Ìkíɖísìásì 1 - Ɓǎsɔ́ɔ̀ Báɓòɔ̀

Toɖo kɔ̃ cĩ́-cĩ́ se ɖɛ ɖò kpa

¹ Wuɖu ɓě nìà céè-ɖɛ̀ nìà kɛ múɛɛ mɔ̀ nyɔ-ɖɛ-tɛ̀mɛ̀ìn-nyɔ̀ mɔ̀ ma Dèɓéɛ̀ dyú-gàà ɓɛ́ ɔ mɔ̀ ma kã́á, ɓɛ́ ɔ cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ wuɖu.

² Nyɔ-ɖɛ-tɛ̀mɛ̀ìn-nyɔ̀ɔ̀ ɖá, “Toɖo kɔ̃ cĩ́-cĩ́ se ɖɛ ɖò kpa. Ɔ mɔ̀ ɖɛ fóɖóún. Ɔ mɔ̀ ɖɛ fóɖóún cá!

³ Ɖɛ́ mɔ̀ kpáná ɓɛ́ nyɔ ɖò dyé ɖé kũ̀à séín ɔ nyu dà ɓóɖó-kpàà kɔ̃ɛɛ mú kɛ́?

⁴ Xwéɖé-dù ɖò mɔ̀ùn sɔ̀ ɓó, ké xwéɖé-dù ɖò mɔ̀ùn kɔ ɓó dyí. Kɛɛ kà dyúáɖò kà ɓóɖó-kpàà nyu zɔ̃̌ɔ̀ nìɛ̀ kɛɛ, kǎà ɔ nì ke kánáá pū.

⁵ Dyóɖóɔ̀ wóɖó xwáɖáún, ké dyóɖóɔ̀ kpá dyi. Ké ɔ fṹà, ké ɔ mu dɛ̀ ɔ wóɖóìn kà xwáɖáún wɛ̃ɛ ɖe.

⁶ Pìɔ̌ɔ̀ ɓaɖa, ké ɔ mùìn ɖé dyóó-zɔ̃̀ìn, ké ɔ cáɖá, ké ɔ mùìn ɖé dyóó-xwìà, ké ɔ gã̀ mú ziɛ̌n dyi tee.

⁷ Zii-nì séín wáɖá dyóóɔ̀ mú, kɛɛ dyóóɔ̀ ní dyí. Ké níɔ̀ kɔ́ìn zii-nì ɓěɔ̀ kɔ̃ ɖe.

⁸ Ɖɛ séín dyí nyɔ-sàìn-ɖɛ̀ mú, ké wɔ̃ seɛ kɔ̃in zaìn ɓɛ́ìn. Dyéɖé mɔ́ ɖɛ ɖìè dyéɛ dyi kánáá pū, ké ɖùǔ mɔ́ ɖɛ ɖìè wɔ̃́ɔ dyi kánáá pū.

⁹ Ɖɛ ɖǎ kpá kɛɛ mu kpáùn ɖe, ké ɖɛ nyɔǔn-dyù ɖǎ nyu kĩ́ín nyɛɛ, wa muɛ nyuùn ɖe. Ɖɛ ɖìè ɖò se dà ɓóɖó-kpàà kɔ̃ nì.

¹⁰ Ti ɖíɛ́ ɓě ní, wa cɛ̃ɛ, ké wa ɖá, ‘Ɓě gmɔ̀ nɔ̄, ɖɛ ɖìè ɖò kɛà kɛ̀!’ Kɛɛ gbào, ɔ se ná nì. Ɖɛa ɖǎǒ zɔ̃̌ɔ̀ nì kĩ́ín. Ɔ nì zɔ̃̌ɔ̀ hwɛ̀ ké à mɔ̀ùn nìà kɛ̀.

¹¹ Ɖɛ ɓě ɓɛ́ wa ɖǎ zɔ̃̌ɔ̀ kpá kĩ́ín nyɛɛ jè se nyɔ ɖò hwìɖǐi nì ɖe. Ké nyɔ ɓě ɓɛ́ wa mu wóɖóùn ɖé dyúa kɛɛ, ɖɛ ɓě mu kpáùn hwɛ̀ wa mɔ̀ùn ké wóɖóɛɛ ɖò jè se wa mɔ̀ùn hwìɖǐi nìɛ̌ mu.

Ɖɛ ɓě ɓɛ́ nyɔ-ɖɛ-tɛ̀mɛ̀ìn-nyɔ̀ɔ̀ ɖǎ dyé ké ɔ dyuò dyíɛ

¹² “Mɔ̄ nyɔ-ɖɛ-tɛ̀mɛ̀ìn-nyɔ̀ɔ̀, ḿ mɔ̀ Éézùɖùɛ̀-ɓòɖòɔ̀ kã́á, ké ḿ cĩ́ nɔ̄ Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

¹³ Ní hwòɖǒ jìnìɛ̀n ma kɔ̃, ɓɛ́ ní fɔ̀nɔ̀-hwòɖǒɔ̀ ké ma ɖɛ ɓě ɓɛ́ nyɔǔn-dyù nyu dà ɓóɖó-kpàà kɔ̃ɛɛ múin ɖe. Ɔ mɔ̀ gana-kũ̀à, ké Gèɖèpɔ́ɔ̀ ɖǎa nyɔǔn-dyù nyí, ɓɛ́ wa kéɛ nyu.

¹⁴ Ḿ ɖǎ ɖɛ séín ɓɛ́ nyɔǔn-dyù nyu dà ɓóɖó-kpàà kɔ̃ɛɛ dyé. Mɛ̀nɛ̌-kèǐn, wa séín se ɖɛ ɖò kpá wà! Ɔ hwɔìn kà nyɔ kéɔ́ kà pìɔ̌ kíɖíí kpá kɛ.

¹⁵ Ɖɛ kíɖíìn múin nyɛɛ, nyɔ ɖò seɛ dyí sɛ́ɖɛ́ìn ɓɛ́ìn. Ké ɖɛ se nìɛɛ, nyɔ ɖò seɛ zɛɖɛɛ ɓɛ́ìn.

¹⁶ “Ḿ cɛ̃ɛ ma ɖé ḿ mìɔùn hwòɖǒ bũ̌, ké ḿ ɖá, ‘Ḿ ɖǎ hwòɖǒ fɔ̀nɔ̀, ké ḿ ɖǎ nyɔ séín ɖúó Jùɖúsɛ̀ɖɛ̀ìn-hwɔ̀ɖɔ̀ɔ̀ wuɖuí kɔ̃̀ǔn dyíɛɛ dyí zi. Ḿ ɖǎ ɖɛ mɔ̀ hwòɖǒ-fɔ̀nɔ̀-fɔ̀nɔ̀ kè ɖɛ-múin-wɔ̃́-wɔ̃́ɛɛ dyí dyuò.’

¹⁷ Ɔ jèɛɛ, ní hwòɖǒ ɖǎa ma kɔ̃ jìnììn cá, ɓɛ́ ḿ ké hwòɖǒ-fɔ̀nɔ̀-fɔ̀nɔ̀ kè fuɖuù-fuɖuù zaìn gboi dyuò, ɔ kè ɓɛ́ ḿ ké hwòɖǒ-fɔ̀nɔ̀-fɔ̀nɔ̀ kè zuɖu-zuɖu zaìn gboi dyuò. Kɛɛ púɛɛ, ḿ dyéɛ múin kà ɖɛ nìà kɛ hwɔìn kà nyɔ kéɔ́ kà pìɔ̌ kíɖíí kpá kɛɛ ɖekèɛ.

¹⁸ Sepóɛɖé fɔ̀nɔ̀-hwòɖǒ kúɖúú dyà wìì kúɖúú. Kà nì fɔ̀nɔ̀-hwòɖǒɔ̀ nyu kɔ̃ kpáa kɛɛ, kǎà nì wìì nyu kɔ̃ kpáa.