Jóɛ̀ 1 - Ɓǎsɔ́ɔ̀ Báɓòɔ̀

¹ Bounɓoɔ̀ wuɖu dyi ma Jóɛ̀ ɓɛ́ ɔ mɔ̀ ma Pɛ̀fúèɛ̀ dyú-gàà kɛ gboɛɛ kɛà kɛ̀.

Júɖà-nyɔ̀ ɓěɔ̀ vĩ̌ ɓó waà ɓáá-ɖɛ̀ ɓěɔ̀ mú gbɔɔ̀ jè

² Ɓě mɔ̀à nyɔ vɛ̀nɛ̀ ɓě kè nyɔ séín cĩ́à nɔ̄ Júɖà-ɓòɖòɛ̀ kɔ̃ɛɛ, ɓě tò ɖùǔ. Ɓě wóɖóóɛɛ, ɓě ɖǎ ɖɛ nì kàà dyé ɖòò, mɔɔ ɓě ɓǎ nììn ɓǎ ɓě mɔ̀ùn ɖǎa dyé ɖòò?

³ Ɓě mɛ cɛ̃ ɖɛ nìà kɛ ɓěɛ̀ dyú ɓěɔ̀ gbo, ɓɛ́ ɓěɛ̀ dyú ɓěɔ̀ kéɛ wa nììn dyú ɓě gbo cɛ̃, ɓɛ́ wa nììn dyú ɓěɔ̀ kéɛ wa nììn dyú ɓě kɔ ɓó wa ɖeín dyíɛɛ gbo cɛ̃ ɖekè.

⁴ Ɖɛɔ̀ mɔ̀, ɖɛ ɓɛ́ kpã̌ùn-tòɔ̀ sè ɓóɛɛ, kpã̌ùn-vɛ̀nɛ̀-tòɔ̀ ɓɛɛ ɓóɛ dyi. Ké ɖɛ ɓɛ́ kpã̌ùn-vɛ̀nɛ̀-tòɔ̀ sè ɓíɖíiɛɛ, kpã̌ùn-gmɔ̀-tòɔ̀ ɓɛɛ ɓóɛ dyi. Ké ɖɛ ɓɛ́ kpã̌ùn-gmɔ̀-tòɔ̀ sè ɓíɖíiɛɛ, kpã̌ùn tɔ̀ɔ̀ ɓě ɓɛɛ ɓóɛ dyi.

⁵ Ɓě mɔ̀à kàmà-ɖɛ̀ ná-nyɔ̀ ɓěɛɛ, ɓě wóɖó nyíɔún, ɓɛ́ ɓě ké vĩ̌. Ɓě mɔ̀à wã́ìn ná-nyɔ̀ ɓěɛɛ, ɓě mɛ po kpé ɖé wuɖu zoo mú ɓó ɓěɛ̀ wã́ìn ɓěɔ̀ jè, sepóɛɖé kpã̌ùn ɓěɔ̀ ɖǎa ɓě wĩín bǎ.

⁶ Kpã̌ùn-tò nì kà ɓóɖó-dù ɓéɖé kpé ɖò kɔ̃̀ nyɔ se zɛɖɛɛ ɓɛ́ìn nyɛɛ ɖǎ à ɓóɖóɔ̀ to kɔ̃ dyà. Nyɛ́nɛ́ nì wa wɔ̃ún wɛ̃ɛ námá kà ganìǎà nyɛ́nɛ́ nìà kɛ.

⁷ Wa ɖǎ à géɖéè-gbǎ ɓě kè à féè-cù ɓěɔ̀ dyíin nyìnììn. Wa ɖǎ wa ɓúù dyi zà, ké wa ɖǎa xwáɖáún wáɖá. Ɔ jèɛɛ, waà ɖɔ́ ɓěɔ̀ ɖǎ púú nì.

⁸ Ɓě mɛ vĩ̌ kà màa-dyù gmɔ̀ ɖò po ɖɔ-zɔ̃̀ múɛɛ vĩ̌à ɓó gàa kéɔ́ ɔ dyi kpɔ̃ɛɛ mɛ́ jèɛɛ nyuà kɛ.

⁹ Nyɔ ɖò ní dyà ɖii-ɖɛ̀-sàǎ-zàìn-ɖɛ̀ mɔɔ náá-ɖɛ̀-sàǎ-zàìn-ɖɛ̀ ɖò ɖé Bounɓoɔ̀ gbǒɔ̀ mú ɖe. Ɔ jèɛɛ, sáa-zà-nyɔ̀ ɓě nyuà kũ̀à ɓó Bounɓoɔ̀ dyúa kɛɛ nì wìì mú.

¹⁰ Geɖe ɓěɔ̀ ɖǎ dyíin nyìnììn, ké ɓóɖó nìà ɓó ɓíɖíiɛɛ ɖǎ dyɛ, ké ɓáá-ɖɛ̀ ɓěɔ̀ ɖǎ mú gbɔɔ̀, ké géɖéè-ɓò ɓěɔ̀ ɖǎ ní múin maa hwɛ̀, ké ɔ́ɖè-ɓò ɓěɔ̀ ní wóɖó cáná ɖò mú ɖe.

¹¹ Ɓě mɔ̀à geɖe-nyu-nyɔ̀ ɓěɛɛ, ɓě kpá wìǐn, ɓɛ́ géɖéè-ɓá-nyɔ̀ ɓěɔ̀ ké kpé po ɖé wuɖu zoo mú. Ɓě kpá wìǐn ɓó ɓěɛ̀ hwítì kè ɓěɛ̀ báɖè ɓěɔ̀ jè, sepóɛɖé ɓěɛ̀ geɖe kɔ́-kɔ́ ɓěɔ̀ ɖǎ dyíin nyìnìɛ̀n hwɛ̀.

¹² Géɖéè-ɖúú ɓěɔ̀ ɖǎ dyɛ, ké féè-cù ɓěɔ̀ ɖǎ mɛ́. Ké pɔ́mɛ́gàɖànɛ̀-cù ɓěɔ̀ kè hwɛ̃-cù ɓěɔ̀ kè ápɔ̀-cù ɓěɔ̀ ɔ kè cu tɔ̀ɔ̀ séín ɓě nì ɖé geɖe ɓěɔ̀ gboɛɛ ɖǎ dyɛɛ hwɛ̀. Nyɔ séín ɓěɔ̀ ɖò se múàǔn kpá ɖe.

¹³ Sáa-zà-nyɔ̀ ɓě, ɓě po ɖɔ-zɔ̃̀ mú, ɓɛ́ ɓě ké vĩ̌. Ɓě mɔ̀ nyɔ ɓě nyuà kũ̀à ɓó sáa-kɔ̃-zàìn-gbààɔ̀ dyúa kɛɛ, ɓě po kpé ɖé wuɖu zoo mú. Ɓě mɔ̀à à Gèɖèpɔ́ɔ̀ kũ̀à-nyu-nyɔ̀ ɓěɛɛ, ɓě mɛ po ɖɔ-zɔ̃̀ mú, ɓɛ́ ɓě ké ɖé Gèɖèpɔ́ɔ̀ gbǒɔ̀ mú mu, ɓɛ́ ɓě ké vĩ̌ ɓó máaún-hwùɖù gànáɔ̀ mú, sepóɛɖé ɖii-ɖɛ̀-sàǎ-zàìn-ɖɛ̀ mɔɔ náá-ɖɛ̀-sàǎ-zàìn-ɖɛ̀ ɖò ní dyi ɖé Gèɖèpɔ́ɔ̀ gbǒɔ̀ mú ɖe.

¹⁴ Nyɔ séín ɓěɔ̀ mɛ poìn dyí, ɓɛ́ wa ké wɔ̃ kɔ̃ hwèɖè, ɓɛ́ wa ké Gèɖèpɔ́ɔ̀ ɓiè. Ɓě mɛ nyuɛ ɓɛ́ nyɔ vɛ̀nɛ̀ séín ɓěɔ̀ kè nyɔ séín ɓě cĩ́ nɔ̄ ɓóɖóɛ̀ kɔ̃ɛɛ ké ɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ gbǒɔ̀ mú dyí poìn, ɓɛ́ ɓě ké kpé po ɖé Bounɓoɔ̀ gbo.

¹⁵ Bounɓoɔ̀ wéɔ̀ ɖǎ dyi xwɛ̃́ìn, ké ɔ mɔ̀ wé ku wɔ̃ ɖò cá. Wéɔ̀ mu ɖé kpé-séín-ɓéɖé-Gèɖèpɔ́ɔ̀ gbo sɔ̀ùn, ɓɛ́ ɖɛ ɓáún-ɓáún ké mú gbɔɔ̀ ɓó wéa ɓaɖa.

¹⁶ Má, à ní dyé ɖii-ɖɛ̀ ɖò ɖe, ké múà ɖò se ɖé à Gèɖèpɔ́ɔ̀ gbǒɔ̀ mú nì ɖe fɔɔ cáe?

¹⁷ Ɓáá-ɖɛ̀-dyùà ɓěɔ̀ dyɛ̀ìn ɓóɖóún. Ɖii-ɖɛ̀ ɖò ní sɔ̀ ɖé ɖe. Ɔ jèɛɛ, ɖɛín-dyi-dèìn-naín ɓěɔ̀ wáɖáín.

¹⁸ Ɓìɖǐ ɓěɔ̀ nì dyi téɛń, ké wa nì kpé poɛń, sepóɛɖé dyi-ɖi-naín ɖò se nì ɓó wa bìì. Ɓáɖáá ɓěɔ̀ mɔ̀ùn nì gǎ dyéɛń ɖekè.

¹⁹ Óó Bounɓo, ḿ nì m̀ ɖáuń, sepóɛɖé pìǐ ɓěɔ̀ kè cu ɓěɔ̀ ɖǎ dyɛɛ hwɛ̀. Zùzù nì kà nyɛ nìà kɛɛ ɖǎ pìǐ kè cu ɓěɔ̀ fɔ̃ɔ hwɔ.

²⁰ Xwáɖá-xwíɖíi-nìmìì ɓěɔ̀ nì kpé poɛń ɖé m̀ gbo ɖekè, sepóɛɖé ní-dyù ɓěɔ̀ ɖǎ maa hwɛ̀, ké zùzùɔ̀ ɖǎ pìǐ ɓěɔ̀ fɔ̃ɔ hwɔ.