Híìbúɖúù 1 - Ɓǎsɔ́ɔ̀ Báɓòɔ̀

Gèɖèpɔ́ɔ̀ wùɖùìn ɖé ɔ Dyú-gààɔ̀ mú

¹ Gèɖèpɔ́ɔ̀ wùɖù zɔ̃̌ɔ̀ à ɓǎ nììn ɓǎ ɓěɔ̀ gbo dyììn ɖé ɔ kpáá-ɖɛ̀-cɛ̃-nyɔ̀ ɓěɔ̀ mú ti pàɖǎ, ɔ kè ɖé hwìè kò-kò mú.

² Kɛɛ ɖé wé hwɛ̀ìn-gbɔ ɓě nìà kɛ múɛɛ, ɔ wùɖù à gbo dyììn ɖé ɔ Dyúɔ̀ mú. Ɔ mɔ̀ nyɔ kɔ̃̀ mú ɓɛ́ Gèɖèpɔ́ɔ̀ mɛ ma ɓóɖó-kpàà kɛ, ké ɔ mɔ̀ nyɔ ɓɛ́ Gèɖèpɔ́ɔ̀ ɖǎ gã ɓɛ́ ɔ ké ɖɛ séín kɔ̃̀ɛ.

³ Dĩ́ín-dĩ̀ìn Gèɖèpɔ́ɔ̀ fã-fãɔ̀ fã̀ìn ɔ mú. Kà Gèɖèpɔ́ɔ̀ nyu nìɛ̀ kɛɛ, kǎà ɔ Dyúɔ̀ mɔ̀ùn nyu nìɛ̀ jɛ́ɛ́. Ɔ wuɖu ɓéɖé kpéɔ̀ mɔ̀ nyɔ nyuɛ ké ɖɛ séín nì kánáá pū. Ti ɓɛ́ ɔ ɖǎ ma nyɔǔn-dyùɛ̀ nàmàǔn dyi gbaà kɛɛ, ɔ dèɖě ma ɖé kpé-séín-ɓéɖé-Gèɖèpɔ́ɔ̀ nìà ɖé dyɔún wɛ̃ɛ ɖiaún dya.

⁴ Gèɖèpɔ́ɔ̀ nyuɛ ké ɔ Dyú-gààɔ̀ kpa ɖɛ mìɔ ké ɔ zi ínjà ɓěɔ̀ dyí, kà ɓɛ́ nyɛ́nɛ́ ɓɛ́ Gèɖèpɔ́ɔ̀ nyí ma kà ɔ kɛɛ kpaà ɖɛ ké ɔ zià wa nììn ɓěɔ̀ dyíɛ.

Gèɖèpɔ́ɔ̀ Dyú-gààɔ̀ kpa ɖɛ ké ɔ zi ɔ ínjà ɓěɔ̀ dyí

⁵ Sepóɛɖé Gèɖèpɔ́ɔ̀ séèɛ̀ ínjà ɓěɔ̀ ɖò gbo cɛ̃ ɖò, ɓɛ́ ɔ ké níiń, “M̀ mɔ̀ǎ ní dyú-gàà, ké ḿ mɔ̀ǎ nì ɓǎ ɓó zɛ̃̌ɛ̀.” Ké Gèɖèpɔ́ɔ̀ seɛ ma ɔ ínjà ɓěɔ̀ ɖò jè cɛ̃, ɓɛ́ ɔ ké níiń, “Ní mu ɔ ɓǎ jǔùn, ké ɔ mu ní dyú-gàà jǔùn.”

⁶ Ké ɖeɛɛ, ti ɓɛ́ Gèɖèpɔ́ɔ̀ nì ma ɔ Dyú-gàà kĩ́ín-kĩ́ínɔ̀ nɔ̄ ɓóɖó-kpàà kɔ̃ tòɛ̌n nyɛɛ, ɔ ɖá, “Ní ínjà séín ɓěɔ̀ mɛ ɓiè ɔ.”

⁷ Ɖɛ ɓɛ́ Gèɖèpɔ́ɔ̀ cɛ̃ ma ɓá ínjà ɓěɔ̀ dyíɛɛ, ɔ kɛà kɛ̀. “Gèɖèpɔ́ɔ̀ nyu ɔ ínjà ɓěɔ̀ pìɔ̌ɔ̀ mú, ké ɔ nyu ɔ gbo-nì-nyɔ̀ ɓě nyɛ-mìɔ̀ mú.”

⁸ Kɛɛ ɖɛ Gèɖèpɔ́ɔ̀ cɛ̃ ɓá Dyúɔ̀ jè dyíɛɛ kɛà kɛ̀. “Kã́á-ɓòɖò ɓɛ́ Gèɖèpɔ́ɔ̀ nyíà m̀ ɓɛ́ m̀ kéà wuɖuí kɔ̃̀ɛɛ mu nììn kánáá pū. M̀ kɔ̃̀ nì nyɔ ɓěɔ̀ wuɖuí ɖé dyí-sɛ́ɖɛ́ìn-sɛ́ɖɛ́ìn mú.

⁹ M̀ ɖɛ̀ɓɛ̀ dyí-sɛ́ɖɛ́ìn-ɖɛ̀ mú, ké m̀ nyɛ́ hwòɖǒ-kɔ̃in-nyìnììn-ɖɛ̀ mú. Ɔ kɔ̃̀ jè Gèɖèpɔ́ɔ̀ ɓɛ́ ɔ mɔ̀à nì Gèɖèpɔ́ɔ̀ kɛɛ gãà m̀, ké ɔ púèà m̀ múà kɔ̃ kà nyɔ púè kà nyɔ ɖò cáná dúún wɛ̃. Ɔ nyu m̀ ɖɛ nìà kɛ bũ̌ ɖé m̀ mǔè-kã̀ǎ ɓěɔ̀ hwìɛ̀.”

¹⁰ Ɔ cɛ̃ɛ ɖe, ké ɔ ɖá, “Bounɓo, mɔ̀ mɔ̀ nyɔ dè ma ɓóɖó-kpàà hìɖì-kpà ɖé ɖɛ dè gbɔ mú, ké dyɔɔ̀ mɔ̀ nì mɛɛ-ɖɛ̀.

¹¹ Wa mu mú gbɔɔ̀ùn, kɛɛ mɔ̀ùn mu nììn kánáá pū. Wa séín mu súá kpáùn kà mú-po-ɖɔ̀ nìà kɛ.

¹² Nì mu wa jaɖaùn kà nyɔ jaɖaà ɖɔ kɛ. Ké wa mu gbo zĩàìn kà nyɔ zĩàìn ɖɔ gboɛ. Kɛɛ mɔ̀ùn ní zĩàìn gbo, ké m̀ se súá kpáa mu.”

¹³ Gèɖèpɔ́ɔ̀ séèɛ̀ ínjà ɓěɔ̀ ɖò gbo cɛ̃, ɓɛ́ ɔ ké níiń, “Dèɖě dà ḿ ɖiaún dya, ɓɛ́ ḿ ké nì mú-nyɛ́-nyɔ̀ ɓěɔ̀ nì ɓo-kɔ̃-síìn-ɖɛ̀ mú nyu hwɛ̀.”

¹⁴ Ɖɛ́ mɔ̀ ínjà ɓěɔ̀ kɛ́? Wa séín mɔ̀ ɖɛ ɓě, ké wa ɓiè Gèɖèpɔ́ɔ̀, ké ɔ tò wa, ɓɛ́ wa ké nyɔ ɓě kéà pó-pó ɓéɖéɛɛ gbo kpá.