Hágàì 1 - Ɓǎsɔ́ɔ̀ Báɓòɔ̀

Bounɓoɔ̀ tò wuɖu ɓɛ́ wa ké ɔ gbǒɔ̀ po ɖe

¹ Ɖé Dìwáɖádyà ɓɛ́ ɔ mɔ̀ ma Pɔ́sìà-ɓòɖòɔ̀ kã́á kɛɛ nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ dɛ̀nɛ̀ mɛ̀nɛ̌ìn-ɖò nììnɔ̀ wé kĩ́ín-kĩ́ínɔ̀ ɓaɖaa, Bounɓoɔ̀ wùɖù ma Zɛ̀wáɖáɓèɓò ɓɛ́ ɔ mɔ̀ ma Sɛ́àtíèɛ̀ dyú-gàà, ɓɛ́ ɔ mɔ̀ ma Júɖà-ɓòɖòɔ̀ wuɖuí-kɔ̃̀-nyɔ̀ kɛ kè Jasúé ɓɛ́ ɔ mɔ̀ ma Jɛ̀hózàɖàà dyú-gàà, ɓɛ́ ɔ mɔ̀ ma sáa-zà-nyɔ̀ vɛ̀nɛ̀ kɛɛ gbo. Bounɓoɔ̀ tòìn ma wuɖuɔ̀ Hágàì ɓɛ́ ɔ mɔ̀ ma kpáá-ɖɛ̀-cɛ̃-nyɔ̀ kɛɛ mú.

² Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ma Hágàì gbo, ké ɔ ɖá, “Nyɔ ɓěɛ̀ cɛ̃ɛ kà ɔ séè ti ke ɓɛ́ wa ké ní gbǒɔ̀ po ɖe kɛ.

³ Kɛɛ cɛ̃ɛ wa gbo, ɓɛ́ m̀ ké níiń, ‘Bounɓoɔ̀ ɖá,

⁴ “Ɔ mɔ̀ ti, ɓɛ́ ɓě ké ɓěɛ̀ gbǒ nɔ̀mɔ̀ kɔ̃in ɓěɔ̀ mú nì, ɓɛ́ ḿ níǐn gbǒ gbàɔ̀ ké ɓó dyi nyànà kánáá pūe?

⁵ Ɓě ní dyé ɖɛ ɓě nìà ɓě gbo kpáuń wɛ̃ɛ̀?

⁶ Ɓě ɓá ɖɛ ɓáún-ɓáún ɖé ɓěɛ geɖe ɓěɔ̀ gbo, kɛɛ ɖɛ ɓě dyé ɖéɛɛ se xwaún dyi kpá. Ɓě ɖi ɖɛ, kɛɛ ɔ ní ɖoɓo ɓě dyí. Ɓě ná wã́ìn, kɛɛ wã́ìnɔ̀ se dyí vò ɓɛ́ ɔ ké ɓěɛ̀ hwòɖǒ dyi dè. Ɓě po ɖɔún, kɛɛ ɔ se ɓě zùzù kpɔ̃̀ìn ɓɛ́ìn. Ɓě mɔ́ wíɖí, kɛɛ ɓě poɛ ɓɔ̀ɔ̌ ɓɛ́ ɔ ɓéɖé ɓí ɓěɛɛ mú.

⁷ Ɓě ní dyé ɖɛ ɓě nìà ɓě gbo kpáuń wɛ̃ɛ̀?

⁸ Ɔ ná nì jèɛɛ, ɓě mu ɖé toɖo ɓěɔ̀ gbo, ɓɛ́ ɓě ké cu cɛ̃, ɓɛ́ ɓě ké ní gbǒɔ̀ po, ɓɛ́ ní hwòɖǒ ké dyi dè ɓáa jè dyí, nìí ɓɛ́ nyɔǔn ɓě ké ḿ dya dè.

⁹ “ ‘ “Ɓě dèɔ̌ máa hwìɖǐi, ɓɛ́ ɓěɛ̀ geɖe ɓěɔ̀ kéɔ́ bã mìɔ, kɛɛ gmɔ̀ nɔ̄, ɖɛ ɓě dyé ɖéɛɛ se dyí vò. Ké ɔ nyɔ ɓě dyà hwɔɖɔún wɛ̃ɛ, ḿ poɛ pìɔ̌. Ɖɛ́ kɔ̃̀ jè ḿ nyuà náa kɛ́? Ḿ nyuɛ náa, sepóɛɖé níǐn gbǒ gbàɔ̀ nyànà ɓó dyi, ké ɓě se ɖɛ ɖò nyuɛń nì ɓáa jè dyí, kɛɛ ɓě nì ɓě mìɔùn nììn gbǒ ɓě poɛń.

¹⁰ Ɓó ɖɛ ɓě nyuà kɛ jèɛɛ, dyɔɔ̀ ɖǎ ɔ dunuɔ̀ dyí kpɔ̃, ké ɓóɖóɔ̀ ɖǎ ɔ ɖoɓoɔ̀ dyí kpɔ̃.

¹¹ Ḿ ɖǎa nyu ké ɓóɖóɔ̀ ɖǎ kɔ̃in dyɛ ɖé ɓěɛ̀ geɖe ɓěɔ̀ gbo kè ɖé toɖo ɓěɔ̀ dya, ké ɓěɛ̀ ɓáá-ɖɛ̀ ɓěɔ̀ kè ɓěɛ̀ wã́ìn ɖìèɔ̀ kè ɓěɛ̀ cánáɔ̀ kè ɓěɛ̀ nyúà-ɖɛ̀ ɓěɔ̀ kè ɓě mìɔùn ɔ kè kũ̀à séín ɓɛ́ ɓě nyuɛɛ ɖò se mú wóɖó.” ’ ”

Nyɔ ɓěɔ̀ nyu Bounɓoɔ̀ wuɖuɔ̀

¹² Hwɛ̀ ké Zɛ̀wáɖáɓèɓò mɔ̀à Sɛ́àtíèɛ̀ dyú-gàà ɓɛ́ ɔ mɔ̀à Júɖà-ɓòɖòɔ̀ wuɖuí-kɔ̃̀-nyɔ̀ɔ̀ kɛ kè Jasúé mɔ̀à Jɛ̀hózàɖàà dyú-gàà, ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Júɖà-nyɔ̀ ɓěɔ̀ xwéɖé wèɔ̀ nyu ma wuɖu ɓɛ́ Bounɓo mɔ̀à waà Gèɖèpɔ́ɔ̀ kɛɛ tòìn ma kà Hágàì mɔ̀à kpáá-ɖɛ̀-cɛ̃-nyɔ̀ɔ̀ kɛɛ múɛ, sepóɛɖé Bounɓoɔ̀ mɔ̀ nyɔ ɖoɓo ma ɔ ɖé wa gbo jè. Púɛɛ, nyɔ ɓěɔ̀ ɖú ma Bounɓoɔ̀ ɓiè kpàǐ hwòɖǒɛ̀-ɖé-hwɛ̀-kà.

¹³ Hwɛ̀ ké Hágàì mɔ̀à Bounɓoɔ̀ kíáɔ̀ kɛɛ cɛ̃ɛ ma nyɔ ɓěɔ̀ gbo, ké ɔ ɖá, “Bounɓoɔ̀ ɖá ɔ nì ɓó ɓě gbo.”

¹⁴ Ké Bounɓoɔ̀ nyuɛ ké Zɛ̀wáɖáɓèɓò kè Jasúé ɔ kè Júɖà-nyɔ̀ ɓěɔ̀ xwéɖé wèɔ̀ hwòɖǒ wɔ̃́ ma, ké wa dè ma Bounɓo mɔ̀ nyɔ nìà ɖɛ séín kɔ̃in, ɓɛ́ ɔ mɔ̀à waà Gèɖèpɔ́ɔ̀ kɛɛ gbǒɔ̀ kũ̀àɔ̀ nyuɛ gbɔ.

¹⁵ Wa dè ma kũ̀àɔ̀ gbɔ ɖé Dìwáɖádyà nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ dɛ̀nɛ̀ mɛ̀nɛ̌ìn-ɖò nììnɔ̀ wé kpáɖá-nyɔ sè hĩinyɛ nììnɔ̀ ɓaɖa.