Jɛ̀ɖèmádyà 1 - Ɓǎsɔ́ɔ̀ Báɓòɔ̀

Jɛ̀ɖèmádyà jè

¹ Céè-ɖɛ̀ nìà kɛ ɓá ɖɛ ɓě ɓɛ́ mɔ̄ Jɛ̀ɖèmádyà mɔ̀à Hìòkíàà dyú-gààɔ̀ kɛɛ cɛ̃ kɛɛ jè dyí. Ḿ ɓǎ Hìòkíà mɔ̀ sáa-zà-nyɔ̀ ɓě nì ɖé Ànáfò-hwɔ̀ɖɔ̀ɔ̀ múɛɛ ɖò ɖé Bɛ̃́címà-ɓòɖòɔ̀ kɔ̃.

² Ɖé Jòsádyà mɔ̀ Ámɔ̀ùnɛ̀ dyú-gàà, ɓɛ́ ɔ mɔ̀ ma Júɖà-ɓòɖòɔ̀ kã́á kɛɛ nììn ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè tã nììnɔ̀ xwíníín nyɛɛ, Bounɓoɔ̀ wùɖù ma ḿ gbo.

³ Ké Bounɓoɔ̀ wùɖù ma ḿ gbo ɖekè ti ɓɛ́ Jɛ̀hódyàkĩ̀ìn mɔ̀ Jòsádyàà dyú-gàà kɛɛ mɔ̀ ma Júɖà-ɓòɖòɛ̀ kã́á kɛ, ké kǎà ɔ nì ma tee ké ɔ dyɛ̀ìn ma Zɛ̀ɖɛ̀kíà mɔ̀ Jòsádyàà dyú-gàà kɛɛ nììn Júɖà-ɓòɖòɛ̀ wuɖuí-kɔ̃̀-zɔ̃̀ɔ̀ ɓaɖa-bùè sè ɖò nììnɔ̀. Ké ɔ mu tee ké ɔ dyɛ̀ìn dɛ̀nɛ̀ hm̀m̌ nììn kɔ̃̀ xwíníín ɓɛ́ to kpɔ̃ ma Jùɖúsɛ̀ɖɛ̀ìn-hwɔ̀ɖɔ̀ɛ̀, ɓɛ́ à mú-nyɛ́-nyɔ̀ ɓěɔ̀ dyi ma kà à toɛ̀-kpɔ̃-nyɔ̀ mú nyuɛ.

Bounɓoɔ̀ gã Jɛ̀ɖèmádyà

⁴ Bounɓoɔ̀ cɛ̃ɛ ma ḿ gbo, ké ɔ ɖá,

⁵ “Hwɛ̀ ɓɛ́ ḿ ké ma m̀ mɛ ɖé m̀ ɖe xwíníín nyɛɛ, ḿ gã ma m̀. Ḿ po ma m̀ wáká, hwɛ̀ ké m̀ wóɖó ma. Ḿ gã ma m̀, ɓɛ́ m̀ ké kpáá-ɖɛ̀-cɛ̃-nyɔ̀ jǔ ɓó ḿ bìì ɖé ɓóɖó-dù ɓěɔ̀ gbo.”

⁶ Hwɛ̀ ké ḿ jǔ ma Bounɓoɔ̀ gɔ̃̌, ké ḿ ɖá, “Aké Bounɓo, ḿ se wùɖùɛ̀ dyuò, sepóɛɖé ḿ mɔ̀ dyú-gbɔ́ɔ́.”

⁷ Kɛɛ Bounɓoɔ̀ cɛ̃ɛ ma ḿ gbo, ké ɔ ɖá, “Ɓɔ́ɔ cɛ̃ɛ, ɓɛ́ m̀ ké níiń, m̀ mɔ̀ dyú-gbɔ́ɔ́, sepóɛɖé m̀ ɓéɖé m̀ ké nyɔ séín kɔ̃̀ gbo ní mu m̀ ɖoɓoùn wɛ̃ɛ mu, ké wuɖu séín ní mu m̀ wĩín poùn wɛ̃ɛ, nì muɛ cɛ̃ìn.

⁸ Mɔ̀ǔn ɖá ɓɛ́ m̀ ké waà dyéɖé peɖe, sepóɛɖé ḿ nì ɓó m̀ gbo, ɓɛ́ ḿ ké m̀ dyí gmɔ̀. Mɔ̄ Bounɓoɔ̀ mɔ̀ nyɔ cɛ̃à kɛ̀.”

⁹ Hwɛ̀ ké Bounɓoɔ̀ pɛ́ɛ̀ ma sɔ̃, ké ɔ tìnììn ní wɔ̃ɔ̀ dyi, ké ɔ cɛ̃ɛ ḿ gbo, ké ɔ ɖá, “Dyéɛ, ḿ ɖǎ ní wuɖuɔ̀ m̀ wĩín po.

¹⁰ Ḿ ɖǎ m̀ kpé nyí ɓó ɓóɖó-dù séín kɔ̃in ɓó zɛ̃̌ɛ̀, ɓɛ́ m̀ ké wa hwuɖu zà kà nyɔ zàà cu-gɔ̃̀ ɖò hwuɖuɛ, ɓɛ́ m̀ ké wa ɓíɖíi dyi po, mɔɔ ɓɛ́ m̀ ké wa mú gbɔɔ̀, ɓɛ́ m̀ ké wa wáɖá, mɔɔ ɓɛ́ m̀ ké wa po, ɓɛ́ m̀ ké wa ɓá kà nyɔ ɓáà ɓáá-ɖɛ̀ ɖòɛ.”

Dyí-tɛ̀mɛ̀ìn-ɖɛ̀ sɔ̃́

¹¹ Ké Bounɓoɔ̀ diè ma ḿ dyi, ké ɔ ɖá, “Jɛ̀ɖèmádyà, ɖɛ́ nìà kɛ́?” Ké ḿ ɖá, “Ɔ mɔ̀ ámɔ̀-cù ɖòɛ̀ ɖɔ́e.”

¹² Ké Bounɓoɔ̀ ɖá, “Ǹdye, ɔ mɔ̀ jǎà. Ḿ nì ní wuɖuɔ̀ dyí gmɔ̀ǔn, ɓɛ́ ɔ ké ɖɛ ḿ cɛ̃ kɛɛ nyu.”

¹³ Ké Bounɓoɔ̀ diè ma ḿ dyi ɖe kpa sɔ̃́ nììn, ké ɔ ɖá, “Jɛ̀ɖèmádyà, ɖɛ́ nìà kɛ́?” Ké ḿ ɖá, “Ɔ mɔ̀ jìà nì púɖúɛń ɓɛ́ ɔ peèìn ɖé Júɖà-ɓòɖòɛ̀ zɔ̃̌in dyi kɛe.”

¹⁴ Hwɛ̀ ké Bounɓoɔ̀ cɛ̃ɛ ma ḿ gbo, ké ɔ ɖá, “Ɖɛ gbà mu ɖé xwía sɔ̀ìn, ɓɛ́ ɔ ké nyɔ séín cĩ́ ɓóɖóɛ̀ kɔ̃ɛɛ kɔ̃ dyi.

¹⁵ Gmɔ̀ nɔ̄, ḿ nì ɓóɖó-dù séín nì ɖé xwía kɛɛ dyí poɛ̌n, ɓɛ́ wa ké dyi. Ɓóɖó-dù ɓěɔ̀ kã́á ɓěɔ̀ mu Jùɖúsɛ̀ɖɛ̀ìn-hwɔ̀ɖɔ̀ɛ̀ kè hwɔɖɔ tɔ̀ɔ̀ séín nì Júɖà-ɓòɖòɛ̀ kɔ̃ɛɛ toún ɖuùn, ké wa mu waà zèè ɓěɔ̀ dyi dèìn ɓó Jùɖúsɛ̀ɖɛ̀ìn-hwɔ̀ɖɔ̀ɛ̀ gmɔ-wɔ̃̀ ɓěɔ̀ gbo.

¹⁶ Ní mu ní nyɔ ɓěɔ̀ gǎ kɔ̃ tòùn ɓó waà hwòɖǒ-kɔ̃in-nyìnììn-ɖɛ̀ séín ɓěɔ̀ jè. Wa táà ḿ dyi, ké wa nì kũùn-kpò-gèɖèpɔ́ɔ̀ ɓě ɓɛ́ wa ɖǎ mɛ kɛɛ ɓièɛ̌n, ké wa nì wa gbo sáa zàǔn.

¹⁷ Ɔ ná nì jèɛɛ, m̀ mɛ jìnììn m̀ mìɔùn, ɓɛ́ m̀ ké ɖɛ séín ní mu m̀ gbo cɛ̃ìn nyɛɛ wa gbo cɛ̃. Mɔ̀ǔn ɖá ɓɛ́ m̀ ké waà dyéɖé peɖe. M̀ dyi waà dyéɖé peɖe ní, ní mu m̀ dɛ̃ nyùìn ɓó wa dyéɖé waí.

¹⁸ Gmɔ̀ nɔ̄, sɔ̀ìn ɓó zɛ̃̌ɛ̀ gboɛɛ, ḿ ɖǎ m̀ nyu kà hwɔɖɔ ɓɛ́ wa cɛ̃̀ìn gmɔ ɖeiɛɛ nìà kɛ, kè kà nɛɛ̀-kpà-cùè-ɓò nìà kɛ, ɔ kè kà bàɖàsǐ-gbà-gba nìà kɛ, ɓó Júɖà-ɓòɖòɛ̀ kã́á ɓěɔ̀ kèɛ̀ gɔ̌mànà-nyɔ̀ vɛ̀nɛ̀ ɓěɔ̀ kèɛ̀ sáa-zà-nyɔ̀ ɓěɔ̀ ɔ kè nyɔ tɔ̀ɔ̀ séín ɓěɔ̀ gbo.

¹⁹ Wa mu m̀ gbo vɔ̃ùn, kɛɛ wa se m̀ toún ɖuɛ́ mu, sepóɛɖé ḿ nì ɓó m̀ gbo, ɓɛ́ ḿ ké m̀ dyí gmɔ̀. Mɔ̄ Bounɓoɔ̀ mɔ̀ nyɔ cɛ̃à kɛ̀.”