Jɛ́nɛ́sì 1 - Ɓǎsɔ́ɔ̀ Báɓòɔ̀

Kà Gèɖèpɔ́ɔ̀ nyu ɖɛ séín mɛɛ kɛ

¹ Ɖé ɖɛ dè gbɔ múɛɛ, Gèɖèpɔ́ɔ̀ mɛ zɔ̃̌ɔ̀ dyɔɔ̀ kè ɓóɖó-kpàɔ̀.

² Ɓóɖó-kpàɔ̀ se ma kpoún kpá, ké ɔ mɔ̀ ma ɖɛ fóɖóún. Ké tíe kpɔ̃ ma ní nì ma ɓóɖó-kpàɔ̀ kɔ̃in nyɛɛ kɔ̃in. Ké Gèɖèpɔ́ɔ̀ Zùùɔ̀ nì ma níɔ̀ kɔ̃in.

³ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ce mɛ nì.” Ké ceɔ̀ nì ma.

⁴ Ké Gèɖèpɔ́ɔ̀ dyé ma ceɔ̀ kà ɔ nɔ̀mɔ̀ dyíin nyɛ. Ké ɔ zaìn ma ceɔ̀ kè tíe-kpòɔ̀ gboi.

⁵ Ké ɔ ɖáìn ma ceɔ̀ “Wé,” ké ɔ ɖáìn tíeɔ̀ “Hwuɖu.” Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ kĩ́ín-kĩ́ínɔ̀.

⁶ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ɖɛ ɖò mɛ nì níɔ̀ pṹa, ɓɛ́ ɔ kéɛ mú ge.” Ké ɔ nì ma ná.

⁷ Kǎà Gèɖèpɔ́ɔ̀ nyu ma ní nì ma ɖɛɔ̀ xwíɖíiɛ ɔ kè ní nì ma ɖɛɔ̀ kɔ̃in nyɛɛ gboi zaìn.

⁸ Ké ɔ ɖáìn ma ɖɛɔ̀ “Dyií dyi.” Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ sɔ̃́ nììnɔ̀.

⁹ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ní nìà ɓóɖó-kpàɔ̀ kɔ̃ɛɛ mɛ poìn dà dyúáɖò dyí, ɓɛ́ ɓóɖó dyɛ-dyɛ ké xwáɖáún wóɖó.” Ké ɔ nì ma ná.

¹⁰ Ké Gèɖèpɔ́ɔ̀ ɖáìn ɓóɖó dyɛ-dyɛɔ̀ “Ɓóɖó-kpà,” ké ɔ ɖáìn ní ɓɛ́ ɔ poàìn dyíɛɛ “Dyóó.” Ké ɔ dyéɛ ma kà ɔ nɔ̀mɔ̀ dyíin nyɛ.

¹¹ Ké Gèɖèpɔ́ɔ̀ ɖá, “Ɖɛ séín mɛ mɛ ɓóɖó-kpàɔ̀ kɔ̃. Mɛɛ-ɖɛ̀ séín ɓěɔ̀ mɔ̀ ɓáá-ɖɛ̀ ɓě ɓɛ́ wa ɓéɖé dyúà ɓɛ́ ɔ dyi mɛ ní, ɔ mɔ̀ ɓáá-ɖɛ̀ dyúáɖòɔ̀ ɖò kɛ ɔ kè tòɖòò-cù ɓě ɓɛ́ wa ɓéɖé dyúà ɖé wa ɓo ɓě mú, ɓɛ́ wa dyi mɛ ní, wa mɔ̀ cu dyúáɖòɔ̀ ɖò kɛ.” Ké ɔ nì ma ná.

¹² Kǎà mɛɛ-ɖɛ̀ séín ɓě mɔ̀à ɓáá-ɖɛ̀ ɓě ɓɛ́ wa ɓéɖé dyúà ɓɛ́ ɔ dyi mɛ ní, ɔ mɔ̀ ɓáá-ɖɛ̀ dyúáɖòɔ̀ ɖò kɛ ɔ kè tòɖòò-cù ɓě ɓɛ́ wa ɓéɖé dyúà ɖé waà ɓo ɓěɔ̀ mú, ɓɛ́ wa dyi mɛ ní, wa mɔ̀ cu dyúáɖòɔ̀ ɖò kɛɛ nyu ma ɓóɖó-kpàɔ̀ kɔ̃ mɛɛ. Ké Gèɖèpɔ́ɔ̀ dyéɛ ma kà ɔ nɔ̀mɔ̀ dyíin nyɛ.

¹³ Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ tã nììnɔ̀.

¹⁴ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ce ɓě mɛ nì ɖé dyɔɔ̀ dyí, ɓɛ́ wa ké wé kè hwuɖu gboi zaìn, kè ɓɛ́ wa ké ti ɓě kè wé ɓě ɔ kè zɔ̃ gbɔ-dè-dè ɓě da zà.

¹⁵ Wa mɛ nì ɖé dyɔɔ̀ dyí, ɓɛ́ wa ké ɓóɖó-kpàɔ̀ ce nyí.” Ké ɔ nì ma ná.

¹⁶ Kǎà Gèɖèpɔ́ɔ̀ nyu ma ce vɛ̀nɛ̀ sɔ̃́ ɓě mɔ̀à dyóɖóɔ̀ kè dɛ̀nɛ̀ɔ̀ kɛɛ mɛɛ. Ɔ mɛ ma dɛ̀nɛ̀ mɛ́nɛ́ɛ́ ɓěɔ̀ ɖekè. Dyóɖó kɔ̃̀ ce ɓúáà dyí ɓɛ́ ɔ zià dɛ̀nɛ̀ɔ̀ dyíɛɛ kɔ̃̀ wéɔ̀ wuɖuí, ké dɛ̀nɛ̀ kɔ̃̀ ce seà dyí ɓúá mìɔ kɛɛ kɔ̃̀ hwuɖuɔ̀ wuɖuí.

¹⁷ Gèɖèpɔ́ɔ̀ dè ma wa ɖé dyɔɔ̀ dyí, ɓɛ́ wa ké ɓóɖó-kpàɔ̀ ce nyí,

¹⁸ kè ɓɛ́ wa ké wéɔ̀ kè hwuɖuɔ̀ wuɖuí kɔ̃̀, ɔ kè ɓɛ́ wa ké ce kè tíe-kpò gboi zaìn. Ké ɔ dyéɛ ma kà ɔ nɔ̀mɔ̀ dyíin nyɛ.

¹⁹ Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ hĩinyɛ nììnɔ̀.

²⁰ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Fɔ̀ɔ̀-ɖɛ̀ ɓě mɛ dyíìn ɖé níɔ̀ gboi, ké fɔ̀ɔ̀-ɖɛ̀ ɓě mɔ̀ naà ɓě kɛɛ mɛ nì wãuń ɖé dyɔɔ̀ dyí.”

²¹ Kǎà Gèɖèpɔ́ɔ̀ nyu ma fɔ̀ɔ̀-ɖɛ̀ vɛ̀nɛ̀ ɓě kè fɔ̀ɔ̀-ɖɛ̀ mɛ́nɛ́ɛ́ séín ɓě ɓɛ́ wa dyíìn ɖé níɔ̀ gboiɛ ɔ kè naà séín ɓěɔ̀ mɛɛ. Wa dú ɓěɔ̀ ɓéɖé ma kòɛ̌n. Ké ɔ dyéɛ ma kà ɔ nɔ̀mɔ̀ dyíin nyɛ.

²² Ké ɔ po ma fɔ̀ɔ̀-ɖɛ̀ ɓěɔ̀ mana kɔ̃, ké ɔ ɖá, “Ɓě mɔ̀ ɖɛ ɓě nìà ɖé níɔ̀ gboɛɛ mu dúún zaìn, ɓɛ́ ɓě ké dyí vò, ɓɛ́ ɓě ké níɔ̀ gboi dyíìn, ké ɓě mɔ̀ naà ɓěɔ̀ kɛɛ mu dúún zaìn ɖé ɓóɖó-kpàɔ̀ kɔ̃.”

²³ Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ hm̀m̌ nììnɔ̀.

²⁴ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Fɔ̀ɔ̀-ɖɛ̀ ɓě mɛ nì ɓóɖó-kpàɔ̀ kɔ̃. Wa mɔ̀ nyúà-ɖɛ̀ ɓě kè ɓíɖíi-dyi-nà-ɖɛ̀ ɓě ɔ kè xwáɖá-xwíɖíi-nìmìì ɓě ɓɛ́ wa dú ɓěɔ̀ ɓéɖé kòɛ̌n nyɛ.” Ké ɔ nì ma ná.

²⁵ Kǎà Gèɖèpɔ́ɔ̀ nyu ma xwáɖá-xwíɖíi-nìmìì kè nyúà-ɖɛ̀ ɔ kè ɓíɖíi-dyi-nà-ɖɛ̀ɛ̀ dú kò-kò séín ɓěɔ̀ mɛɛ. Ké ɔ dyéɛ ma kà ɔ nɔ̀mɔ̀ dyíin nyɛ.

²⁶ Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ɓěà mɛ nyɔǔn-dyù, ɓɛ́ wa ké nì kà ɓěà nìà kɛ, ɓɛ́ wa ké zimii ɓěɔ̀ kè naà ɓěɔ̀ kè nyúà-ɖɛ̀ ɓěɔ̀ kè ɖɛ kã̀ìn séín ɓɛ́ wa nà ɓóɖó-kpàɔ̀ kɔ̃ dyiɛ ɔ kè ɓóɖó-kpà gànáɔ̀ wuɖuí kɔ̃̀.”

²⁷ Ɔ jèɛɛ, Gèɖèpɔ́ɔ̀ mɛ ma nyɔǔn-dyù kà ɔ mìɔùn nìà kɛ. Kà Gèɖèpɔ́ɔ̀ mìɔùn nyuà nìɛ̀ kɛɛ, kǎà ɔ mɛ ma nyɔǔn-dyù. Ɔ mɛ ma gàa kè màa.

²⁸ Ké ɔ po ma wa mana kɔ̃, ké ɔ ɖá, “Ɓě mu dúún zaìn, ɓɛ́ ɓě ké dyí vò, ɓɛ́ ɓě ké ɓóɖó-kpàɔ̀ kɔ̃ dyi dyíìn, ɓɛ́ ɓě ké fɔ̀ɔ̀-ɖɛ̀ ɓě mɔ̀à zimii ɓěɔ̀ kè naà ɓěɔ̀ ɔ kè ɖɛ kã̀ìn séín ɓɛ́ wa nà ɓóɖó-kpàɔ̀ kɔ̃ dyiɛɛ wuɖuí kɔ̃̀. Ɓě mu ɓóɖó-kpà gànáɔ̀ wuɖuí kɔ̃̀ùn.”

²⁹ Ké ɔ cɛ̃ɛ ma wa gbo ɖe, ké ɔ ɖá, “Ɓě tò ɖùǔ, ḿ nyí ɓě ɓáá-ɖɛ̀ nì ɓóɖó-kpàɔ̀ dà séín, ɓɛ́ wa nì dyɔ́ múɛ kè cu séín ɓɛ́ wa tòɖò ɓo nì dyúà múɛ, ɓɛ́ wa ké ɓěɛ̀ ɖii-ɖɛ̀ jǔ.

³⁰ Kɛɛ ḿ tò xwáɖá-vàǎ séín, ɓɛ́ wa ké ɖii-ɖɛ̀ jǔ ɓó fɔ̀ɔ̀-ɖɛ̀ séín mɔ̀à nimii séín nì ɓóɖó-kpàɔ̀ kɔ̃ɛ kè naà séín ɔ kè ɓíɖíi-dyi-nà-ɖɛ̀ séín nyɛɛ bìì.” Ké ɔ nì ma ná.

³¹ Ké Gèɖèpɔ́ɔ̀ dyé ma ɖɛ séín ɓě ɔ ɖǎ ma nyuɛ kà wa nɔ̀mɔ̀ dyíin mìɔ kɛ. Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ mɛ̀nɛ̌ìn-ɖò nììnɔ̀.