɔ̀ɔ̀ sĩ̀ɔ̌-kòò mú nyuùn ɖé pá wáɖááɔ̀ gbo, ké ɖé mu géɖéè-ɓá-naín jǔùn. Bounɓoɔ̀ mu hwɔɖɔɔ̀ sɔ́ɔ́-kpò ɓěɔ̀ ɖé bɔɔ-kpàɔ̀ kɔ̃ púèìn, ké ɔ muɛ nyuùn ɓɛ́ ɔ hìɖì-kpà ɓěɔ̀ ké dyóɖóún dyi wáɖá.

⁷ Ké wa mu ɔ kũùn-kpò séín ɓěɔ̀ pù-ɓóɖó mú nyuùn, ké wa mu nyíí-ɖɛ̀ séín ɓě ɓɛ́ ɔ dyà ɔ kũùn-kpò ɓěɔ̀ gboɛɛ ɓó dyi fɔ̃ùn nyɛ̀nɛ̀ɛ̀. Bounɓoɔ̀ muɛ nyuùn ɓɛ́ ɔ kũùn-kpò séín ɓěɔ̀ ké mú gbɔɔ̀ hwɛ̀. Ɔ dyé ma nyíí-ɖɛ̀ séín ɓěɛ̀ gbàɖàùn-po-po mɔ̀à ɔ kũùn-kpò-gèɖèpɔ́ɔ̀ ɓěɔ̀ ɓiè-ɓiè kɛɛ kɔ̃ún. Ɔ jèɛɛ, wa mu gbàɖàùn-po-poɛ̀ pɛ́ɛ̀-ɖɛ̀ jǔùn ɖe ɓó kũùn-kpò-gèɖèpɔ́ɔ̀ kà kò ɖò ɓě mɔ̀ùn bìì.

⁸ Ní mu kpé poùn, ɓɛ́ ḿ ké vĩ̌ ɓó ɖɛ nìà kɛ jè. Ní mu múin fɔ̀nɔ̀ùn, ɓɛ́ ḿ ké ɓoún dyi fɔ̀nɔ̀. Ní mu vĩ̌-wùɖù ɖò nyuùn kà gbe nyuà kɛ. Ní mu kpé poùn kà kùnǔù wuɖu dyià kɛ.

⁹ Sepóɛɖé Sɛ̀mɛ́ɖìà-hwɔ̀ɖɔ̀ɔ̀ jěɔ̀ se kũùn kɔ̃̀, ké ɔ ɖǎ dyi tee ké ɔ ɖǎ ní nyɔ ɓě nìà ɖé Júɖà-ɓòɖòɔ̀ kɔ̃ɛɛ dyɛ̀ìn, hwɛ̀ ḿ po níiń, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔ-wɔ̃̀ ɓěɔ̀ gbo.

Mú-nyɛ́-nyɔ̀ ɓěɔ̀ ɖǎ Jùɖúsɛ̀ɖɛ̀ìn-hwɔ̀ɖɔ̀ɔ̀ nɛ́

¹⁰ Júɖà-nyɔ̀ ɓě, ɓěǐn ɖá ɓɛ́ ɓě kéɛ à mú-nyɛ́-nyɔ̀ ɓě nìà ɖé Gátì-hwɔ̀ɖɔ̀ɔ̀ múɛɛ gbo cɛ̃ ɓá à toún-ɖu-ɖuɔ̀ jè dyí. Ɓěǐn ɖá ɓɛ́ ɓě ké vĩ̌ fɔɔ cá. Ɓě mɔ̀ nyɔ ɓě nìà ɖé Bɛ̀-Áfàɖà-hwɔ̀ɖɔ̀ɔ̀ múɛɛ, ɓě suè púu-púuɔ̀ mú.

¹¹ Ɓě mɔ̀ nyɔ ɓě nìà ɖé Sáfìɖì-hwɔ̀ɖɔ̀ɔ̀ múɛɛ, wa mu ɓě múin fɔ̀nɔ̀ìn, ɓɛ́ dɛ̃ ké ɓě nyu, ɓɛ́ wa ké ɓě to-xwàɖàǔn kpa. Nyɔ ɓě nìà ɖé Záánà-hwɔ̀ɖɔ̀ɔ̀ múɛɛ se píé síɛ mu. Bɛ̀-Ézɔ̀-hwɔ̀ɖɔ̀ɔ̀ nyɔ ɓěɔ̀ nì kpé poɛń, ké wa se ɓě gbo kpáa ɓɛ́ìn.

¹² Máwòɖò-hwɔ̀ɖɔ̀ɔ̀ nyɔ ɓěɔ̀ nì fòèɛ̌n kóɖó-kóɖó, ɓɛ́ nɔ̀mɔ̀ dyíin ké dyi, sepóɛɖé gǎ-ɖɛ̀ nɛɛ̀-nɛɛ̀ sɔ̀ ɖé Bounɓoɔ̀ gbo, ké ɔ ɖǎ Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔ-wɔ̃̀ ɓěɔ̀ dyɛ̀ìn.

¹³ Ɓě mɔ̀ nyɔ ɓě nìà ɖé Ɖákì-hwɔ̀ɖɔ̀ɔ̀ múɛɛ, ɓě wã̀ìn sǒ ɓě ɓěɛ̀ hwíì-sǒ ɓěɔ̀ dyi. Ɓě mɔ̀ nyɔ zà ma Jùɖúsɛ̀ɖɛ̀ìn-nyɔ̀ ɓěɔ̀ nàmàǔn nyu jè pìǐn, sepóɛɖé ɓě sí ma Éézùɖùɛ̀-ɓòɖòɔ̀ gma-ɖuà-ɖuàɔ̀ kíɖíí.

¹⁴ Ɓó kàǔn wɛ̃ɛ, Júɖà-nyɔ̀ ɓě, ɓě mɛ cuò Mɔ̀wéɖésà-Gátì-hwɔ̀ɖɔ̀ɔ̀ nyɔ ɓěɔ̀. Ázì-hwɔ̀ɖɔ̀ɔ̀ nyɔ ɓěɔ̀ mu Éézùɖùɛ̀-kã̀ǎ ɓěɔ̀ hwòɖǒ dyií sèìn.

¹⁵ Ɓě mɔ̀ nyɔ ɓě nìà ɖé Màwéɖésà-hwɔ̀ɖɔ̀ɔ̀ múɛɛ, Bounɓoɔ̀ mu ɓě nyɔ-toún-ɖu-nyɔ̀ ɓě kɔ̃ dyàùn ɖe. Nyɔ vɛ̀nɛ̀ mɔ̀à Éézùɖùɛ̀-nyɔ̀ ɓěɔ̀ dĩ́ín-dĩ̀ìnɔ̀ kɛɛ mu ɖé wɔ-ɓì nìà ɖé Àdúɖàùn-hwɔ̀ɖɔ̀ɔ̀ wáún wɛ̃ɛ mú gbǔìn.

¹⁶ Júɖà-nyɔ̀ ɓě, ɓě zà mí dú ɓó ɓěɛ̀ dyú ɓě ɓɛ́ ɓě ɖɛ̀ɓɛ̀à múɛɛ jè. Ɓě nyu ɓěɛ̀ dú ɓěɔ̀ kpòɖòǒ-dù mú kà kpòɖòǒ-dù-nàà nìà kɛ, sepóɛɖé wa mu ɓěɛ̀ dyú ɓěɔ̀ ɓě bũ̌ zàùn, ɓɛ́ wa ké toɛ̀-kpɔ̃-nyɔ̀ ɓě jǔ, ɓɛ́ wa ké wa ɓóɖó-dù kà kò ɖò kɔ̃ kpa.